ແຕ່ວັນທີ 16 ຫາວັນທີ 18 ຕຸລາ, ຄະນະປະຕິບັດງານຄະນະພັກກຸ່ມວິສາຫະກິດຂັ້ນສູນກາງ ໄດ້ໄປຢ້ຽມຢາມ ແລະເຮັດວຽກຢູ່ລາວ. ທ່ານ ຫງວຽນດຶກຟອງ ຮອງເລຂາຜູ້ປະຈໍາການຄະນະພັກກຸ່ມ ເປັນຫົວໜ້າຄະນະ.
ໃໃນ 2 ວັນເຮັດວຽກ, ຄະນະໄດ້ໄປຢ້ຽມຢາມ ແລະເຮັດວຽກຢູ່ສະຖານທູດຫວຽດນາມ ປະຈຳ ລາວ, ສະມາຄົມວິສາຫະກິດຫວຽດນາມ ທີ່ຮ່ວມມື ແລະລົງທຶນຢູ່ລາວ ເພື່ອແລກປ່ຽນບາງເນື້ອໃນທີ່ກ່ຽວຂ້ອງເຖິງວຽກງານພັກ ຢູ່ໃນບັນດາວິສາຫະກິດ ກໍ່ຄືການພົວພັນຮ່ວມມືລະຫວ່າງ ລາວ-ຫວຽດນາມ.
 |
| ຄະນະປະຕິບັດງານ ໄປຢ້ຽມຢາມໂຮງງານປຸງແຕ່ງຢາງພາລາຂອງບໍລິສັດຫຸ້ນສ່ວນຢາງພາລາຫວຽດລາວ. ພາບ: thanhnien.vn |
ວັນທີ 18 ຕຸລາ, ຄະນະປະຕິບັດງານ ໄດ້ໄປຢ້ຽມຢາມ ແລະເຮັດວຽກຢູ່ສະຖານກົງສູນໃຫຍ່ຫວຽດນາມ ປະຈຳ ນະຄອນປາກເຊ, ແຂວງຈຳປາສັກ, ປະເທດລາວ. ຢູ່ທີ່ນີ້, ທ່ານ ຫງວຽນວັນຈູງ ຫົວໜ້າກົງສູນໃຫຍ່ຫວຽດນາມ ປະຈຳ ນະຄອນປາກເຊ ໄດ້ແຈ້ງໃຫ້ຄະນະປະຕິບັດງານຮັບຊາບກ່ຽວກັບສະພາບການເຄື່ອນໄຫວຂອງບໍລິສັດຫວຽດນາມ ຢູ່ລາວ ແລະບໍລິສັດຢາງພາລາຂຶ້ນກັບ VRG ທີ່ພວມເຄື່ອນໄຫວຢູ່ລາວ.
ຕອນບ່າຍວັນດຽວກັນ, ຄະນະປະຕິບັດງານກໍ່ໄດ້ໄປຢ້ຽມຢາມ ແລະເຮັດວຽກຢູ່ບໍລິສັດຫຸ້ນສ່ວນຢາງພາລາຫວຽດລາວ. ທີ່ການເຮັດວຽກ, ຄະນະໄດ້ຮັບຟັງການນໍາບໍລິສັດລາຍງານກ່ຽວກັບສະພາບການຜະລິດ, ດຳເນີນທຸລະກິດ ແລະວຽກງານພັກຢູ່ບໍລິສັດ.
ຕາມການລາຍງານແລ້ວ, ເນື້ອທີ່ສວນຢາງພາລາທັງໝົດທີ່ບໍລິສັດພວມຄຸ້ມຄອງແມ່ນກວ່າ 10.000 ເຮັກຕາ, ໃນນັ້ນເນື້ອທີ່ດຳເນີນທຸລະກິດ ແມ່ນກວ່າ 9.000 ເຮັກຕາ. ໄລ່ຮອດວັນທີ 31 ສິງຫາ, ບໍລິສັດຂຸດຄົ້ນນ້ຳຢາງໄດ້ກວ່າ 11.000 ໂຕນ, ບັນລຸເກືອບ 63% ຂອງແຜນການ; ການບໍລິໂພກບັນລຸກວ່າ 13.000 ໂຕນ, ເທົ່າກັບກວ່າ 73% ຂອງແຜນການ; ລາຍຮັບບັນລຸກວ່າ 460 ຕື້ດົ່ງ, ປະຕິບັດສໍາເລັດແຜນການ ປີ 2023 ໄດ້ກວ່າ 65%.
ສິ້ນສຸດການເຮັດວຽກ, ທ່ານ ຫງວຽນດຶກຟອງ ເນັ້ນໜັກວ່າ ບໍລິສັດຫຸ້ນສ່ວນຢາງພາລາຫວຽດລາວ ຕ້ອງສືບຕໍ່ຮັກສາການພັດທະນາ, ຮັບປະກັນອິດທິພົນຊື່ສຽງເຄື່ອງໝາຍການຄ້າຂອງບໍລິສັດ ແລະ VRG ກໍ່ຄື ຫວຽດນາມ ຢູ່ລາວ; ປັບປຸງການເຄື່ອນໄຫວຂອງອົງຄະນະພັກ, ຍູ້ແຮງວຽກງານດໍາເນີນຊີວິດພັກ, ຂະຫຍາຍສະມາຊິກພັກ, ກໍ່ສ້າງຮາກຖານພັກໃຫ້ປອດໃສໝັ້ນຄົງເຂັ້ມແຂງຢູ່ຫົວໜ່ວຍ.
ບູນມີ
