ຕອນເຊົ້າວັນທີ 17 ຕຸລາ, ທີ່ນະຄອນກອນຕູມ, ພະແນກກະສິກໍາ ແລະພັດທະນາຊົນນະບົດ ແຂວງກອນຕູມ ແລະພະແນກກະສິກໍາ ແລະປ່າໄມ້ ແຂວງອັດຕະປື, ລາວ ໄດ້ເຊັນບົດບັນທຶກຊ່ວຍຈໍາວ່າດ້ວຍກົນໄກຮ່ວມມືສະກັດກັ້ນການລະເມີດໃນຂົງເຂດປ່າໄມ້, ໄລຍະ 2024-2025.
ສອງຝ່າຍໄດ້ເພີ່ມທະວີການສົມທົບກັນຢ່າງແໜ້ນແຟ້ນໃນການຜັນຂະຫຍາຍບັນດາການເຄື່ອນໄຫວໂຄສະນາສຶກສາ, ຍົກສູງຄວາມຮັບຮູ້ໃຫ້ຊຸມຊົນ ກ່ຽວກັບການປົກປັກຮັກສາຊັບພະຍາກອນປ່າໄມ້, ອະນຸລັກຮັກສາຊີວະນາໆພັນ; ກວດກາ, ສະກັດກັ້ນການຂຸດຄົ້ນ, ການຄ້າຂາຍ, ຂົນສົ່ງເຄື່ອງປ່າຂອງດົງຢູ່ເຂດຊາຍແດນໃຫ້ສອດຄ່ອງກັບກົດໝາຍຂອງແຕ່ລະປະເທດ...
 |
| ກໍາລັງກວດກາປ່າໄມ້ລາດຕະເວນປ່າໄມ້. ພາບ: TTXVN |
ເພື່ອຍົກສູງປະສິດທິຜົນໃນວຽກງານປະສານງານຄຸ້ມຄອງ ແລະປົກປັກຮັກສາປ່າໄມ້ຢູ່ເຂດຊາຍແດນ, ທ່ານ ຫງວຽນເຕີນລຽມ, ຫົວໜ້າພະແນກກະສິກຳ ແລະພັດທະນາຊົນນະບົດ ແຂວງກອນຕູມ ສະເໜີໃຫ້ອຳນາດການປົກຄອງຂອງສອງປະເທດເອົາໃຈໃສ່ສົມທົບກັນ ແລະຊີ້ນຳບັນດາພະແນກ, ຂະແໜງການ ແລະທ້ອງຖິ່ນຢູ່ເຂດຊາຍແດນສືບຕໍ່ຜັນຂະຫຍາຍການປະຕິບັດບັນດາເນື້ອໃນບົດບັນທຶກຊ່ວຍຈໍາທີ່ໄດ້ລົງນາມ; ເພີ່ມທະວີການໂຄສະນາເຜີຍແຜ່ກົດໝາຍວ່າດ້ວຍການປົກປັກຮັກສາປ່າໄມ້ໃຫ້ປະຊາຊົນຢູ່ເຂດຊາຍແດນ.
ແຂວງກອນຕູມ ແລະອັດຕະປື ມີຊາຍແດນຕິດຈອດກັນຍາວກວ່າ 75 ກິໂລແມັດ; ເນື້ອທີ່ປ່າໄມ້ໃນເຂດຕິດກັບຊາຍແດນແມ່ນກວ້າງໃຫຍ່ ດ້ວຍກວ່າ 39.000 ເຮັກຕາ. ປ່າໄມ້ຢູ່ທີ່ນີ້ມີສັດ ແລະພືດທີ່ມູນຄ່າຫຼາຍຊະນິດ, ແຕ່ພູມສັນຖານທີ່ທຸລະກັນດານ ແລະຫ່າງໄກສອກຫຼີກ, ນັ້ນແມ່ນຄວາມສ່ຽງຊ້ອນແຝງທີ່ຈະເກີດການລະເມີດໃນວຽກງານຄຸ້ມຄອງ ແລະປົກປັກຮັກສາປ່າໄມ້.
ສະເພາະໄລຍະແຕ່ປີ 2019-2023, ກໍາລັງກວດກາປ່າໄມ້ແຂວງກອນຕູມ ໄດ້ເປີດການລາດຕະເວນ ແລະກວດກາເກືອບ 600 ເທື່ອ, ພົບເຫັນ 35 ກໍລະນີ ລະເມີດກົດໝາຍວ່າດ້ວຍປ່າໄມ້ ດ້ວຍຂອງກາງແມ່ນໄມ້ທ່ອນຊະນິດຕ່າງໆ 250 m3, ເນື້ອທີ່ປ່າໄມ້ກວ່າ 4,6 ເຮັກຕາຖືກເສຍຫາຍ.
ໃນຂະນະນັ້ນ, ກໍາລັງເຈົ້າໜ້າທີ່ແຂວງອັດຕະປື ກໍ່ໄດ້ຈັດຕັ້ງການລາດຄະເວນ, ກວາດລ້າງ 79 ຄັ້ງ, ຮີບເອົາໄມ້ກວ່າ 48m3 ແລະເຄື່ອງປ່າຂອງດົງປະເພດຕ່າງໆນຳອີກ.
ບູນມີ
