ຫວຽດນາມ ຊຸກຍູ້ການດຶງດູດການລົງທຶນຂອງ ກາຕາ

	ນຳສົ່ງພົນລະເມືອງຫວຽດນາມ ເກືອບ 340 ຄົນມາຈາກນໍເວ, ໂມຊຳບິກ, ອາຟຣິກາໃຕ້, ກາຕາ ເພື່ອກັບຄືນປະເທດ
	ຫວຽດນາມ ນຳສົ່ງພົນລະເມືອງ ຈຳນວນ 266 ຄົນ ຈາກປະເທດ ຄູເວດ, ກາຕາ ແລະ ອີຢີບ ກັບຄືນປະເທດຢ່າງປອດໄພ

ຕອນເຊົ້າວັນທີ 9 ຕຸລາ, ທີ່ສໍານັກງານກະຊວງການຕ່າງປະເທດ ຫວຽດນາມ ໄດ້ມີການຕ້ອນຮັບທ່ານ Khalid Ali Abdullah Abel ເອກອັກຄະລັດຖະທູດ ກາຕາ ປະຈໍາ ຫວຽດນາມ, ທ່ານ ບຸ່ຍແທັງເຊີນ ລັດຖະມົນຕີການຕ່າງປະເທດ ຫວຽດນາມ ໄດ້ສະແດງຄວາມຊົມເຊີຍທ່ານເອກອັກຄະລັດຖະທູດ ກາຕາ ທີ່ມາຮັບໜ້າທີ່ຢູ່ ຫວຽດນາມ.

ທ່ານ ບຸ່ຍແທັງເຊີນ ເນັ້ນໜັກວ່າ ກະຊວງການຕ່າງປະເທດ ແລະ ບັນດາອົງການທີ່ກ່ຽວຂ້ອງຂອງຫວຽດນາມ ຈະໜູນຊ່ວຍທ່ານເອກອັກຄະລັດຖະທູດ ປະຕິບັດສຳເລັດໜ້າທີ່ເປັນຢ່າງດີ.

ທ່ານ ບຸ່ຍແທັງເຊີນ ສະແດງຄວາມປະຕິຊົມຊື່ນຕໍ່ບັນດາບາດກ້າວພັດທະນາໃນການພົວພັນມິດຕະພາບ ແລະ ການຮ່ວມມືລະຫວ່າງສອງປະເທດ ໃນໄລຍະຜ່ານມາ. ກ່ຽວກັບດ້ານການເມືອງ-ການທູດ, ສອງຝ່າຍໄດ້ແລກປ່ຽນຄະນະຜູ້ແທນທຸກຂັ້ນເປັນປະຈໍາ, ຫວ່າງມໍ່ໆມານີ້ແມ່ນການຢ້ຽມຢາມ ກາຕາ ຢ່າງເປັນທາງການຂອງ ທ່ານນາງຮອງປະທານປະເທດຫວຽດນາມ ຫວໍທິແອງຊວນ ເມື່ອເດືອນ ພຶດສະພາ 2023; ການສົມທົບກັນຢ່າງແໜ້ນແຟ້ນໃນບັນດາເວທີປາໄສພາກພື້ນ ແລະ ສາກົນ. ກ່ຽວກັບເສດຖະກິດ, ສອງຝ່າຍບັນລຸໄດ້ຫຼາຍໝາກຜົນທີ່ຕັ້ງໜ້າ, ບັນດາກົນໄກຮ່ວມມືດ້ານເສດຖະກິດໄດ້ຮັບການຮັກສາ...

ໂດຍສະແດງຄວາມປິຕິຊົມຊື່ນເມື່ອໄດ້ຮັບໜ້າທີ່ຢູ່ຫວຽດນາມ, ທ່ານເອກອັກຄະລັດຖະທູດ Ali Abdullah Abel ຢັ້ງຢືນວ່າ ຫວຽດນາມ ແມ່ນຄູ່ຮ່ວມມືສໍາຄັນຂອງ ກາຕາ ຢູ່ພາກພື້ນອາຊີ-ປາຊີຟິກ ແລະ ໃຫ້ຄໍາໝັ້ນສັນຍາຈະມານະພະຍາຍາມຈົນສຸດຄວາມສາມາດ, ປະກອບສ່ວນປັບປຸງ ແລະ ເພີ່ມທະວີການພົວພັນມິດຕະພາບ ແລະ ການຮ່ວມມືລະຫວ່າງ ຫວຽດນາມ - ກາຕາ ກວ່າອີກ. ທ່ານເອກອັກຄະລັດຖະທູດ ໄດ້ກ່າວກ່ຽວກັບບັນດາທິດທາງໃຫຍ່ທີ່ຈະປະຕິບັດໃນອາຍຸການຂອງຕົນເພື່ອເຮັດໃຫ້ຄຳໝັ້ນສັນຍານັ້ນປະກົດຜົນເປັນຈິງ.

ບັນຍາກາດທີ່ການຕ້ອນຮັບ. ພາບ: baoquocte.vn

ໂດຍຢັ້ງຢືນບັນດາໝາກຜົນຮ່ວມມືສອງຝ່າຍ ເຖິງວ່າຕັ້ງໜ້າແຕ່ຍັງບໍ່ທັນສົມກັບການພົວພັນດ້ານການເມືອງອັນດີງາມ, ຄວາມສາມາດບົ່ມຊ້ອນລະຫວ່າງສອງປະເທດ, ທ່ານລັດຖະມົນຕີ ບຸ່ຍແທັດເຊີນ ແລະ ທ່ານເອກອັກຄະລັດຖະທູດ Ali Abdullah Abel ໄດ້ແລກປ່ຽນ ແລະ ເຫັນດີເປັນເອກະພາບຕໍ່ບາງມາດຕະການລະອຽດເພື່ອຊຸກຍູ້ການພົວພັນຮ່ວມມືລະຫວ່າງສອງປະເທດໃນໄລຍະຈະມາເຖິງ ຄື ເພີ່ມທະວີການແລກປ່ຽນຄະນະຜູ້ແທນທຸກຂັ້ນ, ໃນນັ້ນ ບູລິມະສິດແກ່ການກະກຽມໃຫ້ການຢ້ຽມຢາມຫວຽດນາມ ຂອງເຈົ້າຊີວິດ ກາຕາ Tamim Bin Hamad Bin Thani ໃນໄຕມາດ IV/2023; ເພີ່ມທະວີບັນດາການເຄື່ອນໄຫວສົ່ງເສີມການຄ້າ, ເຊື່ອມຕໍ່ວິສາຫະກິດສອງຝ່າຍກວ່າອີກ; ດຶງດູດບັນດາກອງທຶນຂອງ ກາຕາ ເຂົ້າຮ່ວມບັນດາໂຄງການນໍ້າມັນ ອາຍແກັດ, ພະລັງງານທົດແທນ, ພື້ນຖານໂຄງລ່າງ, ໂອໂຕໄຟຟ້າຢູ່ ຫວຽດນາມ...; ຄົ້ນຄວ້າຄວາມສາມາດຮ່ວມມືໃນບັນດາໂຄງການກະສິກໍາ ແລະ ໃນຂົງເຂດ Halal, ເພີ່ມທະວີການດຶງດູດແຂກທ່ອງທ່ຽວ, ແຮງງານຜູ້ທີ່ມີສີມືແຮງງານດີ.