| ຫວຽດນາມ: ລາຍຮັບຈາກຂະແຫນງທ່ອງທ່ຽວບັນລຸກ່ວາ 8 ຕື້ USD | |
| ດ່າຫນັງ ຕ້ອນຮັບກຳປັ່ນທະເລລຳທຳອິດໂດຍສານແຂກທ່ອງທ່ຽວສາກົນກັບຄືນມາທ່ອງທ່ຽວ ພາຍຫລັງ 2 ປີ |
ທີ່ວາລະປະຊຸມສະໄໝສາມັນເທື່ອທີ 5, ສະພາແຫ່ງຊາດ ຫວຽດນາມ ຊຸດທີ XV ຫາກໍ່ໄດ້ຜ່ານຮ່າງກົດໝາຍປັບປຸງ ແລະ ເພີ່ມເຕີມບາງມາດຕາຂອງກົດໝາຍວ່າດ້ວຍການອອກ ແລະ ເຂົ້າເມືອງຂອງພົນລະເມືອງຫວຽດນາມ ແລະ ກົດໝາຍວ່າດ້ວຍການເຂົ້າ, ອອກເມືອງ, ການຜ່ານແດນ ແລະ ການຢູ່ອາໄສຂອງຄົນຕ່າງປະເທດໃນຫວຽດນາມ.
ຕາມນັ້ນແລ້ວ, ໄລຍະເວລາຂອງວີຊາເອເລັກໂຕນິກ (e-visa) ຈະເພີ່ມຂຶ້ນຈາກ 30 ວັນ ເປັນ 90 ວັນ. ລັດຖະບານຈະກຳນົດບັນຊີລາຍຊື່ຂອງບັນດາປະເທດ ແລະ ເຂດທີ່ມີພົນລະເມືອງໄດ້ຮັບການອະນຸຍາດ; ລາຍຊື່ດ່ານຊາຍແດນສາກົນທີ່ອະນຸຍາດໃຫ້ຄົນຕ່າງປະເທດເຂົ້າ-ອອກເມືອງດ້ວຍ e-visa. ພາຍຫຼັງໄດ້ຮັບ e-visa ແລ້ວ, ໃນ 90 ວັນ, ຄົນຕ່າງປະເທດສາມາດເຂົ້າ-ອອກເມືອງ ໄດ້ໂດຍບໍ່ຈຳກັດຈຳນວນເທື່ອ, ໂດຍບໍ່ຕ້ອງຜ່ານຂັ້ນຕອນການອອກວີຊາໃໝ່.
 |
ກົດໝາຍກໍ່ອະນຸຍາດໃຫ້ພົນລະເມືອງຂອງບັນດາປະເທດ ທີ່ຖືກຍົກເວັ້ນວີຊາໂດຍຫວຽດນາມຝ່າຍດຽວ ສາມາດຢູ່ອາໄສຊົ່ວຄາວໃນ ຫວຽດນາມ ໄດ້ 45 ວັນ (ລະບຽບກ່ອນໜ້ານີ້ແມ່ນ 15 ວັນ) ແລະ ພິຈາລະນາການອອກວີຊາ ແລະ ການຕໍ່ກຳນົດເວລາຢູ່ອາໄສຊົ່ວຄາວຕາມລະບຽບການ.
ຕາມການຕີລາຄາຂອງບັນດາວິສາຫະກິດແລ້ວ, ການຜ່ອນຜັນນະໂຍບາຍວີຊາ ຈະຊຸກຍູ້ຕະຫຼາດນັກທ່ອງທ່ຽວສາກົນທີ່ "ຫງ່ວມເຫງົາ ຍ້ອນຜົນກະທົບຈາກເສດຖະກິດທີ່ຫຍຸ້ງຍາກ, ເຮັດໃຫ້ປະຊາຊົນໃນຫຼາຍປະເທດຮັດແໜ້ນດ້ານການໃຊ້ຈ່າຍ, ໃນນັ້ນມີທັງການເດີນທາງທ່ອງທ່ຽວ.
ຕາມທ່ານ ຫງວຽນຈຸ່ງແຄງ, ຫົວໜ້າກົມໃຫຍ່ການທ່ອງທ່ຽວແລ້ວ, ການປັບປຸງ ແລະ ເພີ່ມເຕີມບາງມາດຕາຂອງກົດໝາຍວ່າດ້ວຍການອອກ ແລະ ເຂົ້າເມືອງຂອງພົນລະເມືອງ ຫວຽດນາມ ແລະ ກົດໝາຍວ່າດ້ວຍການເຂົ້າ-ອອກເມືອງ, ການຜ່ານແດນ ແລະ ການຢູ່ອາໄສຂອງຊາວຕ່າງປະເທດ ຢູ່ຫວຽດນາມ ດ້ວຍໄລຍະພັກເຊົາຍາວຂຶ້ນ ຈະປະກອບສ່ວນຍົກສູງຄວາມສາມາດແກ່ງແຍ້ງຂອງບັນດາຜະລິດຕະພັນການທ່ອງທ່ຽວຂອງຫວຽດນາມ.
ທ່ານ ຫວູເທບິ່ງ, ປະທານສະມາຄົມທ່ອງທ່ຽວ ຫວຽດນາມ ໃຫ້ຮູ້ວ່າ: ການປັບປຸງ ແລະ ເພີ່ມເຕີມບາງມາດຕາຂອງກົດໝາຍວ່າດ້ວຍການເຂົ້າ, ອອກເມືອງ, ການຜ່ານແດນ ແລະ ການຢູ່ອາໄສຂອງຊາວຕ່າງປະເທດ ຢູ່ຫວຽດນາມ ຈະມີຜົນສັກສິດແຕ່ວັນທີ 15 ສິງຫາ 2023. ນີ້ແມ່ນຈຸດເວລາທີ່ບັນດາວິສາຫະກິດທ່ອງທ່ຽວ ໄດ້ກະກຽມບັນດາຜະລິດຕະພັນທ່ອງທ່ຽວທີ່ເໝາະສົມ, ທັງໂຄສະນາເຜີຍແຜ່ເຖິງແຂກທ່ອງທ່ຽວສາກົນ.
ຄຳຮຸ່ງ
