ທີ່ການເຮັດວຽກ, ບັນດາຝ່າຍກໍ່ໄດ້ຊອກຮູ້ກ່ຽວກັບໂຄງປະກອບ, ການຈັດຕັ້ງ ແລະ ການເຄື່ອນໄຫວຂອງແຕ່ລະຝ່າຍ; ປຶກສາຫາລືກ່ຽວກັບສະພາບການທີ່ເກີດຂຶ້ນຕົວຈິງ. ບັນດາຫົວໜ່ວຍຂອງສານປະຊາຊົນສູງສຸດ ໄດ້ສະໜອງກ່ຽວກັບລະບຽບການ, ການແນະນຳ, ຄຳສັ່ງ… ຂອງສານຫວຽດນາມ ເພື່ອຊີ້ແຈ້ງບັນດາເນື້ອໃນທີ່ຄະນະສານປະຊາຊົນສູງສຸດລາວ ປາດຖະໜາຢາກຊອກຮູ້.
ເພື່ອແລກປ່ຽນຂໍ້ມູນຂ່າວສານ, ແບ່ງປັນປະສົບການໃນການດຳເນີນຄະດີ ແລະ ຄຸ້ມຄອງສານຢ່າງບໍ່ຢຸດຢັ້ງນັ້ນ, ສະຫາຍ ຮອງປະທານສານປະຊາຊົນສູງສຸດລາວ ບຸນຂວາງ ທະວີສັກ ຫວັງວ່າສານປະຊາຊົນສູງສຸດ ຫວຽດນາມ ຈະສືບຕໍ່ໃຫ້ການສະໜັບສະໜູນໂດຍຜ່ານການສົ່ງຜູ້ຊ່ຽວຊານໄປລາວ ເພື່ອແລກປ່ຽນປະສົບການ, ຫຼື ຕ້ອນຮັບຄະນະຜູ້ແທນລາວ ມາຍັງຫວຽດນາມ ເພື່ອຄົ້ນຄວ້າ ແລະ ຖອດຖອນບົດຮຽນໃນຂົງເຂດວຽກງານຂອງສານ.
 |
ເພີ່ມທະວີການແລກປ່ຽນ ແລະ ແບ່ງປັນປະສົບການລະຫວ່າງ ສານປະຊາຊົນສູງສຸດ ຫວຽດນາມ ແລະ ລາວ |
ການນໍາບັນດາຫົວໜ່ວຍສັງກັດສານປະຊາຊົນສູງສຸດຫວຽດນາມ ຢັ້ງຢືນພ້ອມແລ້ວທີ່ຈະຊ່ວຍເຫຼືອ, ຕອບບັນຫາທີ່ສານປະຊາຊົນສູງສຸດລາວ ມີຄວາມສົນໃຈ, ມີຄວາມປາດຖະໜາຢາກຊອກຮູ້.
ກ່ອນນີ້, ຄະນະພະນັກງານຊັ້ນສູງຂອງສານປະຊາຊົນສູງສຸດສາທາລະນະລັດ ປະຊາທິປະໄຕ ປະຊາຊົນລາວ ກໍ່ເຂົາຢ້ຽມຂ່ຳນັບການນໍາສານປະຊາຊົນສູງສຸດ ຫວຽດນາມ, ໄປຢ້ຽມຢາມສຳນັກງານສານປະຊາຊົນສູງສຸດ ຫວຽດນາມ ແລະ ເຮັດວຽກກັບສະຖາບັນການສານ.
ພາຍຫຼັງທີ່ເຊັນຂໍ້ຕົກລົງຮ່ວມມືລະຫວ່າງ ສານປະຊາຊົນສູງສຸດສອງປະເທດຫວຽດນາມ - ລາວ ວັນທີ 13 ສິງຫາ 2008, ບັນດາການເຄື່ອນໄຫວຮ່ວມມືຂອງສອງລະບົບສານໄດ້ຮັບການຜັນຂະຫຍາຍບົນພື້ນຖານຫຼັກການ ແລະ ການກຳນົດທິດທີ່ໄດ້ກຳນົດໄວ້ໃນຂໍ້ຕົກລົງຮ່ວມມື. ຂໍ້ຕົກລົງຮ່ວມມືໄດ້ກ່າວເຖິງເນື້ອໃນການຮ່ວມມືທີ່ມີລັກສະນະກຳນົດກອບໃຫ້ແກ່ທິດທາງການຮ່ວມມືໃນຂົງເຂດບຳລຸງສ້າງພະນັກງານ; ຈັດຕັ້ງການຄົ້ນຄວ້າ ແລະ ແລກປ່ຽນປະສົບການລະຫວ່າງຜູ້ພິພາກສາ ແລະ ເຈົ້າໜ້າທີ່ຂອງສອງລະບົບສານ.
ການເພີ່ມທະວີການພົວພັນຮ່ວມມື ໄດ້ ແລະ ຈະນຳມາເຊິ່ງຜົນປະໂຫຍດທີ່ລະອຽດ ແລະ ແທດຈິງໃຫ້ແກ່ລະບົບສານສອງປະເທດ ຫວຽດນາມ ແລະ ລາວ, ປະກອບສ່ວນຢ່າງຕັ້ງໜ້າເຂົ້າໃນການພັດທະນາລວມຂອງແຕ່ລະປະເທດ, ກໍ່ຄືການຮັດແໜ້ນສາຍພົວພັນຮ່ວມມືທີ່ເປັນມູນເຊື້ອລະຫວ່າງປະຊາຊົນສອງປະເທດ.
ບັນດາການເຄື່ອນໄຫວຮ່ວມມືລະຫວ່າງສອງລະບົບສານໄດ້ສະແດງໃຫ້ເຫັນໃນຂົງເຂດດັ່ງນີ້: ແລກປ່ຽນຄະນະປະຕິບັດງານ (ຂັ້ນສູນກາງ ແລະ ທ້ອງຖິ່ນ); ກອງປະຊຸມສານຂອງ 3 ປະເທດຫວຽດນາມ, ລາວ, ກໍາປູເຈຍ; ຝຶກອົບຮົມພະນັກງານສານປະຊາຊົນລາວ; ໂຄງການຍົກສູງກຳລັງຄວາມສາມາດໃຫ້ສານປະຊາຊົນລາວ; ຊ່ວຍສ້າງຕັ້ງສຳນັກງານບໍລິຫານ ແລະ ສ້າງລັດຖະດຳລັດລະບຽບການແກ້ໄຂຄະດີກ່ຽວກັບການບໍລິຫານ; ມອບຫຼຽນໄຊ ແລະ ໃບຍ້ອງຍໍໃຫ້ແກ່ຜູ້ພິພາກສາ ແລະ ພະນັກງານສານປະຊາຊົນຂອງສອງປະເທດ....
ຄຳຮຸ່ງ
