| ຊຸກຍູ້ການພົວພັນທາງການທູດເສດຖະກິດລະຫວ່າງຫວຽດນາມ ແລະ ທ້ອງຖິ່ນຂອງອາຟຼິກາໃຕ້ | |
| ຊຸກຍູ້ການຮ່ວມມືລະຫວ່າງກຳລັງປ້ອງກັນຄວາມສະຫງົບ ຫວຽດນາມ - ລາວ |
 |
| ທ່ານ ດັ້ງຮ່ວາງຢາງ ຫົວໜ້າຄະນະຜູ້ຕາງໜ້າຫວຽດນາມ ປະຈຳ ສປຊ (ພາບ: TTXVN) |
ກອງປະຊຸມສະມັດຊາໃຫຍ່ອົງການສະຫະປະຊາຊາດ (ສປຊ) ໄດ້ຮັບຮອງເອົາມະຕິວ່າດ້ວຍການຮຽກຮ້ອງໃຫ້ຄະນະຕຸລາການສານຍຸຕິທຳສາກົນ (ICJ) ຍົກອອກຄຳເຫັນປຶກສາຫາລືກ່ຽວກັບບັນຫາການປ່ຽນແປງຂອງດິນຟ້າອາກາດ ດ້ວຍຄວາມເຫັນດີເຫັນພ້ອມ.
ຕາມສຳນັກຂ່າວສານຫວຽດນາມ ປະຈຳ ສປຊ ແລ້ວ, ມະຕິໄດ້ຍື່ນສະເໜີຕາມຂໍ້ລິເລີ່ມຂອງ Vanuatu ແລະ ກຸ່ມຫຼັກແຫຼ່ງຂອງ 18 ປະເທດ, ໃນນັ້ນມີ ຫວຽດນາມ. ທ່ານເລຂາທິການໃຫຍ່ສະຫະປະຊາຊາດ ແລະ ນາຍົກລັດຖະມົນຕີ Vanuatu ໄດ້ເຂົ້າຮ່ວມ ແລະ ກ່າວຄຳເຫັນທີ່ກອງປະຊຸມ. ໃນຖານະເປັນຮອງປະທານສະພາສະຫະປະຊາຊາດ, ທ່ານເອກອັກຄະລັດຖະທູດ ດັ້ງຮ່ວາງຢາງ, ຫົວໜ້າຄະນະຜູ້ຕາງໜ້າຫວຽດນາມ ປະຈຳ ສປຊ ໄດ້ເປັນປະທານການປຶກສາຫາລື ແລະ ຮັບຮອງເອົາມະຕິດັ່ງກ່າວ.
ຕາມມະຕິດັ່ງກ່າວແລ້ວ, ບັນດາປະເທດສະມາຊິກສະຫະປະຊາຊາດຮຽກຮ້ອງໃຫ້ ICJ ມີຄຳເຫັນກ່ຽວກັບພັນທະຂອງບັນດາປະເທດຕາມກົດໝາຍສາກົນເພື່ອປົກປັກຮັກສາສິ່ງແວດລ້ອມ ຕ້ານການປ່ອຍອາຍພິດເຮືອນແກ້ວ, ກໍ່ຄືຄວາມຮັບຜິດຊອບດ້ານນິຕິກຳຂອງບັນດາປະເທດ ທີ່ໄດ້ສ້າງຜົນສະທ້ອນບໍ່ດີກ່ຽວກັບການປ່ຽນແປງຂອງດິນຟ້າອາກາດຕໍ່ຫຼາຍປະເທດອື່ນ. ດ້ວຍມະຕິດັ່ງກ່າວ, ICJ ຈະປະກອບຄວາມເຫັນທາງດ້ານກົດໝາຍກ່ຽວກັບການປ່ຽນແປງຂອງດິນຟ້າອາກາດ - ເປັນໜຶ່ງໃນບັນດາບັນຫາທີ່ຮີບດ່ວນທີ່ສຸດ ແລະ ໄດ້ປຶກສາຫາລືຢ່າງກວ້າງຂວາງໃນຫຼາຍເວທີປາໄສພາກພື້ນ ແລະ ສາກົນໃນປະຈຸບັນ. ເລື່ອງມະຕິດັ່ງກ່າວໄດ້ຮັບການສະໜັບສະໜູນຈາກ 132/193 ປະເທດສະມາຊິກສະຫະປະຊາຊາດ ແລະ ຜ່ານການເຫັນດີເປັນເອກະພາບ ສະແດງໃຫ້ເຫັນເຖິງການສະໜັບສະໜູນຢ່າງແຮງຂອງປະຊາຄົມໂລກກ່ຽວກັບບັນຫານີ້.
ບຸນຄົງ
