 |
| ການຖະແຫຼງຂ່າວຂອງສະພາທຸລະກິດ ອາເມລິກາ-ອາຊຽນ (USABC) (ພາບ: nhipsongkinhdoanh.vn) |
ຜູ້ຕາງໜ້າວິສາຫະກິດອາເມລິກາ 50 ກວ່າແຫ່ງໄດ້ຮັບຖືວ່າແມ່ນຄະນະປະຕິບັດງານໃຫຍ່ທີ່ສຸດນັບແຕ່ກ່ອນມາຮອດປັດຈຸບັນ ດ້ວຍກຸ່ມບໍລິສັດຫຼາຍແຫ່ງທີ່ມີຊື່ສຽງ ໃນຂົງເຂດດຳເນີນທຸລະກິດສຳຄັນຄື: ສາທາລະນະສຸກ, ເຕັກໂນໂລຢີ, ພະລັງງານ, ການເງິນ, ການທະນາຄານ, ລະບົບສະໜອງ, ການປ້ອງກັນຊາດ, ປ້ອງກັນຄວາມໝັ້ນຄົງ...ທີ່ໄດ້ມາ ຢ້ຽມຢາມ ແລະ ເຮັດວຽກພາຍໃຕ້ໂຄງການດັ່ງກ່າວ ແຕ່ວັນທີ 21 ຫາ 24 ມີນາ.
ນຳໜ້າຄະນະປະຕິບັດງານວິສາຫະກິດອາເມລິກາ ແມ່ນທ່ານອະດີດເອກອັກຄະລັດຖະທູດ Ted Osius, ປະທານ ແລະ ຜູ້ອຳນວຍການໃຫຍ່ສະພາທຸລະກິດ ອາເມລິກາ-ອາຊຽນ (USABC) ແລະ ອະດີດເອກອັກຄະລັດຖະທູດ Michael Michalak, ຮອງປະທານອາວຸໂສ ແລະ ຜູ້ອຳນວຍການຝ່າຍບໍລິຫານພາກພື້ນ USABC.
ທ່ານອະດີດເອກອັກຄະລັດຖະທູດ ອາເມລິກາ ປະຈຳ ຫວຽດນາມ Ted Osius ໃຫ້ຄຳເຫັນວ່າ: “ເຫດການນີ້ສະແດງໃຫ້ເຫັນຄວາມໄວ້ເນື້ອເຊື່ອໃຈຂອງວົງການວິສາຫະກິດ ອາເມລິກາ ຕໍ່ຫວຽດນາມ. ຫວຽດນາມ ມີນະໂຍບາຍຫັນເປັນຫຼາຍຮູບຫຼາຍແບບ. ກົງກັນຂ້າມ, VinFast ແລະ ບັນດາວິສາຫະກິດອື່ນໆຂອງຫວຽດນາມ ກໍ່ພວມລົງທຶນຢູ່ ສະຫະລັດ ອາເມລິກາ.
ທີ່ການຖະແຫຼງຂ່າວໃນຕອນບ່າຍວັນທີ 21 ມີນານີ້, ທ່ານເອກອັກຄະລັດຖະທູດອາເມລິກາ ປະຈຳຫວຽດນາມ Mark Knapper ໃຫ້ຮູ້ວ່າ: ນີ້ແມ່ນເຫດການສຳຄັນທີ່ໄດ້ຮັບຄວາມປະທັບໃຈທີ່ສຸດ ແລະ ເປັນຄັ້ງທຳອິດທີ່ມີເອກອັກຄະລັດຖະທູດອາເມລິກາ 3 ທ່ານເຂົ້າຮ່ວມ.
ທ່ານ Mark Knapper ກ່າວວ່າ: “ພວກຂ້າພະເຈົ້າເຫັນວ່າ ການພົວພັນລະຫວ່າງສອງປະເທດນັບມື້ນັບເລິກເຊິ່ງ, ການຄ້າອາເມລິກາ - ຫວຽດນາມ ໄດ້ຮັບການເຕີບໂຕທົບ 360 ເທື່ອນັບແຕ່ເວລາຫັນການພົວພັນສອງຝ່າຍເປັນປົກກະຕິ. ພວກຂ້າພະເຈົ້າຮູ້ສຶກພາກພູມໃຈຕໍ່ສິ່ງທີ່ສອງປະເທດບັນລຸໄດ້".
ທ່ານເອກອັກຄະລັດຖະທູດ Ted Osius ຢືນຢັນຕື່ມວ່າ: ເລື່ອງມີວິສາຫະກິດອາເມລິກາຫຼາຍແຫ່ງມາຫວຽດນາມ ອາດຖືໄດ້ວ່າແມ່ນສັນຍານຂອງການເຄື່ອນໄຫວລົງທຶນເຂົ້າອາຊຽນ. ປັດຈຸບັນ, ໂລກມີການເຕີບໂຕທີ່ຊັກຊ້າ, ແຕ່ຫວຽດນາມ ເຕີບໂຕກວ່າ 8%, ຫວຽດນາມແມ່ນສູນກາງການເຕີບໂຕ. ດັ່ງນັ້ນ ຈິ່ງມີຄວາມສົນໃຈຫຼາຍຢູ່ໃນພາກພື້ນທີ່ຟົດຟື້ນນີ້.
ທ່ານໃຫ້ຮູ້ວ່າຕື່ມອີກວ່າ ຫວ່າງມໍ່ໆມານີ້ ສະພາທຸລະກິດ ອາເມລິກາ ຫຍຸ້ງຄາກັບວຽກງານເປັນຈຳນວນຫຼາຍ ຍ້ອນວ່າ ວິສາຫະກິດອາເມລິກາຫຼາຍແຫ່ງມີຄວາມສົນໃຈໃນການມາລົງທຶນຢູ່ ຫວຽດນາມ. ສິບ ຊາວປີກ່ອນຫຼາຍປະເທດກ່າວວ່າ ເຂົາເຈົ້າຕ້ອງແກ້ງແຍ້ງກັບ ຫວຽດນາມ ແລະ ປັດຈຸບັນເຂົາເຈົ້າພວມຕິດຕາມ ຫວຽດນາມ.
"ໂລກລະບາດໂຄວິດ - 19 ຍູ້ໄວການຫັນເປັນດີຈີຕອນ, ເປີດກວ້າງກະແສລົງທຶນຂອງ ອາເມລິກາ ຢູ່ຫວຽດນາມ ໃນຂອບເຂດໂຄງການຂອງລັດຖະບານ ອາເມລິກາ ຈຳນວນໜຶ່ງຄື IPFF”, ທ່ານເອກອັກຄະລັດຖະທູດ ເຊື່ອວ່າ ພະຍາດໂຄວິດ - 19 ໄດ້ນຳກາລະໂອກາດລົງທຶນ ແລະ ສະແດງຄວາມເຊື່ອໝັ້ນວ່າ ຫວຽດນາມ ແລະ ອາເມລິກາ ອາດພ້ອມກັນເຕີບໂຕປັບຕົວໃຫ້ແທດເໝາະກັບລະບົບສະໜອງ, ສ້າງຕັ້ງສຳພັນທະມິດເພີ່ມທະວີຄວາມອຸດົມສົມບູນຂອງລະບົບສະໜອງ.
ທ່ານ ຫວູຕູແທັງ, ຮອງຜູ້ອຳນວຍການພາກພື້ນ USABC ໃຫ້ຮູ້ວ່າ ໃນການຢ້ຽມຢາມຄັ້ງນີ້ຂອງບັນດາບໍລິສັດແຖວໜ້າອາເມລິກາ, ຈະມີບັນດາການເຄື່ອນໄຫວສຳຄັນເພື່ອຊຸກຍູ້ການພົວພັນຮ່ວມມືເສດຖະກິດ, ການຄ້າລະຫວ່າງສອງປະເທດ. ໃນນັ້ນ ມີກອງປະຊຸມສຳມະນາກ່ຽວກັບຂັ້ນຕອນຊື້ຂາຍໃນຂົງເຂດປ້ອງກັນຊາດ ແລະ ການເຄື່ອນໄຫວຈຳນວນໜຶ່ງໃນການສະເຫຼີມສະຫຼອງ 10 ປີແຫ່ງວັນສອງປະເທດ ຫວຽດນາມ - ອາເມລິກາ ສ້າງຕັ້ງການພົວພັນຄູ່ຮ່ວມມືຮອບດ້ານ.
ບຸນຄົງ
