| ປະຊາຄົມຊາວຫວຽດນາມ ຢູ່ ໂປໂລຍ ສະເຫຼີມສະຫຼອງ 68 ປີແຫ່ງວັນປົດປ່ອຍນະຄອນຫຼວງ | |
| ຫວຽດນາມ ໄດ້ຮັບວັກຊີນກັນໂຄວິດ -19 ຫຼາຍກວ່າ 501.000 ໂດສ ໂດຍປະເທດໂປໂລຍອຸປະຖຳ |
ໃນຕອນບ່າຍວັນທີ 16 ມີນາ, ຢູ່ຮ່າໂນ້ຍ, ໃນການຕ້ອນຮັບທ່ານລັດຖະມົນຕີການຕ່າງປະເທດ ໂປໂລຍ Zbigniew Rau ພວມຢູ່ຢ້ຽມຢາມ ຫວຽດນາມ ຢ່າງເປັນທາງການແຕ່ວັນທີ 16 - 17 ມີນາ, ທ່ານນາຍົກລັດຖະມົນຕີຫວຽດນາມ ຟ້າມມິງຈິງ ສະເໜີໃຫ້ສອງຝ່າຍເພີ່ມທະວີການແລກປ່ຽນຄະນະຜູ້ແທນທຸກຂັ້ນ ເພື່ອແນໃສ່ເພີ່ມທະວີຄວາມໄວ້ເນື້ອເຊື່ອໃຈດ້ານການເມືອງ ແລະ ຄວາມເຂົ້າໃຈເຊິ່ງກັນ ແລະ ກັນ, ສ້າງພື້ນຖານເພື່ອຊຸກຍູ້ ແລະ ເປີດກວ້າງການຮ່ວມມືສອງຝ່າຍໃນທຸກຂົງເຂດ. ທ່ານນາຍົກລັດຖະມົນຕີປາດຖະໜາວ່າ ໂປໂລຍ ຈະສ້າງເງື່ອນໄຂສະດວກໃຫ້ຜະລິດຕະພັນຕ່າງໆຂອງ ຫວຽດນາມ ໄດ້ຈຳໜ່າຍຢູ່ຕະຫຼາດ ໂປໂລຍ ຫຼາຍກວ່າອີກ; ສົ່ງເສີມວິສາຫະກິດ ໂປໂປຍ ຍູ້ແຮງການລົງທຶນໃນຂົງເຂດການຢາ, ປຸງແຕ່ງອາຫານ, ອຸດສາຫະກຳປຸງແຕ່ງ… ທ່ານນາຍົກລັດຖະມົນຕີ ຟ້າມມິງຈິງ ສະເໜີໃຫ້ ໂປໂລຍ ໃຫ້ສັດຕະຍາບັນສັນຍາອາລັກຂາການລົງທຶນ ຫວຽດນາມ - ອີຢູ (EVIPA) ໂດຍໄວ ເພື່ອສ້າງເງື່ອນໄຂສະດວກໃຫ້ແກ່ການລົງທຶນຢ່າງສະເໝີພາບ, ຕ່າງຝ່າຍຕ່າງມີຜົນປະໂຫຍດລະຫວ່າງສອງປະເທດ.
 |
ທ່ານນາຍົກລັດຖະມົນຕີຫວຽດນາມ ຟ້າມມິງຈິງ ແລະ ທ່ານລັດຖະມົນຕີການຕ່າງປະເທດ ໂປໂລຍ Zbigniew Rau. (ພາບ: TTXVN) |
ທ່ານນາຍົກລັດຖະມົນຕີ ຫວຽດນາມ ແລະ ລັດຖະມົນຕີການຕ່າງປະເທດ ໂປໂລຍ ກໍເຫັນດີເປັນເອກະພາບນຳກັນວ່າ ສອງປະເທດຕ້ອງເພີ່ມທະວີການຮ່ວມມືໃນເວທີປາໄສຫຼາຍຝ່າຍ ແລະ ພາກພື້ນ. ກ່ຽວກັບບັນຫາທະເລຕາເວັນອອກ, ສອງຝ່າຍໄດ້ເນັ້ນໜັກເຖິງຄວາມສຳຄັນຂອງການຮັບປະກັນຄວາມໝັ້ນຄົງ, ຄວາມປອດໄພ, ສິດເສລີໃນການເດີນເຮືອ, ການບິນຢູ່ທະເລຕາເວັນອອກ ກໍຄື ແກ້ໄຂຂໍ້ຂັດແຍ້ງໂດຍສັນຕິວິທີບົນພື້ນຖານກົດໝາຍສາກົນ.
ຕອນເຊົ້າວັນດຽວກັນ, ທ່ານລັດຖະມົນຕີກະຊວງການຕ່າງປະເທດ ບຸຍແທັງເຊີນ ໄດ້ໃຫ້ການຕ້ອນຮັບ ແລະ ເຮັດວຽກກັບທ່ານລັດຖະມົນຕີການຕ່າງປະເທດ ໂປໂລຍ. ທ່ານລັດຖະມົນຕີ ບຸຍແທັງເຊີນໄດ້ຕີລາຄາສູງການຢ້ຽມຢາມຂອງທ່ານລັດຖະມົນຕີການຕ່າງປະເທດ ໂປໂລຍ Zbigniew Rau, ຖືວ່ານີ້ແມ່ນຂີດໝາຍສຳຄັນ ໃນການຊຸກຍູ້ການພັດທະນາສາຍພົວພັນມິດຕະພາບ ທີ່ເປັນມູນເຊື້ອອັນດີງາມ ແລະ ການຮ່ວມມືຫຼາຍດ້ານລະຫວ່າງ ຫວຽດນາມ - ໂປໂລຍ. ທ່ານລັດຖະມົນຕີ ໄດ້ຢືນຢັນວ່າ ຫວຽດນາມ ຍາມໃດກໍ່ຖືເປັນສຳຄັນ ແລະ ປາດຖະໜາຢາກເພີ່ມທະວີການພົວພັນຮ່ວມມືຫຼາຍດ້ານກັບ ໂປໂລຍ, ເປັນຄູ່ຮ່ວມມືໝູ່ເພື່ອນແບບດັ້ງເດີມຂອງ ຫວຽດນາມ ຢູ່ພາກພື້ນເອີລົບຕາເວັນອອກກາງ.
ໃນການພົບປະ, ສອງຝ່າຍເຫັນດີເພີ່ມທະວີການແລກປ່ຽນຄະນະຜູ້ແທນ ແລະ ສົມທົບກັນຢ່າງແໜ້ນແຟ້ນ ແລະ ສະໜັບສະໜູນເຊິ່ງກັນ ແລະ ກັນຢູ່ບັນດາເວທີປາໄສຫຼາຍຝ່າຍ ແລະ ສາກົນ, ໃນນັ້ນມີສະຫະປະຊາຊາດ, ASEM ແລະ ອາຊຽນ - EU...
 |
| ທ່ານລັດຖະມົນຕີກະຊວງການຕ່າງປະເທດ ບຸຍແທັງເຊີນ ແລະ ທ່ານລັດຖະມົນຕີການຕ່າງປະເທດ ໂປໂລຍ Zbigniew Rau. (ພາບ: TTXVN) |
ສອງຝ່າຍໄດ້ຕີລາຄາສູງວ່າ ໃນປະຈຸບັນ ໂປແລນ ແມ່ນຄູ່ຮ່ວມມືການຄ້າອັນດັບ 1 ຂອງ ຫວຽດນາມ ຢູ່ເອີລົບຕາເວັນອອກກາງ ແລະ ຫວຽດນາມ ແມ່ນຄູ່ຮ່ວມມືການຄ້າໃຫຍ່ອັນດັບ 4 ຂອງ ໂປໂລຍ ຢູ່ ອາຊີ.
ລັດຖະມົນຕີສອງທ່ານ ກໍ່ເຫັນດີເປັນເອກະພາບຊຸກຍູ້ການຮ່ວມມືລະຫວ່າງສອງປະເທດໃນຂົງເຂດສຶກສາ - ບຳລຸງສ້າງ, ກະສິກຳ, ຊັບພະຍາກອນທຳມະຊາດ - ສິ່ງແວດລ້ອມ, ວັດທະນະທຳ, ທ່ອງທ່ຽວ, ສາທາລະນະສຸກ, ເຕັກໂນໂລຊີຂໍ້ມູນຂ່າວສານ ແລະ ການອອກແຮງງານ...
ເນື່ອງໃນໂອກາດນີ້, ທ່ານລັດຖະມົນຕີ ບຸຍແທັງເຊີນ ໄດ້ຂອບອົກຂອບໃຈລັດຖະບານ ແລະ ປະຊາຊົນ ໂປໂລຍ ທີ່ໄດ້ມອບຢາວັກຊີນເກືອບ 1,4 ລ້ານໂດລາ ແລະ ເຄື່ອງອຸປະກອນການແພດ 8 ໂຕນ ໂດຍມີມູນຄ່າປະມານ 4 ລ້ານ USD ໃຫ້ ຫວຽດນາມ ເພື່ອຮັບມືກັບໂລກລະບາດ Covid – 19. ສອງຝ່າຍກໍ່ໄດ້ລົງນາມໃນສັນຍາຮ່ວມມືລະຫວ່າງ ສະຖາບັນການຕ່າງປະເທດຫວຽດນາມ ແລະ ສະຖາບັນການຕ່າງປະເທດໂປໂລຍ.
ຄຳຮຸ່ງ
