| ການເປີດສາຍກໍາປັ່ນທະເລເພື່ອເຊື່ອມຕໍ່ພາກກາງ ຫວຽດນາມ ແລະ ອິນເດຍ | |
| ຫວຽດນາມ ແລະ ອິນເດຍ ເພີ່ມທະວີການຮ່ວມມືໃນຫຼາຍຂົງເຂດ |
ຕາມສຳນັກຂ່າວສານຫວຽດນາມປະຈຳນິວເດລີແລ້ວ, ຕອນບ່າຍວັນທີ 22 ກຸມພາ, ສຳນັກງານການຄ້າຫວຽດນາມປະຈຳອິນເດຍ ໄດ້ສົມທົບກັບກົມສົ່ງເສີມການລົງທຶນແຫ່ງຊາດອິນເດຍ (Invest India) ແລະ ສະຫະພັນບັນດາອົງການສົ່ງອອກອິນເດຍ (FIEO), ສອງອົງການຂຶ້ນກັບກະຊວງອຸດສາຫະກຳ ແລະ ການຄ້າອິນເດຍ ໄດ້ຈັດຕັ້ງກອງປະຊຸມພົວພັນການຄ້າ ດ້ວຍຫົວຂໍ້ “ກາລະໂອກາດຮ່ວມມືດ້ານທຸລະກິດ ຫວຽດນາມ - ອິນເດຍ ກ່ຽວກັບຜະລິດຕະພັນກະເສດ ແລະ ອາຫານປຸງແຕ່ງ”. ຢູ່ທີ່ນີ້, ແນວຄວາມຄິດຮ່ວມມືໃໝ່ຫຼາຍຢ່າງ ໃນຂົງເຂດນີ້ ໄດ້ຖືກຊີ້ອອກໂດຍບັນດາຜູ້ຊ່ຽວຊານດ້ານອຸດສາຫະກໍາ.
 |
| ທ່ານຫງວຽນແທ່ງຫາຍ, ເອກອັກຄະລັດຖະທູດ ຫວຽດນາມ ປະຈຳ ອິນເດຍ. (ພາບ: TTXVN) |
ເຂົ້າຮ່ວມກອງປະຊຸມອອນລາຍ ມີທ່ານຫງວຽນແທ່ງຫາຍ, ເອກອັກຄະລັດຖະທູດ ຫວຽດນາມ ປະຈຳ ອິນເດຍ; ທ່ານປູ່ຍຈູງເທືອງ, ທີ່ປຶກສາການຄ້າຫວຽດນາມ ປະຈຳ ອິນເດຍ; ທ່ານ ເລແທງຮ່ວາ, ຮອງຫົວໜ້າກົມພັດທະນາຄຸນນະພາບ, ປຸງແຕ່ງ ແລະ ພັດທະນາຕະຫຼາດຜະລິດຕະພັນກະເສດ, ກະຊວງກະສິກຳ ແລະ ພັດທະນາຊົນນະບົດຫວຽດນາມ; ທ່ານ ດັ້ງຟຸກຫງວຽນ, ເລຂາທິການໃຫຍ່ສະມາຄົມຜັກ ແລະ ໝາກໄມ້ຫວຽດນາມ (Vinafruit); ທ່ານ Prashant Seth, ຮອງຜູ້ອໍານວຍການໃຫຍ່ FIEO; ທ່ານນາງ Kashika Malhotra ແລະ ທ່ານນາງ Shwetima Negi - ບັນດາຜູ້ຊ່ຽວຊານ Invest India ແລະ ຜູ້ຕາງໜ້າຫຼາຍກວ່າ 40 ວິສາຫະກິດຂອງ 2 ປະເທດ.
ກ່າວຄຳເຫັນທີ່ກອງປະຊຸມ, ທ່ານເອກອັກຄະລັດຖະທູດ ຫງວຽນແທງຫາຍ ໃຫ້ຮູ້ວ່າ: ອິນເດຍ ແລະ ຫວຽດນາມ ແມ່ນບັນດາປະເທດນຳໜ້າ ໃນຂົງເຂດກະສິກຳ ແລະ ສະບຽງອາຫານ. ຂະນະທີ່ການສົ່ງອອກກະສິກຳຂອງອິນເດຍໃນປີງົບປະມານ 2022 ເພີ່ມຂຶ້ນ 19,92%, ບັນລຸ 50,21 ຕື້ໂດລາ, ໃນເມື່ອການສົ່ງອອກສິນຄ້າກະສິກຳ, ປ່າໄມ້ ແລະ ການປະມົງຂອງຫວຽດນາມໃນປີດຽວກັນບັນລຸປະມານ 53,22 ຕື້ USD (ເພີ່ມຂຶ້ນ 9,9 3% ເມື່ອທຽບໃສ່ປີ 2021).
ອຸດສາຫະກໍາປຸງແຕ່ງສະບຽງອາຫານໃນປະເທດອິນເດຍກວມເອົາ 32% ຂອງຕະຫຼາດອາຫານອິນເດຍທັງຫມົດແລະ 14% ຂອງ GDP ການຜະລິດ. ຄາດຄະເນວ່າ, ຂະແໜງປຸງແຕ່ງສະບຽງອາຫານ ອິນເດຍ ມີຄວາມສາມາດດຶງດູດແຫຼ່ງທຶນລົງທຶນ 33 ຕື້ USD ໃນ 10 ປີຂ້າງໜ້າ.
ດ້ວຍຈຳນວນປະຊາກອນກວ່າ 1,4 ຕື້ຄົນ, ອິນເດຍ ແມ່ນຕະຫຼາດໃຫຍ່ ແລະ ມີຄວາມສາມາດບົ່ມຊ້ອນດ້ານຜະລິດຕະພັນກະເສດຂອງຫວຽດນາມ ແລະ ອາຫານປຸງແຕ່ງທີ່ຫຼາກຫຼາຍຄື: ໝາກໄມ້, ກາເຟ, ຊາ, ໝາກພິກໄທ, ໝາກມ່ວງຫິມະພານ, ໝາກໄຄ່, ໝາກອະງຸ່ນ, ໝາກນັດ, ຢາງພາລາ. ເຂົ້າໜົມ, ປາງາ, ປາບາຊາ, ຜະລິດຕະພັນທັນຍາພືດ...
ຄຳຮຸ່ງ
