| ວິສາຫະກິດ ຫວຽດນາມ - ອິນເດຍ ພົບປະ ແລະ ຊອກຫາກາລະໂອກາດດຳເນີນທຸລະກິດ | |
| ຊຸກຍູ້ການພົວພັນລະຫວ່າງພັກກອມມູນິດ ຫວຽດນາມ ແລະ ພັກກອມມູນິດ ອິນເດຍ ມາກຊິດ |
 |
| ບັນດາຜູ້ແທນເຂົ້າຮ່ວມກອງປະຊຸມທາງໄກ ເປີດສາຍກໍາປັ່ນທະເລເພື່ອເຊື່ອມຕໍ່ພາກກາງ ຫວຽດນາມ ກັບ ອິນເດຍ |
ໂດຍການກ່າວຄຳເຫັນທີ່ພິທີໄຂງານ, ທ່ານທີ່ປຶກສາ, ຫົວໜ້າອົງການການຄ້າ ສະຖານທູດ ຫວຽດນາມ ປະຈຳ ອິນເດຍ ບຸຍຈຸງເທື໋ອງ ໃຫ້ຮູ້ວ່າ ອິນເດຍ ແມ່ນຄູ່ຮ່ວມມືການຄ້າທີ່ຢືນອັນດັບ 8 ຂອງ ຫວຽດນາມ ແລະ ຄວາມສາມາດການຄ້າສອງຝ່າຍຈະບັນລຸຄາດໝາຍ 15 ຕື້ USD ໃນປີ 2022 - ປີສະເຫຼີມສະຫຼອງ 50 ປີແຫ່ງວັນສ້າງຕັ້ງການພົວພັນທາງການທູດລະຫວ່າງຫວຽດນາມ ແລະ ອິນເດຍ. ແຕ່ວ່າ, ຕາມທ່ານບຸຍຈຸງເທື໋ອງ, ເຖິງວ່າຄວາມສາມາດບົ່ມຊ້ອນດ້ານການຄ້າລະຫວ່າງສອງຝ່າຍມີຫຼາຍ, ແຕ່ໜຶ່ງໃນບັນດາສິ່ງກີດຂວາງແມ່ນການເຊື່ອມຕໍ່ການຄົມມະນາຄົມ, ພິເສດແມ່ນຂາດເສັ້ນທາງທະເລເພື່ອເຊື່ອມຕໍ່ໂດຍກົງລະຫວ່າງສອງປະເທດ. ສະນັ້ນ, ເສັ້ນທາງທະເລເຊື່ອມຕໍ່ພາກກາງ ຫວຽດນາມ ແລະ Kolkata, ອິນເດຍ ດຳເນີນໂດຍ VIMC ຈະເປີດກາລະໂອກາດໃນການຮ່ວມມືດ້ານທຸລະກິດອັນໃຫຍ່ຫຼວງໃຫ້ແກ່ບັນດາວິສາຫະກິດ ຫວຽດນາມ ແລະ ອິນເດຍ.
ໂດຍການກ່າວຄຳເຫັນທີ່ກອງປະຊຸມ, ທ່ານຮອງຜູ້ອຳນວຍການໃຫຍ່ VIMC ເລກວາງຈຸງ ຢືນຢັນວ່າ ໃນຍຸດທະສາດພັດທະນາຂອງຕົນ, VIMC ຕີລາຄາວ່າ ອິນເດຍ ແມ່ນໜຶ່ງໃນບັນດາຄູ່ຮ່ວມມືການຄ້າສຳຄັນຂອງ ຫວຽດນາມ. ໃນໄລຍະຜ່ານມາ, ຄ່າຂົນສົ່ງທາງທະເລໄດ້ເພີ່ມຂຶ້ນສູງ, ເຮັດໃຫ້ການເຄື່ອນໄຫວການຂົນສົ່ງຂອງໂລກເວົ້າລວມ ແລະ ຫວຽດນາມເວົ້າສະເພາະແມ່ນຖືກຜົນສະທ້ອນຢ່າງໜັກໜ່ວງ. ສະນັ້ນ, ເພື່ອຊອກຫາວິທີການແກ້ໄຂໃຫ້ແກ່ການເຄື່ອນໄຫວນຳເຂົ້າ ແລະ ສົ່ງອອກຂອງ ຫວຽດນາມ, VIMC ໄດ້ຜັນຂະຫຍາຍການຊອກຫາ, ການວິເຄາະຕະຫຼາດ, ການເຊື່ອມຕໍ່ ແລະ ການຜັນຂະຫຍາຍບັນດາເສັ້ນທາງທະເລໃໝ່ຢ່າງຕັ້ງໜ້າ ເພື່ອເຊື່ອມຕໍ່ຫວຽດນາມ ແລະ ບັນດາພາກພື້ນໃນທົ່ວໂລກ, ໃນນັ້ນມີ ອິນເດຍ.
ເດືອນພະຈິກ 2021, VIMC ໄດ້ສ້າງຕັ້ງເສັ້ນທາງຂົນສົ່ງຄອນເທນເນີ ເຊື່ອມຕໍ່ໂດຍກົງ ຫາຍຟ່ອງ - ມາເລເຊຍ - ອິນເດຍ ເພື່ອຫຼຸດຜ່ອນຄວາມກົດດັນຂອງການຂົນສົ່ງສິນຄ້າ ແລະ ສະຖຽນລະພາບການສະຫນອງການຂົນສົ່ງ, ຫນູນຊ່ວຍວິສາຫະກິດຢູ່ພາຍໃນປະເທດ.
ໂດຍສືບຕໍ່ຄວາມສຳເລັດນີ້, ແຕ່ເດືອນພຶດສະພາປີ 2022, VIMC ສືບຕໍ່ນຳກຳປັ່ນຄອນເທນເນີ 1.000 TEU ໄປຍັງ ເກືອລໍ່ - ເງ້ອ່ານ ແລ້ວຂົນສົ່ງສິນຄ້າໄປຍັງ ອິນເດຍ. ນີ້ແມ່ນເສັ້ນທາງທີ່ເຊື່ອມຕໍ່ໂດຍກົງລະຫວ່າງ ຫວຽດນາມ - ອິນເດຍ, ສະນັ້ນ ໄດ້ຊ່ວຍໃຫ້ຫຼຸດເວລາຂົນສົ່ງເມື່ອທຽບໃສ່ບັນດາເສັ້ນທາງໃນປະຈຸບັນທີ່ຕ້ອງການຢຸດຢູ່ຈຸດຄ່ຽນຖ່າຍ (14-15 ວັນເມື່ອທຽບກັບ 21-22 ວັນຂອງເສັ້ນທາງອື່ນ).
ທ່ານເອກອັກຄະລັດຖະທູດ ຫວຽດນາມ ປະຈຳ Bangladesh ຟ້າມຫວຽດຈ໋ຽນ ໄດ້ຊົມເຊີຍ VIMC ທີ່ໄດ້ເປີດເສັ້ນທາງທະເລເຊື່ອມຕໍ່ກັບ ອິນເດຍ ແລະ ເປົ້າໝາຍແມ່ນຂະຫຍາຍໄປຍັງ Bangladesh. ທ່ານສະແດງຄວາມປາດຖະໜາວ່າເສັ້ນທາງແຫ່ງນີ້ຈະຊຸກຍູ້ການເຄື່ອນໄຫວດ້ານການຄ້າ ຫວຽດນາມ - Bangladesh ທີ່ປັດຈຸບັນຍັງມີຄວາມສາມາດບົ່ມຊ້ອນຫລາຍຢ່າງ, ເຊິ່ງນຳຜົນປະໂຫຍດມາໃຫ້ແກ່ບໍລິສັດກໍາປັ່ນ ແລະ ວິສາຫະກິດຂອງສອງປະເທດ.
ທ່ານໄດ້ຢືນຢັນວ່າ ຝ່າຍສະຖານທູດ ຫວຽດນາມ ປະຈຳ Bangladesh ພ້ອມແລ້ວທີ່ຈະໜູນຊ່ວຍບັນດາວິສາຫະກິດ ຫວຽດນາມ ແລະ Bangladesh ໃນການເຊື່ອມຕໍ່ດໍາເນີນທຸລະກິດ, ການແບ່ງປັນຂໍ້ມູນທີ່ມີປະໂຫຍດ ແລະ ບັນດາກາລະໂອກາດດຳເນີນທຸລະກິດໃນການລົງທຶນລະຫວ່າງສອງປະເທດ.
ທ່ານ ໂດ໊ຈ້ອງ, ຮອງປະທານຫ້ອງການການຄ້າ ແລະ ອຸດສາຫະກຳ ຫວຽດນາມ - Bangladesh, ໃຫ້ຮູ້ວ່າ ໃນປີ 2021, ວົງເງິນການຄ້າສອງຝ່າຍ ຫວຽດນາມ - Bangladesh ໄດ້ເພີ່ມຂຶ້ນ 50% ເມື່ອທຽບໃສ່ປີ 2020, ຄາດວ່າປີ 2022 ວົງເງິນການຄ້າຈະເພີ່ມຂຶ້ນ 25% ເມື່ອທຽບໃສ່ປີ 2021 ແລະ ບັນລຸລະດັບ 1,5 ຕື້ USD (87% ແມ່ນຫວຽດນາມ ສົ່ງອອກໄປ Bangladesh, ໃນນັ້ນອຸປະກອນການກໍ່ສ້າງກວມເອົາປະມານ 20%).
ແຕ່ວ່າ, ຕົວເລກນີ້ຍັງບໍ່ຫຼາຍ ເມື່ອທຽບໃສ່ຂະໜາດຂອງຕະຫຼາດ Bangladesh (170 ລ້ານຄົນ), ສ່ວນໜຶ່ງກໍແມ່ນຍັງບໍ່ມີເສັ້ນທາງຂົນສົ່ງໂດຍກົງລະຫວ່າງສອງປະເທດ. ທ່ານຄອງຖ້າສາຍກຳປັ່ນທະເລເຊື່ອມຕໍ່ລະຫວ່າງ ຫວຽດນາມ ແລະ Bangladesh ຈະຊ່ວຍໃຫ້ບັນດາວິສາຫະກິດ ຫວຽດນາມ ທີ່ດຳເນີນທຸລະກິດຢູ່ Bangladesh ໄດ້ນຳໃຊ້ບັນດາບໍລິການຂອງ VIMC ດ້ວຍຄ່າໃຊ້ຈ່າຍທີ່ເໝາະສົມ ແລະ ເວລາຂົນສົ່ງຈະໄດ້ຫຼຸດສັ້ນກວ່າ. ທ່ານ ບຸຍກຽວຮືງ, ຜູ້ອຳນວຍການໃຫຍ່ບໍລິສັດຫຸ້ນສ່ວນທ່າກຳປັ່ນ ເງ້ຕິ໊ງ, ໃຫ້ຮູ້ວ່າ ຫົວໜ່ວຍຖືເປັນກຽດທີ່ໄດ້ເຂົ້າຮ່ວມການເຊື່ອມຕໍ່ການຂົນສົ່ງລະຫວ່າງ ຫວຽດນາມ ກັບ ອິນເດຍ ແລະ Banglades. ທ່ານກໍໃຫ້ຮູ້ວ່າ, ຕອນເຊົ້າວັນທີ 27 ກໍລະກົດນີ້, ກໍາປັ່ນຖ້ຽວທີສອງໄດ້ອອກຈາກທ່າກຳປັ່ນເພື່ອປະຕິບັດການເດີນທາງໄປຍັງອິນເດຍ. ໜ່ວຍງານໃຫ້ຄຳໝັ້ນສັນຍາວ່າ ຈະສະໜອງບໍລິການທີ່ດີທີ່ສຸດໃຫ້ແກ່ລູກຄ້າ ແລະ ຫວັງວ່າຈະໄດ້ຮັບການສະນັບສະໜູນຈາກບັນດາວິສາຫະກິດນຳເຂົ້າ - ສົ່ງອອກຂອງ ຫວຽດນາມ, ອິນເດຍ ແລະ Bangladesh.
ຫອມມາລາ
