 |
| ກອງປະຊຸມສຳມະນາການຮ່ວມມືກ່ຽວກັບເຕັກໂນໂລຢີການສຶກສາ ລະຫວ່າງອັງກິດ ແລະ ຫວຽດນາມ (ພາບ: Vietnam+) |
ຫວ່າງແລ້ວນີ້, ກອງປະຊຸມສຳມະນາການຮ່ວມມືກ່ຽວກັບເຕັກໂນໂລຢີການສຶກສາ ລະຫວ່າງອັງກິດ ແລະ ຫວຽດນາມ ໄດ້ຈັດຂຶ້ນຢູ່ຮ່າໂນ້ຍ. ກອງປະຊຸມສຳມະນາແມ່ນການເຄື່ອນໄຫວຍູ້ແຮງການເຄື່ອນໄຫວຮ່ວມມືໃນຂົງເຂດເຕັກໂນໂລຢີການສຶກສາ ລະຫ່ວາງສອງປະເທດ, ປະກອບສ່ວນເພີ່ມທະວີການວພົນພັນຮ່ວມມືຍຸດທະສາດ ລະຫວ່າງ ຫວຽດນາມ ແລະ ລາຊະອານາຈັກອັງກິດ ເນື່ອງໃນໂອກາດສະເຫຼີມສະຫຼອງ 50 ປີແຫ່ງການສ້າງຕັ້ງການພົວພັນການທູດໃນປີ 2023.
ກ່າວຄຳເຫັນທີ່ກອງປະຊຸມສຳມະນາ, ຮອງລັດຖະມົນຕີກະຊວງສຶກສາ ບຳລຸງສ້າງ ຫວຽດນາມ ຫງວຽນວັນຝຸກ ຢັ້ງຢືນວ່າ ຫວຽດນາມ ຍາມໃດກໍ່ຖືການສຶກສາແມ່ນລັດຖະນະໂຍບາຍແຖວໜ້າ. ທ່ານຮອງລັດຖະມົນຕີ ຫງວຽນວັນຟຸກ ໃຫ້ຮູ້ວ່າ: ຫວຽດນາມ ກຳນົດເປັນເຈົ້າການໃນການເຊື່ອມໂຍງກັບສາກົນກ່ຽວກັບການສຶກສາ, ຍູ້ແຮງການດຶງດູດການລົງທຶນຈາກຕ່າງປະເທດໃນຂົງເຂດການສຶກສາ ເພື່ອປະຕິບັດເປົ້າໝາຍສ້າງບາດກ້າວຫັນປ່ຽນຢ່າງແຮງໃນການພັດທະນາແຫຼ່ງບຸກຄະລາກອນ.
ດ້ວຍການກຳເນີດຂອງກົດໝາຍວ່າດ້ວຍການສຶກສາຊັ້ນສູງ ສະບັບປັບປຸງ, ເພີ່ມເຕີມໃນປີ 2018 ແລະ ກົດໝາຍວ່າດ້ານການສຶກສາໃນປີ 2019 ບັນດາຮາກຖານມະຫາວິທະຍາໄລຂອງ ຫວຽດນາມ ໄດ້ມີຄວາມເປັນເຈົ້າການໃນການຮ່ວມມືກັບສາກົນ. ໄປຄຽງຄູ່ກັນນັ້ນ, ມະຕິເລກທີ 86 ກຳນົດກ່ຽວກັບການຮ່ວມມືລົງທຶນຕ່າງປະເທດກໍ່ເປີດກາລະໂອກາດຮ່ວມມືຫຼາຍຢ່າງກັບ ຫວຽດນາມ ໃນຂົງເຂດການສຶກສາ. ມີໂຄງການບຳລຸງສ້າງເຊື່ອມຕໍ່ປະມານ 600 ໂຄງການລະຫວ່າງບັນດາຮາກຖານການສຶກສາຊັ້ນສູງຂອງ ຫວຽດນາມ ກັບບັນດາຮາກຖານການສຶກສາຕ່າງປະເທດ, ໃນນັ້ນມີ 90 ໂຄງການ ກັບບັນດາມະຫາວິທະຍາໄລ ອັງກິດ.
ໃນໄລຊະຜ່ານມາ, ຫວຽດນາມ ໄດ້ຕັ້ງໜ້າຊຸກຍູ້ການຮ່ວມມືດ້ານການສຶກສາກັບກ່ວາ 10 ປະເທດ ແລະ ເຂດແຄ້ວນ ແລະ ອົງການຈັດຕັ້ງສາກົນຄື SEAMEO, ASEAN, ASEM, APEC, UNESCO, UNICEF...
ໂດຍຕີລາຄາສູງພື້ນຖານການສຶກສາພັດທະນາຂອງລາຊະອານາຈັກອັງກິດ ກໍ່ຄືການພົວພັນຮ່ວມມືຍາວນານກັບຫວຽດນາມ, ທ່ານຮອງລັດຖະມົນຕີ ຫງວຽນວັນຟຸກ ເຊື່ອໝັ້ນວ່າ ກອງປະຊຸມສຳມະນາຈະກອບປະສ່ວນຍູ້ແຮງການເຄື່ອນໄຫວຮ່ວມມືໃນຂົງເຂດເຕັກໂນໂລຢີການສຶກສາ ລະຫວ່າງສອງປະເທດ, ປະກອບສ່ວນເພີ່ມທະວີການພົວພັນຮ່ວມມືຍຸດທະສາດລະຫວ່າງ ຫວຽດນາມ ແລະ ລາຊະອານາຈັກອັງກິດ ເນື່ອງໃນໂອກາດສະເຫຼີມສະຫຼອງ 50 ປີແຫ່ງການພົວພັນທາງການທູດ ໃນປີ 2023.
ແບ່ງປັນຢູ່ກອງປະຊຸມສຳມະນາ, ທ່ານເອກອັກຄະລັດຖະທູດ ລາຊະອານາຈັກອັງກິດ Ian Flew ຢູ່ ຫວຽດນາມ ຢັ້ງຢືນວ່າ ຫວຽດນາມ ແມ່ນໜຶ່ງໃນບັນດາບຸລິມະສິດແຖວໜ້າຂອງລາຊະອານາຈັກອັງກິດ ໃນການສ້າງການພົວພັນຄູ່ຮ່ວມມືການສຶກສາ.
ໂດຍສະແດງຄວາມຂອບໃຈຕໍ່ລັດຖະບານ ແລະ ກະຊວງການສຶກສາ ແລະ ບຳລຸງສ້າງ ຫວຽດນາມ ດ້ວຍບັນດາຄວາມມານະພະຍາຍາມໜູນຊ່ວຍຢ່າງຕໍ່ເນື່ອງໃນໄລຍະຜ່ານມາ, ທ່ານ Ian Flew ໃຫ້ຮູ້ວ່າ ສະຖານທູດ ອັງກິດຈະສືບຕໍ່ໜູນຊ່ວຍການສຶກສາ ຫວຽດນາມ ນຳໃຊ້ເຕັກໂນໂລຢີໃນການສິດສອນ ແລະ ການຮຽນຢ່າງມີປະສິດທິຜົນ.
ກອງປະຊຸມສຳມະນາໄດ້ຮັບຟັງບົດລາຍງານຂອງນັກຄົ້ນຄ້ວາ, ນັກຊ່ຽວຊານດ້ານການສຶກສາທີ່ມາຈາກຮາກຖານການສຶກສາມະຫາວິທະຍາໄລ, ອົງການຈັດຕັ້ງການສຶກສາ ຫວຽດນາມ ແລະ ຊາລະອານາຈັກອັງກິດ.
ດ້ວຍຫົວຂໍ້ “ເຕັກໂນໂລຢີການສຶກສາ”, ບັນດານັກຮຽນຮູ້ໄດ້ປຶກສາຫາລື ແລະ ແບ່ງປັນບົດຮຽນປະສົບການກ່ຽວກັບການຫັນເປັນດີຈີຕອນມໃນການສຶກສາຢູ່ຫວຽດນາມ ແລະ ລາຊະອານາຈັກອັງກິດ, ຄວາມຫຍຸ້ງຍາກ, ສິ່ງທ້າທາຍ, ວິທີການລາຊະອານາຈັກອັງກິດໜູນຊ່ວຍການຫັນເປັນດີຈີຕອນໃນການສຶກສາ ມະຫາວິທະຍາໄລຢູ່ ຫວຽດນາມ…
ບຸນຄົງ
