ໃນລະຫວ່າງວັນທີ 24-30 ພະຈິກ, ຄະນະສະຖານກົງສູນໃຫຍ່ຫວຽດນາມ ປະຈໍາ ນະຄອນປາກເຊ ແຂວງ ຈໍາປາສັກ ໄດ້ໄປອວຍພອນອົງຄະນະພັກ, ອໍານາດການປົກຄອງ ແລະ ປະຊາຊົນ 4 ແຂວງພາກໃຕ້ລາວ, ລວມມີ: ຈໍາປາສັກ, ອັດຕະປຶ, ເຊກອງ ແລະ ສາລະວັນ ເນື່ອງໃນໂອກາດສະເຫຼີມສະຫຼອງວັນຊາດແຫ່ງ ສປປ ລາວ ຄົບຮອບ 47 ປີ.
 |
ສະຖານກົງສູນໃຫຍ່ ຫວຽດນາມ ປະຈໍາ ປາກເຊ ຊົມເຊີຍວັນຊາດ ແຫ່ງ ສປປ ລາວ ຄົບຮອບ 47 ປີ.
ທີ່ບັນດາການພົບປະ, ສະຫາຍຫົວໜ້າສະຖານກົງສູນໃຫຍ່ ຫງວຽນວັນຈູງ ຕີລາຄາສູງ ແລະ ຊົມເຊີຍບັນດາຜົນງານເຊິ່ງປະເທດລາວ ຍາດມາໄດ້ໃນ ໄລຍະຜ່ານມາພາຍໃຕ້ການຊີ້ນໍາຂອງພັກປະຊາຊົນປະຕິວັດລາວ: ເອກະລາດ, ປະຊາທິປະໄຕ ແລະ ຜືນແຜ່ນດິນອັນຄົບຖ້ວນໄດ້ຮັບການຮັກສາໄວ້ຢ່າງໝັ້ນຄົງ; ການເມືອງ, ສັງຄົມມີສະຖຽນລະພາບ; ເສດຖະກິດຮັກສາທ່າເຕີບໂຕດີພໍສົມຄວນ, ບົດບາດ ແລະ ທີ່ຕັ້ງຂອງລາວ ຢູ່ພາກພື້ນ ແລະ ເວທີສາກົນນັບມື້ນັບໄດ້ຮັບ ການຍົກສູງ; ຫວນຄືນບັນດາໝາກຜົນທີ່ພົ້ນເດັ່ນເຊິ່ງສະຖານກົງສູນໃຫຍ່ ແລະ ອໍານາດການປົກຄອງບັນດາແຂວງພາກໃຕ້ລາວ ຜັນຂະຫຍາຍໃນປີ ສາມັກຄີມິດຕະພາບ 2022 ດ້ວຍບັນດາການເຄື່ອນໄຫວສະເຫຼີມສະຫຼອງ ດ້ວຍຫຼາຍຮູບແບບທີ່ສະຫງ່າລາສີ, ອຸດົມສົມບູນ ແລະ ແທດຈິງ; ສະແດງໃຫ້ເຫັນສາຍພົວພັນມິດຕະພາບທີ່ເປັນມູນເຊື້ອ, ນໍ້າໃຈສາມັກຄີແບບພິເສດ ແລະ ການຮ່ວມມືຮອບດ້ານຫວຽດນາມ-ລາວ ຢ່າງເລິກເຊິ່ງ, ອັນໄດ້ສ້າງຂີດໝາຍ, ປະກອບສ່ວນປັບປຸງ ແລະ ພັດທະທນາສາຍພົວພັນອັນດີງາມທີ່ມີຢູ່ແລ້ວລະຫວ່າງສອງປະເທດ.
ການນໍາ 4 ແຂວງພາກໃຕ້ລາວ ສະແດງຄວາມຂອບອົກຂອບໃຈມາຍັງພັກ, ລັດ ແລະ ປະຊາຊົນຫວຽດນາມ ທີ່ຍາມໃດກໍ່ໃຫ້ການຊ່ວຍເຫຼືອລັດ ແລະ ປະຊາຊົນ ລາວ, ທັງໃນສະໄໝຕໍ່ສູ້ກູ້ຊາດກໍ່ຄືໃນໄລຍະປົກປັກຮັກສາ ແລະ ພັດທະນາ ປະເທດຊາດໃນປະຈຸບັນ; ຢັ້ງຢືນວ່າ ຈະສືບຕໍ່ສົມທົບກັນຢ່າງແໜ້ນແຟ້ນກັບ ສະຖານກົງສູນໃຫຍ່ຜັນຂະຫຍາຍບັນດາເນື້ອໃນວຽກງານໃນໄລຍະຈະມາເຖິງ, ຜ່ານນັ້ນ ກໍປະກອບສ່ວນເພີ່ມທະວີການພົວພັນມິດຕະພາບແບບພິເສດ ລະຫວ່າງລາວ-ຫວຽດນາມ ກວ່າອີກ.
ບູນມີ
