ທ່ານນາຍົກລັດຖະມົນຕີ ຮຸນແຊນ ແລະທ່ານນາຍົກລັດຖະມົນຕີ ຟ້າມມິງຈີ໊ງ ທີ່ພິທີຕ້ອນຮັບ. ພາບ: Baochinhphu.vn
ທ່ານນາຍົກລັດຖະມົນຕີ ຮຸນແຊນ ແລະທ່ານນາຍົກລັດຖະມົນຕີ ຟ້າມມິງຈີ໊ງ ກວດແຖວກຽດຕິຍົດກອງທັບແຫ່ງລາຊະອານາຈັກ ກໍາປູເຈຍ. ພາບ: Baochinhphu.vn
ທີ່ການພົບປະ, ທ່ານນາຍົກລັດຖະມົນຕີ ຟ້າມມິງຈີ໊ງ ສະແດງຄວາມປິຕິຊົມຊື່ນເມື່ອເປັນຄັ້ງທໍາອິດໄດ້ໄປຢ້ຽມຢາມລາຊະອານາຈັກກໍາປູເຈຍ ຢ່າງເປັນທາງການ ໃນຖານະເປັນຜູ້ນຳໜ້າລັດຖະບານຫວຽດນາມ; ທ່ານນາຍົກລັດຖະມົນຕີ ໄດ້ສະແດງຄວາມຂອບໃຈກໍາປູເຈຍ ທີ່ໄດ້ສະຫຼະເວລາຕ້ອນຮັບຄະນະຜູ້ແທນຂັ້ນສູງຫວຽດນາມ ຢ່າງຈິງໃຈ ແລະອົບອຸ່ນ.
ຕີລາຄາສູງຕໍ່ການປະກອບສ່ວນ ແລະໝາກຜົນທີ່ຕັ້ງໜ້າຂອງກໍາປູເຈຍ ບັນລຸໄດ້ໃນຖານະເປັນປະທານອາຊຽນ 2022, ທ່ານນາຍົກລັດຖະມົນຕີ ຟ້າມມິງຈີ໊ງ ສະແດງຄວາມເຊື່ອໝັ້ນວ່າ ກໍາປູເຈຍ ຈະຈັດຕັ້ງສໍາເລັດກອງປະຊຸມສຸດຍອດອາຊຽນ ຄັ້ງທີ 40, 41 ແລະບັນດາກອງປະຊຸມທີ່ປິ່ນອ້ອມ ຢູ່ນະຄອນຫຼວງ ພະນົມເປັນ ໃນຊຸມວັນຈະມາເຖິງ.
ທ່ານນາຍົກລັດຖະມົນຕີ ຮຸນແຊນ ສະແດງຄວາມຍິນດີຕ້ອນຮັບທ່ານນາຍົກລັດຖະມົນຕີ ຟ້າມມິງຈີ໊ງ ມາຢ້ຽມຢາມກໍາປູເຈຍ ຢ່າງເປັນທາງການ ແລະເນັ້ນໜັກວ່າການຢ້ຽມຢາມມີຄວາມໝາຍສໍາຄັນໃນປີສະເຫຼີມສະຫຼອງ 55 ປີແຫ່ງວັນສ້າງຕັ້ງການພົວພັນທາງການທູດລະຫວ່າງສອງປະເທດ.
ທ່ານນາຍົກລັດຖະມົນຕີ ຟ້າມມິງຈີ໊ງ ພົບປະເຈລະຈາກັບທ່ານນາຍົກລັດຖະມົນຕີ ຮຸນແຊນ. ພາບ: Baochinhphu.vn
ນາຍົກລັດຖະມົນຕີສອງທ່ານ ໄດ້ສະແດງຄວາມເພິ່ງພໍໃຈກ່ຽວກັບການພັດທະນາຂອງການພົວພັນຫວຽດນາມ-ກໍາປູເຈຍ ໃນໄລຍະຜ່ານມາ. ຜ່ານຜ່າອຸປະສັກ, ສິ່ງກີດຂວາງຈາກໂລກລະບາດ, ການພົວພັນດ້ານການເມືອງ-ການທູດລະຫວ່າງສອງປະເທດ ຍັງໄດ້ຮັບການປັບປຸງຢ່າງບໍ່ຢຸດຢັ້ງ, ນັບມື້ສະໜິດຕິດພັນ, ມີຄວາມໄວ້ເນື້ອເຊື່ອໃຈຜ່ານການຮັກສາການພົບປະ, ແລກປ່ຽນຄະນະຜູ້ແທນຂັ້ນສູງເປັນປະຈໍາໃນທຸກຊ່ອງທາງ, ເສີມຂະຫຍາຍບັນດາກົນໄກຮ່ວມມືສອງຝ່າຍຢ່າງມີປະສິດທິຜົນ.
ຕີລາຄາສູງຕໍ່ເລື່ອງສອງປະເທດ ສົມທົບກັນຈັດຕັ້ງສໍາເລັດການເຄື່ອນໄຫວສະເຫຼີມສະຫຼອງທີ່ມີຄວາມໝາຍໃນຂອບເຂດ “ປີມິດຕະພາບ ຫວຽດນາມ-ກໍາປູເຈຍ, ກໍາປູເຈຍ-ຫວຽດນາມ 2022”, ການນໍາສອງທ່ານ ໄດ້ຢັ້ງຢືນເຖິງການຕັດສິນໃຈປັບປຸງ ແລະພັດທະນາການພົວພັນຖານບ້ານໃກ້ເຮືອນຄຽງທີ່ດີງາມ, ມິດຕະພາບທີ່ເປັນມູນເຊື້ອ, ການຮ່ວມມືຮອບດ້ານ, ຍືນຍົງຍາວນານລະຫວ່າງຫວຽດນາມ ແລະກໍາປູເຈຍ ກວ່າອີກ, ເພື່ອນໍາການຮ່ວມມືສອງຝ່າຍໃຫ້ນັບມື້ເຂົ້າສູ່ ລວງເລິກ, ແທດຈິງ ແລະມີປະສິດທິຜົນ, ຖືສິ່ງນັ້ນແມ່ນຄວາມຮຽກຮ້ອງຕ້ອງການພາວະວິໄສທີ່ຈໍາເປັນຕໍ່ທັງສອງປະເທດ.
ສອງຝ່າຍເຫັນດີສືບຕໍ່ເພີ່ມທະວີການຮ່ວມມືດ້ານປ້ອງກັນຊາດ ແລະປ້ອງກັນຄວາມສະຫງົບ, ເນັ້ນໜັກເຖິງຫຼັກການບໍ່ອະນຸຍາດໃຫ້ກໍາລັງປໍລະປັກໃດໆ ນໍາໃຊ້ຜືນແຜ່ນດິນຂອງປະເທດນີ້ເພື່ອກໍ່ຄວາມເສຍຫາຍຕໍ່ຄວາມໝັ້ນຄົງ ແລະຜົນປະໂຫຍດຂອງປະເທດອື່ນ; ຢັ້ງຢືນການສົມທົບກັນຜັນຂະຫຍາຍບັນດາຂໍ້ຕົກລົງ, ກົນໄກທີ່ມີໃນປັດຈຸບັນຢ່າງມີປະສິດທິຜົນ ແນໃສ່ຮັກສາສະຖຽນລະພາບດ້ານການເມືອງ, ຄວາມສະຫງົບ, ຄວາມເປັນລະບຽບຮຽບຮ້ອຍ, ຄວາມປອດໄພໃນສັງຄົມຢູ່ແຕ່ລະປະເທດ, ສະກັດກັ້ນອາດຊະຍາກໍາຂ້າມຊາດປະເພດຕ່າງໆ ເປັນຕົ້ນແມ່ນການຄ້າມະນຸດ, ຂົນສົ່ງ ແລະຄ້າຂາຍຢາເສບຕິດ, ຍູ້ແຮງການຮ່ວມມືຮັບປະກັນຄວາມໝັ້ນຄົງທາງເຄືອຂ່າຍອິນເຕີແນັດ, ປົກປ້ອງພົນລະເມືອງ...
ກ່ຽວກັບວຽກງານຊາຍແດນ, ສອງຝ່າຍເຫັນດີເຄົາລົບ ແລະປະຕິບັດບັນດາສົນທິສັນຍາກ່ຽວກັບຊາຍແດນທີ່ໄດ້ລົງນາມລະຫວ່າງສອງປະເທດຢ່າງຄົບຖ້ວນ, ສືບຕໍ່ຊຸກຍູ້ການເຈລະຈາ, ພ້ອມກັນມານະພະຍາຍາມຊອກຫາມາດຕະການທີ່ສົມເຫດສົມຜົນຕໍ່ກັບເສັ້ນຊາຍແດນທາງບົກ 16% ທີ່ຍັງບໍ່ທັນຂີດເສັ້ນປັກຫຼັກໝາຍຊາຍແດນສຳເລັດ; ພ້ອມທັງແກ້ໄຂບັນດາບັນຫາທີ່ເກີດຂຶ້ນໃໝ່ບົນເນື້ອໃນຈິດໃຈສາມັກຄີ, ມິດຕະພາບ, ປະກອບສ່ວນສ້າງເສັ້ນຊາຍແດນ ຫວຽດນາມ-ກໍາປູເຈຍ ໃຫ້ມີສັນຕິພາບ, ສະຖຽນລະພາບ ແລະຮ່ວມມື.
ໂອກາດນີ້, ທ່ານນາຍົກລັດຖະມົນຕີ ຟ້າມມິງຈີ໊ງ ສະແດງຄວາມຂອບໃຈ ແລະຫວັງວ່າຝ່າຍກໍາປູເຈຍ ຈະສືບຕໍ່ເອົາໃຈໃສ່, ສ້າງເງື່ອນໄຂສະດວກກວ່າອີກໃຫ້ແກ່ປະຊາຄົມຊາວຫວຽດນາມ ໄດ້ດໍາລົງຊີວິດ, ເຮັດວຽກເປັນປົກກະຕິ ແລະຖືກຕ້ອງຕາມກົດໝາຍ ຢູ່ກໍາປູເຈຍ, ເຊື່ອມຕົວ ແລະປະກອບສ່ວນຢ່າງຕັ້ງໜ້າເຂົ້າໃນການພັດທະນາເສດຖະກິດ-ສັງຄົມຂອງປະເທດປະຈໍາຖິ່ນ, ປະກອບສ່ວນສະໜິດຕິດພັນ ແລະຮັດແໜ້ນການພົວພັນຖານບ້ານໃກ້ເຮືອນຄຽງມິດຕະພາບລະຫວ່າງສອງຊາດ.
ສອງຝ່າຍໄດ້ເນັ້ນໜັກເຖິງຄວາມສໍາຄັນຂອງການຮັບປະກັນຄວາມໝັ້ນຄົງ, ຄວາມປອດໄພ, ຄວາມເສລີໃນການເດີນເຮືອ, ການບິນ, ເພີ່ມທະວີຄວາມໄວ້ເນື້ອເຊື່ອໃຈ, ບໍ່ນາບຂູ່ ຫຼື ນໍາໃຊ້ກໍາລັງອາວຸດ, ປະຕິບັດຕາມກົດໝາຍສາກົນ, ແກ້ໄຂການຂັດແຍ້ງກັນໂດຍສັນຕິວິທີ, ບົນພື້ນຖານກົດໝາຍສາກົນ, ໃນນັ້ນມີສົນທິສັນຍາຂອງ ສປຊ ກ່ຽວກັບກົດໝາຍວ່າດ້ວຍທະເລ (UNCLOS) ປີ 1982; ສະໜັບສະໜູນບັນດາຝ່າຍປະຕິບັດຖະແຫຼງການວ່າດ້ວຍການປະພຶດຂອງບັນດາຝ່າຍຢູ່ທະເລຕາເວັນອອກ (DOC) ຢ່າງເຂັ້ມງວດ, ຄົບຖ້ວນ ກໍຄື ຊຸກຍູ້ການສ້າງກົດແຫ່ງການປະພຶດຢູ່ທະເລຕາເວັນອອກ (COC) ໃຫ້ມີປະສິດທິພາບ, ມີປະສິດທິຜົນ, ແທດຈິງ, ສອດຄ່ອງກັບກົດໝາຍສາກົນ, ໃນນັ້ນມີ UNCLOS 1982.
ນາຍົກລັດຖະມົນຕີ ສອງທ່ານ ເປັນສັກຂີພິຍານພິທີລົງນາມເອກະສານລະຫວ່າງສອງປະເທດ. ພາບ: Baochinhphu.vn
ໂອກາດນີ້, ທ່ານນາຍົກລັດຖະມົນຕີ ຟ້າມມິງຈີ໊ງ ຍັງໄດ້ເຊື້ອເຊີນທ່ານນາຍົກລັດຖະມົນຕີ ຮຸນແຊນ ໄປຢ້ຽມຢາມ ສສ ຫວຽດນາມ ໃນໂອກາດທີ່ເໝາະສົມ. ທ່ານນາຍົກລັດຖະມົນຕີ ຮຸນແຊນ ຕອບຮັບດ້ວຍຄວາມຍິນດີ.
ພາຍຫຼັງການພົບປະເຈລະຈາ, ນາຍົກລັດຖະມົນຕີສອງທ່ານ ໄດ້ເປັນສັກຂີພິຍານພິທີເຊັນເອກະສານລະຫວ່າງສອງປະເທດ ຈໍານວນ 11 ສະບັບ.
ກອງທັບ
