| ຟາມໝາກມອນໃນເຂດຊານເມືອງຂອງຮ່າໂນ້ຍ - ເປັນແຫຼ່ງທ່ອງທ່ຽວແບບນິເວດທີ່ຈັບອົກຈັບໃຈໃນຕົ້ນລະດູແລ້ງ | |
| ທ່ານເລຂາຄະນະພັກນະຄອນຮ່າໂນ້ຍ ໄດ້ໃຫ້ການຕ້ອນຮັບທ່ານເອກອັກຄະລັດຖະທູດ ຍີ່ປຸ່ນ ປະຈຳ ຫວຽດນາມ Yamada Takio |
ເຂົ້າຮ່ວມກະແສສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານຫວຽດນາມ - ລາວ, ລາວ - ຫວຽດນາມ, ນະຄອນຫຼວງຮ່າໂນ້ຍ ແລະ ທ້ອງຖິ່ນຕ່າງໆຂອງລາວ, ໃນນັ້ນມີນະຄອນຫຼວງວຽງຈັນ, ໄດ້ມານະພະຍາຍາມກໍ່ສ້າງ ແລະ ເພີ່ມພູນຄູນສ້າງສາຍພົວພັນມິດຕະພາບແຫ່ງສາຍຈິດມິດໃຈອັນເລິກເຊິ່ງ, ຮ່ວມເດີນທາງພັດທະນາ.
ທີ່ການເຮັດວຽກຫຼາຍຄັ້ງ, ຜູ້ຕາງໜ້າການນຳສອງນະຄອນຫຼວງຢືນຢັນວ່າ, ເຖິງວ່າແຕ່ລະຝ່າຍມີສາຍພົວພັນສາກົນທີ່ກ້ວາງຂວາງກັບຫຼາຍນະຄອນໃຫຍ່ໃນໂລກ, ແຕ່ຮ່າໂນ້ຍ ແລະ ວຽງຈັນ ຍາມໃດກໍ່ສະຫງວນບຸລິມະສິດອັນສູງສູດໃນການພັດທະນາການພົວພັນມິດຕະພາບ ແລະ ການຮ່ວມມືກັນ. ໝາກຜົນຂອງການຮ່ວມມືບໍ່ພຽງແຕ່ປະກອບສ່ວນເຂົ້າໃນການພັດທະນາຢ່າງເຂັ້ມແຂງຂອງສອງນະຄອນຫຼວງເທົ່ານັ້ນຫາກຍັງແມ່ນພະຍານຫຼັກຖານຢ່າງລະອຽດ, ເລິກເຊິ່ງ, ປະກອບສ່ວນສຳຄັນເຂົ້າໃນການຮັກສາ ແລະ ພັດທະນາສາຍພົວພັນມິດຕະພາບທີ່ເປັນມູນເຊື້ອແບບພິເສດລະຫວ່າງສອງພັກ, ສອງລັດ ແລະ ປະຊາຊົນສອງປະເທດຫວຽດນາມ-ລາວ.
ເມື່ອເບິ່ງຄືນການເຄື່ອນໄຫວພັດທະນາລະຫວ່າງສອງຝ່າຍໃນໄລຍະຜ່ານມາ, ເຫັນໄດ້ວ່າການພົວພັນຮ່ວມມືລະຫວ່າງສອງນະຄອນຫຼວງເວົ້າສະເພາະ ແລະ ຮ່າໂນ້ຍ ກັບບັນດາທ້ອງຖິ່ນຂອງລາວເວົ້າລວມ ໄດ້ຮັບການຮັດແໜ້ນ ແລະ ພັດທະນາຢ່າງບໍ່ຢຸດຢັ້ງ ໃນບັນດາໂຄງການໃນຫຼາຍຂົງເຂດຄື: ເສດຖະກິດ, ສາທາລະນະສຸກ, ການສຶກສາ, ກະສິກຳ, ການທະຫານ, ການແລກປ່ຽນປະຊາຊົນ...
ຮ່າໂນ້ຍ ໄດ້ສະຫງວນຄວາມມານະພະຍາຍາມສູງສຸດ ເພື່ອຮ່ວມເດີນທາງ, ໜູນຊ່ວຍນະຄອນຫຼວງວຽງຈັນ ກໍ່ສ້າງຫຼາຍກິດຈະການ ແລະ ໂຄງການທີ່ມີຄວາມໝາຍທາງສັງຄົມຢ່າງເລິກເຊິ່ງ, ເປັນສັນຍາລັກແຫ່ງສາຍພົວພັນອັນດີງາມຂອງສອງນະຄອນຫຼວງຄື: ໂຮງຮຽນການເມືອງ - ການປົກຄອງ ນະຄອນຫຼວງວຽງຈັນ, ຫໍມູນເຊື້ອກອງບັນຊາການທະຫານນະຄອນຫຼວງວຽງຈັນ. ໂຄງການຮ່ວມມືໜູນຊ່ວຍການພັດທະນາກະສິກຳ. ສອງຝ່າຍສະຫງວນການສະໜັບສະໜູນ ແລະ ສ້າງເງື່ອນໄຂໃຫ້ບັນດາພະແນກ, ຂະແໜງການ, ອົງການທີ່ກ່ຽວຂ້ອງຂອງສອງປະເທດຜັນຂະຫຍາຍການຮ່ວມມື, ພ້ອມກັນນັ້ນກໍຮັກສາ ແລະ ຍູ້ແຮງການພົວພັນການທູດປະຊາຊົນ, ການພົບປະແລກປ່ຽນວັດທະນະທຳ...
ການພົວພັນຢ່າງເລິກເຊິ່ງລະຫວ່າງ ຮ່າໂນ້ຍ ກັບບັນດາທ້ອງຖິ່ນຂອງປະເທດເພື່ອນລາວສືບຕໍ່ໄດ້ຮັບການຮັກສາ ແລະ ພັດທະນາ ເຖິງແມ່ນໃນສະພາບການແຜ່ລະບາດຂອງພະຍາດໂຄວິດ-19 ກໍ່ຕາມ. ໃນສະພາບການທີ່ຫຍຸ້ງຍາກລວມ, ສອງນະຄອນຫຼວງຍາມໃດກໍ່ໃຫ້ຄວາມເອົາໃຈໃສ່, ຊຸກຍູ້ ແລະ ລະດົມກໍາລັງໃຈເຊິ່ງກັນ ແລະ ກັນຢ່າງທັນການ. ອົງຄະນະພັກ, ອໍານາດການປົກຄອງ ແລະ ປະຊາຊົນນະຄອນຫຼວງວຽງຈັນ ໄດ້ໜູນຊ່ວຍ ຮ່າໂນ້ຍ ດ້ວຍຈຳນວນ 15.000 ໂດລາສະຫະລັດ ເພື່ອຮັບໃຊ້ວຽກງານປ້ອງກັນ, ຕ້ານໂລກລະບາດ. ນະຄອນ ຮ່າໂນ້ຍ ກໍ່ໄດ້ມອບຜ້າອັດປາກ-ດັງ 30.000 ອັນ; ຊຸດກວດຫາເຊື້ອ SARS-CoV-2 10.000 ຊຸດ ແລະ 40.000 ໂດລາສະຫະລັດໃຫ້ນະຄອນຫຼວງວຽງຈັນ; ໜູນຊ່ວຍ 8 ແຂວງພາກເໜືອຂອງລາວ 20.000 ໂດລາສະຫະລັດ ຕໍ່ແຂວງ.
ໄລ່ສະເພາະແຕ່ປີ 1998 ມາຮອດປະຈຸບັນ, ຮ່າໂນ້ຍ ແລະ ບັນດາທ້ອງຖິ່ນຂອງປະເທດລາວ, ພົ້ນເດັ່ນແມ່ນນະຄອນຫຼວງວຽງຈັນ ແລະ ຫຼວງພະບາງ, ໄດ້ລົງນາມໃນບົດບັນທຶກຊ່ວຍຈຳ ແລະ ຂໍ້ຕົກລົງຮ່ວມມືເກືອບ 20 ສະບັບ. ການນຳຂັ້ນສູງຮ່າໂນ້ຍ ແລະ ບັນດາທ້ອງຖິ່ນຂອງລາວ ໄດ້ມາຢ້ຽມຢາມ ແລະ ເຮັດວຽກເປັນປະຈຳ, ທັງຕີລາຄາໝາກຜົນ ແລະ ວາງອອກທິດທາງການຮ່ວມມືໃໝ່.
ໃນການຢ້ຽມຢາມ ແລະ ເຮັດວຽກຂອງທ່ານເລຂາພັກນະຄອນຮ່າໂນ້ຍ ດິ່ງຕຽນຢຸງ ຢູ່ວຽງຈັນ ໃນຕົ້ນເດືອນເມສາ 2022, ສອງຝ່າຍໄດ້ເຫັນດີເປັນເອກະພາບສູງກ່ຽວກັບທິດທາງການຮ່ວມມື ແລະ ພ້ອມກັນລົງນາມໃນບົດບັນທຶກຂໍ້ຕົກລົງຮ່ວມມື ໄລຍະ 2022-2025 ເຊິ່ງເປັນພື້ນຖານໃຫ້ແກ່ການເຄື່ອນໄຫວຮ່ວມມືລະອຽດຂອງສອງຝ່າຍໃນໄລຍະຈະມາເຖິງ.
 |
| ພິທີລົງນາມໃນບົດບັນທຶກຂໍ້ຕົກລົງຮ່ວມມືໄລຍະ 2022-2025 ລະຫວ່າງນະຄອນຫຼວງວຽງຈັນ (ລາວ) ແລະ ນະຄອນຫຼວງຮ່າໂນ້ຍ (ຫວຽດນາມ) ໃນເດືອນ ເມສາ 2022 (ພາບ: ຮ່າຫວູ). |
ບັນດາບົດຊີ້ແຈ້ງກ່ຽວກັບເນື້ອໃນລະອຽດຂອງແຕ່ລະຂົງເຂດການຮ່ວມມືທີ່ໄດ້ຮັບການສ້າງໂດຍອີງໃສ່ຄວາມຕ້ອງການ ແລະ ຄວາມສາມາດຂອງສອງນະຄອນຫຼວງ; ບັນດາບັນຫາຈຸດສຸມໃນການພັດທະນາ ແລະ ບຸລິມະສິດໃນການແບ່ງປັນປະສົບການທີ່ຝ່າຍວຽງຈັນ ສະເໜີເຊັ່ນ: ການເງິນສາທາລະນະ, ການຮ່ວມມືດ້ານປ້ອງກັນຊາດ-ປ້ອງກັນຄວາມສະຫງົບ ແລະ ການສະກັດກັ້ນ, ຕ້ານຢາເສບຕິດ, ການເຄື່ອນໄຫວຂອງອົງການປະຊາຊົນເລືອກຕັ້ງ, ວຽກງານການກໍ່ສ້າງພັກ ແລະ ກົນໄກເຄື່ອນໄຫວຂອງອົງຄະນະພັກຂັ້ນນະຄອນ...
ນອກຈາກບັນດາເນື້ອໃນທີ່ມີລັກສະນະກໍານົດທິດທາງແລ້ວ, ຈຸດພົ້ນເດັ່ນຂອງບົດບັນທຶກຂໍ້ຕົກລົງຮ່ວມມືສະບັບນີ້ແມ່ນມີບາງຂໍ້ສະເພາະ, ສາມາດຈັດຕັ້ງຜັນຂະຫຍາຍໄດ້ທັນທີ ພາຍຫຼັງການລົງນາມເຊັ່ນ: ຂໍ້ຕົກລົງກ່ຽວກັບທຶນສຶກສາ; ການຮ່ວມມືລະຫວ່າງບັນດາອົງການສະເພາະຄື ຄະນະກຳມະການແນວໂຮມປະເທດຊາດຫວຽດນາມ ຢູ່ນະຄອນ ຮ່າໂນ້ຍ ແລະ ຄະນະກຳມະການແນວລາວສ້າງຊາດນະຄອນຫຼວງວຽງຈັນ; ລະຫວ່າງຄະນະຊາວໜຸ່ມນະຄອນຮ່າໂນ້ຍ ແລະ ຄະນະຊາວໜຸ່ມ ນະຄອນຫຼວງວຽງຈັນ...
ບົນພື້ນຖານບົດບັນທຶກຄວາມຊ່ວຍຈໍາກ່ຽວກັບການຮ່ວມມື, ບັນດາຫົວໜ່ວຍທີ່ກ່ຽວຂ້ອງຂອງສອງນະຄອນຫຼວງ ໄດ້ເປັນເຈົ້າການ, ຕັ້ງໜ້າ, ສົມທົບກັນຢ່າງແໜ້ນແຟ້ນ ເພື່ອຜັນຂະຫຍາຍຫຼາຍການຍເຄື່ອນໄຫວລະອຽດ, ພົ້ນເດັ່ນ ຄື: ແລກປ່ຽນຄະນະຜູ້ແທນຂັ້ນສູງ ແລະ ຮາກຖານ, ເປີດກວ້າງຮູບແບບການຮ່ວມມືໜູນຊ່ວຍການພັດທະນາກະສິກຳ; ພົບປະແລກປ່ຽນແບ່ງປັນປະສົບການໃນການສ້າງສະຖາບັນຄົ້ນຄວ້າ ແລະ ພັດທະນາເສດຖະກິດ-ສັງຄົມ ນະຄອນຫຼວງວຽງຈັນ; ນະຄອນຫຼວງຮ່າໂນ້ຍໜູນຊ່ວຍກໍ່ສ້າງຫໍມູນເຊື້ອກອງບັນຊາການທະຫານນະຄອນຫຼວງວຽງຈັນ, ສະໜອງທຶນສຶກສາໃຫ້ແກ່ນັກຮຽນ, ໜູນຊ່ວຍການບຳລຸງສ້າງພະນັກງານ, ນັກສຶກສາຂອງນະຄອນຫຼວງວຽງຈັນ ໄດ້ມາຮ່ຳຮຽນ.
ໃນໄລຍະຈະມາເຖິງ, ຮ່າໂນ້ຍ - ວຽງຈັນ ຈະຜັນຂະຫຍາຍບັນດາການເຄື່ອນໄຫວ ເພື່ອແນໃສ່ຊຸກຍູ້ການພົວພັນຮ່ວມມືລະຫວ່າງສອງນະຄອນໃຫ້ແທດຈິງ, ມີປະສິດທິຜົນ ແລະ ເຂົ້າສູ່ລວງເລິກກວ່າອີກ; ສືບຕໍ່ເປີດກວ້າງໄລຍະພັດທະນາໃໝ່, ຂະຫຍັນຂັນເຄື່ອນເພື່ອຜົນປະໂຫຍດຂອງປະຊາຊົນແຕ່ລະປະເທດ; ເພື່ອສັນຕິພາບ, ສະຖຽນລະພາບ ແລະ ຄວາມວັດທະນາຖາວອນລວມຂອງພາກພື້ນ.
ບູນມີ
