ຕອນບ່າຍວັນທີ 9 ສິງຫາ ທີ່ຮ່າໂນ້ຍ, ກ່າວຄໍາເຫັນທີ່ການຕ້ອນຮັບທ່ານນາງ Pauline Tamasis ຜູ້ປະສານງານຂອງສະຫະປະຊາຊາດ ປະຈໍາ ສສ ຫວຽດນາມ ຄົນໃໝ່, ທ່ານພົນເອກ ໂຕເລິມ ລັດຖະມົນຕີກະຊວງຕໍາຫຼວດຫວຽດນາມ ໃຫ້ຮູ້ວ່າໃນປີນີ້ ກະຊວງຕໍາຫຼວດຫວຽດນາມ ຈະສົ່ງພະນັກງານເຂົ້າຮ່ວມການເຄື່ອນໄຫວຮັກສາສັນຕິພາບຂອງ ສປຊ, ໃນນັ້ນຮັບປະກັນອັດຕາສ່ວນລະຫວ່າງເພດຕາມຂໍ້ສະເໜີແນະຂອງ ສປຊ; ພ້ອມທັງເນັ້ນໜັກວ່າ ນີ້ແມ່ນພັນທະສາກົນທີ່ສໍາຄັນ, ມີລັກສະນະປະຈໍາ, ຍາວນານຂອງກໍາລັງຕໍາຫຼວດປະຊາຊົນຫວຽດນາມ.
 |
| ທ່ານລັດຖະມົນຕີ ໂຕເລິມ ຕ້ອນຮັບທ່ານນາງ Pauline Tamasis ຜູ້ປະສານງານຂອງສະຫະປະຊາຊາດ ປະຈໍາ ສສ ຫວຽດນາມ. ພາບ: ຫວຽດເກື່ອງ. |
ທ່ານລັດຖະມົນຕີ ໂຕເລິມ ສະເໜີຕໍ່ທ່ານນາງ Pauline Tamasis ວ່າ ໃນໄລຍະຈະມາເຖິງຈະສືບຕໍ່ສ້າງເງື່ອນໄຂໃຫ້ແກ່ການຮ່ວມມືລະຫວ່າງບັນດາອົງການຂອງສະຫະປະຊາຊາດ ແລະກະຊວງຕໍາຫຼວດຫວຽດນາມ. ໜູນຊ່ວຍພາຫະນະອຸປະກອນ, ຍົກສູງກໍາລັງຄວາມສາມາດສະກັດກັ້ນ ແລະຕ້ານອາດຊະຍາກໍາຂ້າມຊາດໃຫ້ແກ່ກະຊວງຕໍາຫຼວດຫວຽດນາມ ໃນຂົງເຂດ, ຄື: ສະກັດກັ້ນ ແລະຕ້ານອາດຊະຍາກໍາຢາເສບຕິດ, ອາດຊະຍາກໍາສໍ້ລາດບັງຫຼວງ, ອາດຊະຍາກໍາການຄ້າມະນຸດ, ອາດຊະຍາກໍາຟອກເງິນ, ຕ້ານການກໍ່ການຮ້າຍ.
ທ່ານລັດຖະມົນຕີ ໂຕເລິມ ປາດຖະໜາວ່າ ສປຊ ຈະສືບຕໍ່ສະໜັບສະໜູນຫວຽດນາມ ອອກສະໝັກເລືອກຕັ້ງເປັນສະມາຊິກສະພາສິດທິມະນຸດ ສປຊ ສະໄໝ 2023-2025, ສະໜັບສະໜູນຫວຽດນາມ ໃນຖານະເປັນຮອງປະທານສະມັດຊາໃຫຍ່ ສປຊ.
ສ່ວນທ່ານນາງ Pauline Tamasis ຢັ້ງຢືນວ່າ ຈະມານະພະຍາຍາມຈົນສຸດຄວາມສາມາດຂອງຕົນເພື່ອຊຸກຍູ້ການພົວພັນຮ່ວມມືລະຫວ່າງ ສປຊ ແລະຫວຽດນາມ ເວົ້າລວມ, ລະຫວ່າງ ສປຊ ແລະກະຊວງຕໍາຫຼວດຫວຽດນາມ ເວົ້າສະເພາະໃຫ້ນັບມື້ນັບປັບປຸງ ແລະພັດທະນາຂຶ້ນສູ່ລະດັບສູງໃໝ່.
ກອງທັບ
