| ກວາງຫງາຍ ເຂົ້າຮ່ວມການສົ່ງເສີມການຄ້າ, ການລົງທຶນ ແລະ ການຮ່ວມມືຢູ່ ຍີ່ປຸ່ນ | |
| ຫວຽດນາມ ປາດຖະໜາຢາກເພີ່ມທະວີການຮ່ວມມືຫຼາຍດ້ານກັບຮຸງກາລີ |
 |
| ພິທີລົງນາມລະຫວ່າງສອງຝ່າຍ |
ກ່າວຄຳເຫັນທີ່ກອງປະຊຸມ, ທ່ານ ຮສ.ປອ. ຟ້າມມິງຕ໋ວນ, ຫົວໜ້າບັນນາທິການໃຫຍ່ສຳນັກພິມຈຳໜ່າຍການເມືອງແຫ່ງຊາດຊື້ເທິດ ຢືນຢັນວ່າ: ການພິມຈຳໜ່າຍປຶ້ມແມ່ນຮັບໃຊ້ການຜັນຂະຫຍາຍແຜນນະໂຍບາຍ, ແນວທາງຂອງພັກ, ນະໂຍບາຍກົດໝາຍຂອງລັດກ່ຽວກັບການເຄື່ອນໄຫວທາງການທູດປະຊາຊົນ, ປະກອບສ່ວນເພີ່ມທະວີ ແລະ ເປີດກວ້າງການພົວພັນມິດຕະພາບທີ່ເປັນມູນເຊື້ອກັບປະຊາຊົນບັນດາປະເທດ, ຍົກສູງພາບພົດ ແລະ ທີ່ຕັ້ງສາກົນຂອງຫວຽດນາມ.
ໃນຊຸມປີມໍ່ໆມານີ້, ສຳນັກພິມຈຳໜ່າຍການເມືອງແຫ່ງຊາດຊື້ເທິດໄດ້ຈັດຕັ້ງຮຽບຮຽງ, ພິມຈຳໜ່າຍ ແລະ ນຳສະເໜີໃຫ້ທ່ານຜູ້ອ່ານດ້ວຍເອກະສານທີ່ມີຄ່າຫຼາຍສະບັບຂອງບັນດາການນຳຂອງພັກ, ລັດ, ຄະນະກຳມະການການຕ່າງປະເທດສູນກາງ, ກະຊວງການຕ່າງປະເທດ, ບັນດາອົງການການເມືອງສັງຄົມ, ນັກວິທະຍາສາດ ແລະ ບັນດາຜູ້ຊ່ຽວຊານດ້ານການທູດຂອງພັກ, ການທູດແຫ່ງລັດ, ການທູດປະຊາຊົນ ເຊິ່ງລ້ວນແຕ່ໄດຮັບການຕີລາຄາສູງຈາກຜູ້ອ່ານ.
ເນັ້ນໜັກວ່າ VUFO ແມ່ນອົງການໜຶ່ງທີ່ເຮັດວຽກດ້ານການເມືອງພົວພັນຕ່າງປະເທດ ແລະ ເປັນພາກສ່ວນໜຶ່ງຂອງກຳລັງການຕ່າງປະເທດວິຊາສະເພາະຂອງຫວຽດນາມ, ທ່ານ ຮສ.ປອ. ຟ້າມມິງຕວນ ເຊື່ອໝັ້ນວ່າ, ການລົງນາມໃນບົດບັນທຶກການຮ່ວມມືລະຫວ່າງສຳນັກພິມຈຳໜ່າຍ ແລະ VUFO ຈະຊ່ວຍໃຫ້ 2 ອົງການຍົກສູງຄວາມສາມາດບົ່ມຊ້ອນ, ກຳລັງແຮງ, ໜູນຊ່ວຍເຊິ່ງກັນແລະກັນ ເພື່ອປະຕິບັດໜ້າທີ່ການເມືອງທີ່ໄດ້ຮັບການມອບໝາຍ.
ເພື່ອໃຫ້ໂຄງການຮ່ວມມືລະຫວ່າງສອງຝ່າຍໄດ້ຮັບການປະຕິບັດຢ່າງຕັ້ງໜ້າ ແລະ ມີປະສິດທິຜົນ, ທ່ານ ຮສ.ປອ. ຟ້າມມິງຕວນ ກໍ່ສະເໜີບັນດາຫົວໜ່ວຍທີ່ໄດ້ຮັບການມອບໝາຍເປັນຜູ້ເຊື່ອມຕໍ່, ສ້າງແຜນການສົມທົບກັນຢ່າງລະອຽດໃນປີ 2022 ແລະ ຍື່ນສະເໜີໃຫ້ບັນດາການນຳຂອງ 2 ອົງການຮັບຮອງເອົາ ແລະ ຜັນຂະຫຍາຍ.
ກ່າວຄຳເຫັນທີ່ພິທີ, ທ່ານນາງປະທານ VUFO ຫງວຽນເຟືອງງາ ກໍ່ຖືວ່າ: ພິທີລົງນາມໃນບົດບັນທຶກຊ່ວຍຈຳແມ່ນຂີດໝາຍສຳຄັນ, ແມ່ນຈຸດເລີ່ມຕົ້ນຂອງການພົວພັນຮ່ວມມືໄລຍະຍາວລະຫວ່າງ 2 ອົງການ.
ທ່ານນາງ ຫງວຽນເຟືອງງາ ຢືນຢັນວ່າ: “ສຳນັກພິມຈຳໜ່າຍການເມືອງແຫ່ງຊາດຊື້ເທິດແມ່ນ “ປີກນົກ” ຂອງຂະແໜງການພິມຈຳໜ່າຍຫວຽດນາມ, ແມ່ນຫົວໜ່ວຍຫຼັກແຫຼ່ງໃນການພິມຈຳໜ່າຍປື້ມດ້ານການເມືອງ, ທິດສະດີ, ກົດໝາຍ ແລະ ແນວຄິດ ໂຮ່ຈິມິນ.
ຂ້າພະເຈົ້າເຊື່ອໝັ້ນວ່າ ການຮ່ວມມືລະຫວ່າງສຳນັກພິມຈຳໜ່າຍ ແລະ ອົງການສະເພາະກິດການຕ່າງປະເທດຂອງປະຊາຊົນຄື VUFO ຈະປະກອບສ່ວນໂຄສະນາວັດທະນະທຳທີ່ເປັນເອກະລັກສະເພາະຂອງຫວຽດນາມອອກສູ່ໂລກ ແລະ ຮັບເອົາແບບມີການເລືອກເຟັ້ນສິ່ງຢອດຢ້ຽມດ້ານວັດທະນະທຳຂອງບັນດາປະເທດ ຜ່ານບັນດາເອກະສານຂອງສຳນັກພິມຈຳໜ່າຍ, ປະກອບສ່ວນເພີ່ມທະວີຄວາມເຂົ້າໃຈເຊິ່ງກັນແລະກັນລະຫວ່າງປະຊາຊົນຫວຽດນາມ ແລະ ປະຊາຊົນໃນໂລກ”.
ຕາມທ່ານນາງປະທານ VUFO ແລ້ວ, ພິທີລົງນາມໃນບົດບັນທຶກຊ່ວຍຈຳແມ່ນຈຸດເລີ່ມຕົ້ນໃໝ່ໃຫ້ແກ່ການພົວພັນຮ່ວມມືຢ່າງແໜ້ນແຟ້ນລະຫວ່າງ VUFO ແລະ ສຳນັກພິມຈຳໜ່າຍຄວາມຈິງການເມືອງແຫ່ງຊາດໃນໄລຍະຈະມາເຖິງ.
2 ຝ່າຍຈະສຸມໃສ່ບັນດາເນື້ອໃນທີ່ເປັນກຳລັງແຮງຂອງແຕ່ລະຝ່າຍ ເຊັ່ນ: ການແລກປ່ຽນຂໍ້ມູນຂ່າວສານ, ການຮ່ວມມືໃນຂົງເຂດໂຄສະນາເຜີຍແຜ່, ສົມທົບກັນຈັດຕັ້ງບັນດາກອງປະຊຸມ, ກອງປະຊຸມສຳມະນາ, ເວທີປາໄສວິທະຍາສາດ; ຄົ້ນຄວ້າ, ສັງລວມ, ແກ້ໄຂ, ຕີລາຄາ, ປັບປຸງ, ພິມຈຳໜ່າຍປື້ມ ແລະ ເອກະສານຕ່າງໆ ຮັບໃຊ້ໃຫ້ຄຳປຶກສາ ແລະ ຄົ້ນຄວ້າວຽກງານການເຄື່ອນໄຫວການທູດປະຊາຊົນ.
ບຸນຄົງ
