| ຫວຽດນາມ ຢາກເພີ່ມທະວີການພົວພັນຮ່ວມມືຫຼາຍດ້ານກັບ ຮຸງກາຣີ | |
| ມອບຫຼຽນໄຊມິດຕະພາບໃຫ້ ທ່ານ Ory Csaba ເອກອັກຄະລັດຖະທູດ ຮຸງກາຣີ ປະຈຳ ຫວຽດນາມ |
 |
| ທ່ານປະທານປະເທດ ຫງວຽນຊວນຟຸກໃຫ້ ຕ້ອນຮັບທ່ານເອກອັກຄະລັດຖະທູດ ຮຸງກາຣີ Ory Csaba (ພາບ: TTXVN) |
ຕອນບ່າຍວັນທີ 28 ກໍລະກົດ, ຢູ່ຮ່າໂນ້ຍ, ທີ່ການຕ້ອນຮັບທ່ານເອກອັກຄະລັດຖະທູດ ຮຸງກາຣີ Ory Csaba ເຂົ້າຢ້ຽມອຳລາເນື່ອງໃນໂອກາດສິ້ນສຸດອາຍຸການເຮັດວຽກຢູ່ຫວຽດນາມ, ທ່ານປະທານປະເທດ ຫງວຽນຊວນຟຸກ ຕີລາຄາສູງບັນດາການປະກອບສ່ວນຢ່າງຕັ້ງໜ້າຂອງທ່ານເອກອັກຄະລັດຖະທູດ ເພື່ອແນໃສ່ຊຸກຍູ້ການພົວພັນລະຫວ່າງສອງປະເທດ. ທ່ານປະທານປະເທດຢືນຢັນວ່າ ຫວຽດນາມ ຍາມໃດກໍ່ຖືເປັນສຳຄັນ ແລະ ປາດຖະໜາຢາກເພີ່ມທະວີການພົວພັນຮ່ວມມືຫຼາຍດ້ານກັບ ຮຸງກາຣີ - ຄູ່ຮ່ວມມືຮອບດ້ານທຳອິດຂອງ ຫວຽດນາມ ໃນບັນດາເພື່ອນມິດທີ່ເປັນມູນເຊື້ອຢູ່ເອີລົບຕາເວັນອອກກາງ.
ທ່ານປະທານປະເທດ ຫງວຽນຊວນຟຸກ ຕີລາຄາສູງທີ່ ຮຸງກາຣີ ຖື ຫວຽດນາມ ແມ່ນຄູ່ຮ່ວມມືບຸລິມະສິດໃນນະໂຍບາຍໜູນຊ່ວຍການພັດທະນາສາກົນ (ODA) ດ້ວຍຄຳໝັ້ນສັນຍາບ້ວງເງິນກູ້ 440 ລ້ານເອີໂຣ ເພື່ອຜັນຂະຫຍາຍບັນດາໂຄງການໃນບັນດາຂົງເຂດຮ່ວມມືບຸລິມະສິດຂອງ 2 ປະເທດ, ແບບຢ່າງຄືໂຮງໝໍກ້ອນເບົ້າ ເກິນເທີ, ພວມໄດ້ຮັບການປະຕິບັດຢ່າງຕັ້ງໜ້າ. ທ່ານປະທານປະເທດກໍ່ໃຫ້ຮູ້ວ່າ, ຮຸງກາຣີ ໄດ້ມອບທຶນສຶກສາ 200 ທຶນໃຫ້ແກ່ນັກສຶກສາຫວຽດນາມ ໃນແຕ່ລະປີ, ປະກອບສ່ວນບຳລຸງສ້າງແຫຼ່ງຊັບພະຍາກອນມະນຸດທີ່ມີຄຸນນະພາບສູງ ໂດຍກະຊວງສຶກສາ ແລະ ບຳລຸງສ້າງ ຫວຽດນາມ ນຳໃຊ້ຢ່າງເຖິງຖອງ ແລະ ມີປະສິດທິຜົນ. ຫວຽດນາມ ກໍ່ພວມສ້າງຄວາມສະດວກໃຫ້ແກ່ການສ້າງຕັ້ງສູນວັດທະນະທຳ ແລະ ປະຊາຄົມຊາວຮຸງກາຣີ ຢູ່ ຮ່າໂນ້ຍ ໂດຍໄວ, ເພື່ອເປັນຂົວຕໍ່ໃຫ້ແກ່ການແລກປ່ຽນປະຊາຊົນລະຫວ່າງ 2 ປະເທດ.
ບຸນຄົງ
