| VUFO ແລະ ສະຖານທູດ ກາຊັກສະຖານ ປະຈຳ ຫວຽດນາມ ສືບຕໍ່ຊຸກຍູ້ການທູດປະຊາຊົນ | |
| ນັກກິລາປະເທດຕ່າງໆ ເຂົ້າຮ່ວມ ຊີເກມ ຄັ້ງທີ 31 ຢ້ຽມຊົມບັນດາສະຖານທີ່ທ່ອງທ່ຽວທີ່ມີຊື່ສຽງຂອງຫວຽດນາມ |
 |
| ສະຖານທູດ ຫວຽດນາມ ໄດ້ປະສົບຜົນສຳເລັດດີເລີດ ໃນວາລະດຳລົງຕຳແໜ່ງເປັນປະທານຄະນະກຳມະການ ອາຊຽນ ທີ່ Prague ( ພາບ: ສະຖານທູດ ຫວຽດນາມ ປະຈໍາ ເຊັກ) |
ທີ່ກອງປະຊຸມດັ່ງກ່າວ ມີການເຂົ້າຮ່ວມຂອງບັນດາທ່ານເອກອັກຄະລັດຖະທູດ ແລະ ຜູ້ຕາງໜ້າບັນດາສະຖານທູດຂອງຄະນະກຳມະການອາຊຽນ ປະຈຳ Prague ລວມມີ: ໄທ, ອິນໂດເນເຊຍ, ມາເລເຊຍ, ມຽນມາ, ຟີລິບປິນ.
ໃນການເປັນປະທານກອງປະຊຸມ, ທ່ານ ເອກອັກຄະລັດຖະທູດ ຜູ້ມີອຳນາດເຕັມ ແຫ່ງ ສສ.ຫວຽດນາມ ປະຈຳ ສາທາລະນະລັດ ເຊັກ ທ໋າຍຊວນຢູງ ໄດ້ສຸມໃສ່ປຶກສາຫາລືກ່ຽວກັບບັນດາບັນຫາສຳຄັນ ລວມມີ: ລາຍງານສັງລວມບັນດາຈຸດເດັ່ນຂອງສະພາບການເມືອງ, ເສດຖະກິດ - ສັງຄົມ, ການຕ່າງປະເທດ ແລະ ການປ້ອງກັນປະເທດ ສາທາລະນະລັດ ເຊັກ ໃນ 6 ເດືອນຕົ້ນປີ 2022; ລາຍງານສະພາບການພັດທະນາຂອງບັນດາປະເທດອາຊຽນ; ຕີລາຄາໝາກຜົນຂອງການເຄື່ອນໄຫວທົ່ວໄປຂອງ ACP ໃນວາລະດຳລົງຕຳແໜ່ງເປັນປະທານ ACP ຂອງ ຫວຽດນາມ ແລະ ສະເໜີບັນດາແຜນການເຄື່ອນໄຫວໃນ ເຄິ່ງທ້າຍປີ 2022.
ທ່ານເອກອັກຄະລັດຖະທູດບັນດາປະເທດ ອາຊຽນ ກໍຕີລາຄາສູງບັນດາການເຄື່ອນໄຫວອັນອຸດົມສົມບູນ ແລະ ມີປະສິດທິຜົນສູງຂອງ ACP ໃນວາລະດໍາລົງຕໍາແໜ່ງເປັນປະທານຂອງສະຖານທູດ ຫວຽດນາມ, ພິເສດແມ່ນຈິດໃຈຕັ້ງໜ້າ, ເປັນເຈົ້າການ ແລະ ຄວາມມານະພະຍາຍາມຂອງສະຖານທູດ ຫວຽດນາມ ເມື່ອຊຸກຍູ້ບັນດາການເຄື່ອນໄຫວມິດຕະພາບ ແລະ ການຮ່ວມມື ລະຫວ່າງບັນດາປະເທດ ອາຊຽນ ກັບເພື່ອນມິດປະຈໍາຖິ່ນ ແລະ ຕ່າງປະເທດຢ່າງທັນການ ພາຍຫຼັງທີ່ຢຸດສະງັກມາເປັນເວລາດົນ ຍ້ອນພະຍາດໂຄວິດ-19.
ໃນສະພາບທີ່ ເຊັກ ດໍາລົງຕໍາແໜ່ງເປັນປະທານໝູນວຽນຂອງສະຫະພາບ ເອີລົບ (EU) ໃນ 6 ເດືອນທ້າຍປີ 2022, ບັນດາຂໍ້ລິເລີ່ມການເປີດກວ້າງ ແລະ ເພີ່ມທະວີການພົວພັນລະຫວ່າງ ອາຊຽນ ແລະ ເຊັກ ໄດ້ປະກອບສ່ວນສຳຄັນເຂົ້າໃນການໂຄສະນາ ແລະ ຍົກສູງຄວາມຮູ້ກ່ຽວກັບ ອາຊຽນ ຢູ່ ເຊັກ, ເພີ່ມກາລະໂອກາດຮ່ວມມືພ້ອມກັນພັດທະນາ. ຕາງໜ້າບັນດາປະເທດ ອາຊຽນ ກໍສົ່ງຄໍາຊົມເຊີຍມາຍັງ ຫວຽດນາມ ທີ່ໄດ້ປະສົບຜົນສຳເລັດດີເລີດໃນບົດບາດດໍາລົງຕໍາແໜ່ງເປັນປະທານ ACP ໃນ 6 ເດືອນຕົ້ນປີ 2022.
ພິທີມອບຮັບແມ່ນໄດ້ດໍາເນີນພາຍຫຼັງພິທີສະຫຼຸບ. ທ່ານເອກອັກຄະລັດຖະທູດ ທ໋າຍຊວນຢູງ ໄດ້ລົງນາມໃນບົດບັນທຶກການມອບ ຕໍາແໜ່ງປະທານ ACP ໃຫ້ທ່ານເອກອັກຄະລັດຖະທູດ ອິນໂດເນເຊຍ Kenssy D. Ekaningsih, ພ້ອມກັນນັ້ນ ກໍສົ່ງຄໍາອວຍພອນ ແລະ ເນັ້ນໜັກວ່າ ພ້ອມທີ່ຈະສືບຕໍ່ໜູນຊ່ວຍບັນດາການເຄື່ອນໄຫວຂອງ ACP ໃນວາລະດຳລົງຕຳແໜ່ງເປັນປະທານ ACP ຂອງ ອິນໂດເນເຊຍ.
ຫອມມາລາ
