 |
ສະຫາຍ ຄຳໝັ້ນ ສູນວິເລີດ ເລຂາຄະນະພັກ ລັດຖະມົນຕີກະຊວງພາຍໃນ
ສະຫາຍ ຄຳໝັ້ນ ສູນວິເລີດ ເລຂາຄະນະພັກ ລັດຖະມົນຕີກະຊວງພາຍໃນ ໄດ້ເຜີຍແຜ່ເຊື່ອມຊຶມບັນດາມະຕິຂ້າງເທິງ ທີ່ເປັນເອກະສານສຳຄັນຂອງພັກ ຊຶ່ງສະຫາຍໄດ້ຍົກໃຫ້ເຫັນຄວາມໝາຍຄວາມສຳຄັນຂອງເນື້ອໃນມະຕິກອງປະຊຸມຄົບ ຄະນະຂອງຄະນະບໍລິຫານງານສູນກາງພັກ ຄັ້ງທີ 8 ສະໄໝທີ X ວ່າ: ມະຕິດັ່ງກ່າວໄດ້ຜ່ານການຄົ້ນຄວ້າປຶກສາຫາລື ໃນແຕ່ລະບັນຫາຢ່າງເລິກເຊິ່ງ ແລະ ເປັນເອກະພາບກັນໃນຫຼາຍບັນຫາຄື: ການແກ້ໄຂຄວາມຫຍຸ້ງຍາກທາງດ້ານເສດຖະກິດມະຫາພາກຕິດພັນກັບການຜັນຂະຫຍາຍມະຕິກອງປະຊຸມຄົບຄະນະຄັ້ງທີ 7 ຂອງຄະນະບໍລິຫານງານສູນກາງພັກສະ ໄໝທີ X ໂດຍໃຫ້ສຸມໃສ່ການສືບຕໍ່ສະກັດກັ້ນການຮົ່ວໄຫຼ ຂອງແຫຼ່ງລາຍຮັບດ້ວຍການແກ້ໄຂຊ່ອງວ່າງ, ເພີ່ມມາດຕະການດ້ານວິໄນຕໍ່ເຈົ້າໜ້າທີ່, ເລັ່ງການຫັນໄປສູ່ທັນສະໄໝ ໃນການຄຸ້ມຄອງລາຍຮັບ-ລາຍຈ່າຍ; ຄົ້ນຄວ້າເຈລະຈາ ເພື່ອກຳນົດທາງອອກຕົວຈິງ ໃນການແກ້ໄຂໜີ້ສິນກັບບັນດາປະເທດ ແລະ ສະຖາບັນການເງິນສາກົນ; ເພີ່ມຄັງສຳຮອງເງິນຕາຕ່າງປະເທດ ເພື່ອຫຼຸດ ຜ່ອນຄວາມກົດດັນການໃຊ້ເງິນຕາຕ່າງປະເທດ ແລະ ຍູ້ແຮງ ການພັດທະນາຜະລິດຕະພັນສິນຄ້າຕົວຈິງ, ຮັບໃຊ້ນັກທ່ອງທ່ຽວເພື່ອດຶງດູດເງິນຕາເຂົ້າປະເທດ ທັງເປັນການຊຸກຍູ້ສົ່ງເສີມການຜະລິດຂອງປະຊາ ຊົນ ໂດຍກົງ; ປະຕິຮູບບັນດາລັດວິສາຫະກິດຢ່າງຈິງຈັງເນັ້ນປະສິດທິຜົນຕົວຈິງກ່ຽວກັບການຫັນຮູບແບບການຄຸ້ມຄອງບັນດາລັດວິສາຫະກິດຕົ້ນຕໍດ້ວຍ ຮູບການຫຸ້ນສ່ວນຢ່າງເໝາະສົມ ພ້ອມທັງຄົ້ນຄວ້າປັບປຸງລະບຽບການຄຸ້ມຄອງລັດຕໍ່ການເຄື່ອນໄຫວຂອງຫົວໜ່ວຍລັດວິສາຫະກິດ ໂດຍສະເພາະບັນຫາເງິນເດືອນ ແລະ ເງິນອຸດໜູນຂອງຜູ້ບໍລິຫານ ແລະ ພະນັກງານ.
ກ່ຽວກັບການພັດທະນາຊົນນະບົດ ແລະ ແກ້ໄຂຄວາມທຸກຍາກຂອງປະຊາຊົນ, ການແບ່ງຂັ້ນຄຸ້ມຄອງ ໃນລະບົບອົງການບໍລິຫານລັດ ແລະ ການດຳເນີນຄະດີຕາມຂະບວນຍຸຕິທຳ, ມະຕິດັ່ງກ່າວໄດ້ມອບໃຫ້ກົມການເມືອງຊີ້ນຳການປັບປຸງບັນດາເນື້ອໃນທີ່ ໄດ້ປຶກສາຫາລືວຽກງານການ ພັດທະນາຊົນນະບົດ ແລະ ແກ້ໄຂຄວາມທຸກຍາກຂອງປະຊາຊົນເປັນຄຳສັ່ງຂອງກົມການ ເມືອງກ່ຽວກັບການເພີ່ມທະວີການຊີ້ນຳວຽກງານດັ່ງກ່າວ; ກ່ຽວກັບການແບ່ງຂັ້ນຄຸ້ມຄອງມອບໃຫ້ກົມການເມືອງສືບຕໍ່ຊີ້ນຳການປັບປຸງເນື້ອໃນເລິກເຊິ່ງຮັດກຸມ ແລະ ອອກເປັນມະຕິຂອງກົມການເມືອງສູນກາງພັກກ່ຽວກັບການແບ່ງຂັ້ນຄຸ້ມຄອງ ໃນລະບົບອົງການບໍລິຫານລັດແຕ່ລະຂັ້ນ; ກ່ຽວກັບການດຳເນີນຄະດີຕາມຂະບວນຍຸຕິທຳ, ມະຕິກອງປະຊຸມໄດ້ມອບໃຫ້ກົມການເມືອງສູນກາງພັກ ອອກເປັນມະຕິສະເພາະ ເພື່ອເປັນພື້ນຖານໃນການຊີ້ນຳ-ນຳພາ ຈັດຕັ້ງປະຕິບັດວຽກງານດັ່ງກ່າວ, ສ້າງການຫັນປ່ຽນທີ່ຕັ້ງໜ້າ ແລະ ແຂງແຮງຕໍ່ຂົງເຂດວຽກງານຍຸຕິທຳ. ສະຫາຍ ຄຳໝັ້ນ ສູນວິເລີດ ຍັງໄດ້ເຜີຍແຜ່ເຊື່ອມຊຶມມະຕິຂອງກົມການເມືອງສູນກາງພັກ ສະບັບເລກທີ 076/ກມສພ ລົງວັນທີ 19 ສິງຫາ 2019 ວ່າດ້ວຍການປັບປຸງການແບ່ງຂັ້ນຄຸ້ມຄອງ ເພື່ອສ້າງຄວາມເຂັ້ມແຂງຂອງລະບົບບໍລິຫານລັດໃນໄລຍະໃໝ່ໃຫ້ສະມາຊິກພັກ, ພະນັກງານຫຼັກແຫຼ່ງຂອງກະຊວງພາຍໃນ.
（ແຫຼ່ງຂໍ້ມູນ： www.pasaxon.org.la）
