 |
| ພາບປະກອບ: TTXVN |
ຫວ່າງແລ້ວນີ້, ເວັບໄຊ Vietnam Briefing ຂອງບໍລິສັດໃຫ້ຄຳປຶກສາການລົງທຶນ Dezan Shira & Associates ໄດ້ຄັດສະເໜີບົດລາຍງານຫຼ້າສຸດຂອງທະນາຄານໂລກ (WB), ໃນນັ້ນ ໄດ້ວິເຄາະຢ່າງລະອຽດກ່ຽວກັບກາລະໂອກາດ ແລະ ສິ່ງທ້າທາຍຂອງສັນຍາຄູ່ຮ່ວມມືເສດຖະກິດຮອບດ້ານພາກພື້ນ (RCEP) ທີ່ມີຕໍ່ພື້ນຖານເສດຖະກິດຂອງບັນດາປະເທດສະມາຊິກ, ໃນນັ້ນມີ ຫວຽດນາມ. ບົດລາຍງານຄາດວ່າ ໃນໄລຍະແຕ່ປີ 2020 – 2035, ຫວຽດນາມ ຈະຫຼຸດອັດຕາເກັບພາສີນຳເຂົ້າສະເລ່ຍແຕ່ 0,8% ລົງເຫຼືອພຽງ 0,2%. ໃນຂະນະທີ່ໄດ້ຊົມໃຊ້ອັດຕາພາສີສົ່ງອອກຈາກ 0,6% ຫຼຸດລົງເຫຼືອ 0,1%. ຕາມແຜນການແລ້ວ ແມ່ນມີຄວາມປະເອີບໃຈທີ່ສຸດ ເມື່ອໝູນໃຊ້ປະໂຫຍດໄດ້ທັງໝົດ, ຫວຽດນາມ ຈະມີລະດັບລາຍຮັບສູງທີ່ສຸດໃນຈຳນວນປະເທດສະມາຊິກຂອງສັນຍາ RCEP. ລະດັບລາຍຮັບຂອງ ຫວຽດນາມ ເພີ່ມຂຶ້ນ 4,9% ເມື່ອທຽບໃສ່ລະດັບພື້ນຖານ, ສູງກວ່າປະເທດອື່ນໆ ທີ່ມີລາຍຮັບເພີ່ມຂຶ້ນພຽງແຕ່ປະມານ 2,5% ເທົ່ານັ້ນ. ບັນດາປະເທດສະມາຊິກ RCEP ທັງໝົດລ້ວນແຕ່ເຫັນປະຈັກຕາການສົ່ງອອກ ແລະ ນຳເຂົ້າເພີ່ມຂຶ້ນ, ໃນນັ້ນ, ຄາດວ່າ ຫວຽດນາມ ຈະບັນລຸລະດັບສົ່ງອອກສູງທີ່ສຸດ ດ້ວຍ 11,4% ແລະ ການນຳເຂົ້າຂອງ ຫວຽດນາມ ກໍຈະມີການເຕີບໂຕຫຼາຍພໍສົມຄວນ, ຢູ່ໃນລະດັບ 9,2%.
ວີໂອວີ
