| ມີສະໂມສອນໜຶ່ງ ຊື່ວ່າ ໂຮ່ຈີມິນ | |
| ເພີ່ມທະວີການຮ່ວມມືລະຫວ່າງ 2 ຄະນະຈັດຕັ້ງສູນກາງພັກຂອງຫວຽດນາມ ແລະ ລາວ |
 |
| ເພີ່ມທະວີການຮ່ວມມືລະຫວ່າງ ສະຖາບັນການເມືອງແຫ່ງຊາດ ໂຮ່ຈີມິນ ກັບ ໂຮນລັງ ແລະ ໂມຊຳບິກ. ພາບ: TTXVN |
ຕອນບ່າຍວັນທີ 12 ເມສາ, ຢູ່ຮ່າໂນ້ຍ, ທ່ານສາດສະດາຈານ, ປະລິນຍາເອກ ຫງວຽນຊວັນຖັ໊ງ, ຫົວໜ້າສະຖາບັນການເມືອງແຫ່ງຊາດ ໂຮ່ຈີມິນ, ປະທານສະພາທິດສະດີສູນກາງພັກກອມມູນິດ ຫວຽດນາມ ໄດ້ເຮັດວຽກກັບ ທ່ານນາງ Elsbeth Akkerman ເອກອັກຄະລັດຖະທູດ ລາຊະອານາຈັກ ໂຮນລັງ ແລະ ທ່ານ Leonardo Pene ເອກອັກຄະລັດຖະທູດ ໂມຊຳບິກ ປະຈຳ ຫວຽດນາມ ກ່ຽວກັບການຮ່ວມມືລະຫວ່າງສະຖາບັນ ແລະ ສອງປະເທດໃນໄລຍະຈະມາເຖິງ.
ເມື່ອແລກປ່ຽນກັບທ່ານນາງ Elsbeth Akkerman ເອກອັກຄະລັດຖະທູດ ໂຮນລັງ, ທ່ານ ຫງວຽນຊວັນຖັ໊ງ ປາດຖະໜາຢາກເພີ່ມທະວີການຮ່ວມມືລະຫວ່າງສອງຝ່າຍໃນບັນດາຂົງເຂດ: ການສຶກສາ ແລະ ບຳລຸງສ້າງ; ຄົ້ນຄວ້າ, ແລກປ່ຽນທາງດ້ານວິຊາການສຶກສາກ່ຽວກັບນະໂຍບາຍສາທາລະນະ, ວິທະຍາສາດຄຸ້ມຄອງຕົວເມືອງ, ການຮັບມືກັບການປ່ຽນແປງຂອງດິນຟ້າອາກາດ, ການຄຸ້ມຄອງສີຂຽວ, ການຫັນເປັນດີຈີຕອນ, ຫັນເປັນພະລັງງານສີຂຽວ… ເພື່ອແນໃສ່ຮັບໃຊ້ວິວັດການບຳລຸງສ້າງແຫຼ່ງຊັບພະຍາກອນມະນຸດທີ່ມີຄຸນນະພາບສູງຢູ່ທຸກຂັ້ນ, ທຸກຂະແໜງການ…
ທ່ານ ຫງວຽນຊວັນຖັ໊ງ ຢືນຢັນວ່າຫວຽດນາມ ຮັກສານະໂຍບາຍພັດທະນາມະນຸດທີ່ສອດຄ່ອງຕາມວິວັດການປ່ຽນແປງໃໝ່ປະດິດຄິດສ້າງເພື່ອປັບຕົວເຂົ້າກັບການປ່ຽນແປງຂອງໂລກ. ນອກນີ້, ສິດທິມະນຸດຍັງແມ່ນໜຶ່ງໃນບັນດາຂົງເຂດທີ່ຖືເປັນສຳຄັນໃນຂະບວນການຂອງຫວຽດນາມສ້າງລັດແຫ່ງອຳນາດອະທິປະໄຕສັງຄົມນິຍົມ. ສະຖາບັນການເມືອງແຫ່ງຊາດ ໂຮ່ຈີມິນ ພວມຜັນຂະຫຍາຍໂຄງການນຳເອົາການສຶກສາສິດທິມະນຸດເຂົ້າໃນລະບົບການສຶກສາແຫ່ງຊາດ. ດ້ວຍປະສົບການຂອງຕົນ, ໂຮນລັງສາມາດສະຫນັບສະຫນູນສະຖາບັນ ໃນໂຄງການນີ້.
ໃນການເຮັດວຽກກັບທ່ານ Leonardo Pene ເອກອັກຄະລັດຖະທູດ ໂມຊຳບິກ ປະຈຳ ຫວຽດນາມ, ທ່ານ ຫງວຽນຊວັນຖັ໊ງ ຢັ້ງຢືນວ່າ ກຳລັງບົ່ມຊ້ອນຮ່ວມມືລະຫວ່າງສອງປະເທດ ຫວຽດນາມ - ໂມຊຳບິກ ແມ່ນໃຫຍ່ຫຼວງທີ່ສຸດ, ພິເສດໃນບັນດາຂົງເຂດ: ກະສິກຳ, ການສຶກສາ ແລະ ບຳລຸງສ້າງ, ສາທາລະນະສຸກ… ຕາມທ່ານ ຫງວຽນຊວັນຖັ໋ງ ແລ້ວ, ໃນໄລຍະຈະມາເຖິງ, ສະຖາບັນອາດຮ່ວມມືກັບ ໂມຊຳບິກ ຜ່ານບາງໂຄງການຄື: ຮ່ວມມືຮຽບຮຽງ, ແປບົດນິພົມຂອງປະທານໂຮ່ຈີມິນ ເປັນພາສາຕ່າງໆ; ສະຫງວນທຶນການສຶກສາລະດັບປະລິນຍາເອກໃຫ້ແກ່ພະນັກງານພັກ Frelimo ຈຳນວນ 2 ທຶນ…
ໄຊພອນ
