ທີ່ນະຄອນຫຼວງ Kiev, ສະຖານທູດຫວຽດນາມທີ່ປະເທດຢູເຄຣນ ປະສານກັບສະມາຄົມນັກແຕ້ມຮູບທົ່ວຢູ່ເຄຣນ ຊຶ່ງຂຶ້ນກັບ ກະຊວງວັດທະນະທຳ ແລະ ນະໂຍບາຍຂໍ້ມູນຂ່າວສານ ຂອງຢູເຄຣນ ໄດ້ຈັດຕັ້ງງານວາງສະແດງຮູບພາບວາດກ່ຽວກັບຫວຽດນາມ ໂດຍບັນດານັກແຕ້ມຮູບຢູເຄຣນເປັນຜູ້ຄົ້ນຄິດອອກແບບສ້າງຮູບແຕ້ມລະນຶກຄົບຮອບ 30 ປີ ສ້າງການພົວພັນການທູດ ຫວຽດນາມ-ຢູເຄຣນ (23 ມັງກອນ 1992 – 23 ມັງກອນ 2022).
 |
| ງານວາງສະແດງ ລະນຶກ 30 ປີ ການສ້າງຕັ້ງການພົວພັນການທູດຫວຽດນາມ-ຢູເຄຣນ. ພາບ: vovlive.vn |
ກ່າວເປີດພິທີໂດຍທ່ານປະທານສະມາຄົມນັກແຕ້ມຮູບຢູເຄຣນ Cherniavskyy Kostiantyn Volodymyrovych ຊຶ່ງໃຫ້ຮູ້ວ່າ ສະມາຄົມ ແລະ ສະຖານທູດຫວຽດນາມ ໄດ້ດຳເນີນການເຄື່ອນໄຫວຄົ້ນຄິດສ້າງຮູບແຕ້ມກ່ຽວກັບຫວຽດນາມໃນຂອບເຂດນັກແຕ້ມຮູບຂອງຢູເຄຣນນັບແຕ່ເດືອນຕຸລາ 2021. ທ່ານ Cherniavskyy ສະແດງຄວາມຊົມເຊີຍທີ່ໃນໄລຍະເວລາສັ້ນໜຶ່ງນັ້ນ ມີນັກແຕ້ມຮູບຫຼາຍທ່ານຈາກທົ່ວປະເທດຢູເຄຣນ ໄດ້ຕອບຮັບ ແລະ ຄົ້ນຄິດສ້າງຜົນງານສົ່ງມາເຂົ້າຮ່ວມໃນງານວາງສະແດງ.
ງານວາງສະແດງເປັນໂອກາດໃຫ້ແກ່ປວງຊົນໄດ້ຊົມຄວາມງາມຂອງທົ່ວຫວຽດນາມ ແລະ ຢູເຄຣນ ເພາະວັດທະນະທຳ ແລະ ສິນລະປະແມ່ນບໍ່ມີຂອບເຂດ. ທ່ານ Cherniavskyy ເຊື່ອວ່າການທູດວັດທະນະທຳເປັນຂົວເຊື່ອມຕໍ່ທີ່ມີປະສິດທິຜົນລະຫວ່າງບັນດາປະເທດ, ເຮັດໃຫ້ໂລກນີ້ງາດງາມ ແລະ ໜ້າຢູ່ຂຶ້ນ.
ທ່ານເອກອັກຄະລັດຖະທູດ ຫງວຽນຮົ່ງແທກ ກ່າວສະແດງຄວາມຂອບໃຈຕໍ່ສະມາຄົມນັກແຕ້ມຮູບຢູເຄຣນ, ມູນນິທິ Gorchakov ແລະ ພິເສດແມ່ນສ່ວນຕົວທ່ານ Kostiantyn Cherniavskyy ແລະ ທ່ານ Andrey Gorchakov ທີ່ໄດ້ອອກແຮງຈັດຕັ້ງກິດຈະກຳນີ້ໄດ້ສຳເລັດ. ງານວາງສະແດງໄດ້ດຶງດູດເອົາການເຂົ້າຮ່ວມຂອງນັກສິນລະປິນແຕ້ມຮູບຢູເຄຣນຫຼາຍກວ່າ 90 ທ່ານໃນທົ່ວປະເທດ ພ້ອມກັບຮູບແຕ້ມປະມານ 120 ຮູບທີ່ສະແດງຮູບພາບຜືນແຜນດິນ ແລະ ຄົນຫວຽດນາມ ໂດຍຜ່ານງານສິນລະປະ. ນີ້ເປັນຄວາມຮັກແພງອັນພິເສດທີ່ບັນດານັກແຕ້ມ ແລະ ເພື່ອນມິດຢູເຄຣນມອບໃຫ້ແກ່ປະຊາຊົນຫວຽດນາມ ແລະ ປະເທດຫວຍດນາມ ໃນໂອກາດລະນຶກ 30 ປີ ສ້າງຕັ້ງການພົວພັນການທູດສອງຝ່າຍ.
ໃນໂອກາດນີ້, ທ່ານເອກອັກຄະລັດຖະທູດ ຫງວຽນຮົ່ງແທກ ຍົກສູງຜົນງານຕ່າງໆທີ່ສອງຊາດບັນລຸໄດ້ໃນ 30 ປີ ຜ່ານ. ຢູເຄຣນປັນໜຶ່ງໃນ 30 ຄູ່ຮ່ວມມືຍຸດທະສາດຮອບດ້ານຂອງຫວຽດນາມ. ຫວຽດນາມເປັນໜຶ່ງໃນ 5 ຄູ່ຮ່ວມມືການຄ້າລະດັບຕົ້ນຂອງຢູເຄຣນໃນພາກພື້ນທະວີບອາຊີ. ງານວາງສະແດງສິນລະປະ ໄດ້ປະກອບສ່ວນເຂົ້າໃນເປົ້າໝາຍລວມການສ້າງສາຍພົວພັນ ຫວຽດນາມ-ຢູ່ເຄຣນ ໃຫ້ຂະຫຍາຍຕົວຂຶ້ນອີກໃນທຸກຂົງເຂດຕ່າງໆເຊັ່ນ: ການເມືອງ, ສັງຄົມ, ເສດຖະກິດ, ການຄ້າ, ວັດທະນະທຳ, ວິທະຍາສາດ, ເຕັກໂນໂລຊີ,…
ງານວາງສະແດງສິນລະປະໄດ້ເປີດໃຫ້ມວນຊົນເຂົ້າຊົມໂດຍບໍ່ແສັຍຄ່ານັບແຕ່ວັນທີ 10 ຫາ 27 ກຸມພາ 2022 ທີ່ສຳນັກງານຂອງສະມາຄົມນັກແຕ້ມຮູບຢຸເຄຣນ, ເລກທີ 1-5 Sichovykh Striltsiv, ນະຄອນ Kiev. ຈາກນັ້ນ, ງານວາງສະແດງຈະຖືກຈັດຂຶ້ນໃນບັນດານະຄອນໃຫຍ່ອື່ນຂອງຢູເຄຣນໃນທົ່ວປີ 2022.
ວິລະຊົນ
