ຕອນບ່າຍວັນທີ 2 ມີນາ, ສະຫະພັນການຈັດຕັ້ງມິດຕະພາບນະຄອນເກິນເທີ (ສະຫະພັນເກິນເທີ) ໄດ້ມີວາລະປະຊຸມເຮັດວຽກຮ່ວມກັບຄະນະບໍຫານງານສະມາຄົມມິດຕະພາບ ຫວຽດນາມ-ລາວ ນະຄອນເກິນເທີ, ສົນທະນາແຜນການຈັດກິດຈະກຳການເຄື່ອນໄຫວຕ່າງໆເພື່ອລະນຶກຄົບຮອບ 60 ປີ ວັນສ້າງການພົວພັນການທູດ (5/9/1962-5/9/2022) ແລະ ຄົບຮອບ 45 ປີ ວັນເຊັນສົນທິສັນຍາມິດຕະພາບ ແລະ ການຮ່ວມມື ຫວຽດນາມ-ລາວ (18/7/1977-18/7/2022).
ຕາມແຜນການ, ນະຄອນເກິນເທີຈະຈັດຕັ້ງກິດຈະກຳການເຄື່ອນໄຫວຕ່າງໆ ລະອຽດຄື: ສົ່ງໂທລະສານອວຍພອນເນື່ອງໃນໂອກາດວັນຊາດລາວ, ລະນຶກ 60 ປີ ວັນສ້າງຕັ້ງການພົວພັນການທູດ ; ຈັດການພົບປະສະເຫຼີມສະຫຼອງ, ການແລກປ່ຽນຄະນະຜູ້ແທນ ; ການແລກປ່ຽນວັດທະນະທຳ, ສິນລະປະວັນນະຄະດີ ຫຼື ງານວາງສະແດງຮູບພາບສິນລະປະ ; ຈັດຕັ້ງການແຂ່ງຂັນຊອກຮູ້ (ທາງອອນໄລ໌, ບົດຂຽນ) ກ່ຽວກັບປະຫວັດສາດ, ການພົວພັນສອງຊາດ ; ຈັດຕັ້ງບັນດາການແຂ່ງຂັນສະເຫຼີມສະຫຼອງ 60 ປີ ສ້າງຕັ້ງການພົວພັນການທູດ ; ພິມຈຳໜ່າຍຜົນງານການໂຄສະນາເຜີຍແຜ່ສາຍພົວພັນມິດຕະພາບ ຫວຽດນາມ-ລາວ…
 |
| ນະຄອນເກິນເທີຈັດປະຊຸມກຽມກິດຈະກຳລະນຶກ 60 ປີ ວັນສ້າງຕັ້ງການພົວພັນການທູດ ຫວຽດນາມ-ລາວ |
ການເຄື່ອນໄຫວກິດຈະກຳຕ່າງໆແມ່ນແນໃສ່ປະກອບສ່ວນເສີມສ້າງ, ເພີ່ມທະວີ ແລະ ສົ່ງເສີມຍິ່ງຂຶ້ນອີກໃນການພົວພັນສອງຝ່າຍ. ພ້ອມທັງເປັນການໂຄສະນາຮູບພາບນະຄອນເກິນເທີທີ່ຂະຫຍັນຂັນແຂງ, ເຕັມໄປດ້ວຍທ່າແຮງ, ມີຄວາມຕັ້ງໜ້າ ແລະ ເປັນເຈົ້າການໃນການເຊື່ອມໂຍງສາກົນອັນກວ້າງຂວາງເລິກເຊິ່ງ; ເພີ່ມທະວີມິດຕະພາບ ແລະ ຄວາມເຂົ້າໃຈກັນລະຫວ່າງ ນະຄອນເກິນເທີ-ລາວ, ລາວ-ນະຄອນເກິນເທີ ; ເປີດກວ້າງໂອກາດການພົວພັນແລກປ່ຽນ, ເຊື່ອມຕໍ່ທຸລະກິດສອງຝ່າຍ.
ທ່ານ ນາງ ເລຖີ້ແທງຢາງ - ປະທານສະຫະພັນເກິນເທີ ຫວັງວ່າບັນດາກິດຈະກຳຈະຖືກຈັດຕັ້ງຂຶ້ນໄດ້ຮັບຜົນສຳເລັດ ແລະ ມີປະສິດທິຜົນຕາມທີ່ຄາດຫວັງໄວ້, ເປັນການປະກອບສ່ວນເສີມສ້າງ, ເພີ່ມທະວີ ແລະ ສົ່ງເສີມຍິ່ງຂຶ້ນໄປໃນສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ຫວຽດນາມ-ລາວ.
ວິລະຊົນ
