 |
| ທ່ານເອກອັກຄະລັດຖະທູດ ຫງວຽນຮົ່ງແທັກ (ພາບ: TTXVN ) |
ຕາມທ່ານເອກອັກຄະລັດຖະທູດ ຫງວຽນຮົ່ງແທັກແລ້ວ, ໃນສະພາບການຂໍ້ມູນຂ່າວ ກ່ຽວກັບສະພາບການທາງທິດຕາເວັນອອກ ຢູແກຼນ ຍັງມີຄວາມສັບສົນຫຼາຍຢ່າງ, ສະຖານທູດ ຫວຽດນາມ ປະຈຳ ຢູແກຼນ ຍັງຮັກສາການພົບປະເປັນປະຈຳ, ໂດຍກົງ ແລະ ທາງໄກກັບປະຊາຄົມຊາວຫວຽດນາມ ເກືອບທັງໝົດ ໃນທົ່ວຢູແກຼນ, ຍົກເວັ້ນສ່ວນໜຶ່ງປະຊາຄົມຢູ່ Donetsk ທີ່ຍັງບໍ່ທັນເຂົ້າເຖິງໄດ້.
ຜ່ານການຕິດຕາມ ແລະ ຕີລາຄາສະພາບການຢູ່ ຢູແກຼນ, ສະຖານທູດເຫັນໄດ້ວ່າ ຍັງບໍ່ມີສັນຍານທີ່ເປັນໜ້າກັງວົນ, ການເຄື່ອນໄຫວດ້ານເສດຖະກິດຍັງສາມາດດຳເນີນເປັນປົກກະຕິ. ສະຖານທູດ ຍັງຈັດຕັ້ງຫຼາຍການເຄື່ອນໄຫວເພື່ອສະເຫຼີມສະຫຼອງ 30 ປີແຫ່ງວັນສ້າງຕັ້ງການພົວພັນທາງການທູດ ລະຫວ່າງ ຫວຽດນາມ - ຢູແກຼນ. ທ່ານເອກອັກຄະລັດຖະທູດ ຮຽກຮ້ອງໃຫ້ປະຊາຄົມຊາວຫວຽດນາມ ບໍ່ຄວນກັງວົນເກີນໄປ, ຕ້ອງມີຄວາມລະຫງັບໃຈ ແລະ ມີຈິດໃຈເປັນປົກກະຕິ ເພື່ອທຳມາຫາກິນ, ຮັກສາບັນດາການເຄື່ອນໄຫວດ້ານເສດຖະກິດ ຍ້ອນວ່ານັ້ນແມ່ນຜົນປະໂຫຍດທຳອິດຂອງປະຊາຄົມ.
ກ່ຽວກັບສະພາບການຢູ່ ຢູແກຼນ, ທ່ານເອກອັກຄະລັດຖະທູດ ຫງວຽນຮົ່ງແທັກ ໄດ້ຄັດສະເໜີຖະແຫຼງການຈາກໂຄສົກກະຊວງການຕ່າງປະເທດ ຢູແກຼນ ໂດຍຢັ້ງຢືນສະພາບການບໍ່ເຄັ່ງຕຶງຄືຂໍ້ມູນທີ່ໄດ້ເອົາລົງຈາກບາງອົງການສື່ມວນຊົນຝ່າຍຕາເວັນຕົກ. ເລື່ອງ ບາງປະເທດໄດ້ຖອນພະນັກງານທາງການທູດກັບເມືອປະເທດແມ່ນການກະທຳທີ່ມີຄວາມລະມັດລະວັງຫຼາຍເກີນໄປ.
ທ່ານເອກອັກຄະລັດຖະທູດ ຫງວຽນຮົ່ງແທັກ ຊີ້ແຈ້ງວ່າ ສະຖານທູດ ຫວຽດນາມ ປະຈຳ ຢູແກຼນ ພວມຕິດຕາມສະພາບການຢ່າງໃກ້ຊິດ ແລະ ເຫັນວ່າ ບໍ່ເຄັ່ງຕຶງເຖິງລະດັບອາດຈະເກີດສົງຄາມ, ບັນດາປະເທດທີ່ກ່ຽວຂ້ອງພວມມຸ່ງໄປເຖິງການເຈລະຈາ, ທຸກຄວາມມານະພະຍາຍາມທາງການທູດ ຍັງພວມດຳເນີນຜ່ານການພົບປະລະຫວ່າງບັນດານັກການທູດ.
ທ່ານເອກອັກຄະລັດຖະທູດ ຫງວຽນຮົ່ງແທັກ ຖືວ່າ ບັນດານັກການທູດ ລ້ວນແຕ່ຄິດໄລ່ເຖິງຜົນປະໂຫຍດຂອງແຕ່ລະຝ່າຍ ແລະ ຍັງຮັກສາຂົວເຊື່ອມຕໍ່ເພື່ອສືບຕໍ່ເຈລະຈາ, ຈາກນັ້ນ ພາໄປເຖິງຂໍ້ຕົກລົງເພື່ອແນໃສ່ແກ້ໄຂບັນຫາ.
ບຸນຄົງ
