 |
| ມະຫາວິທະຍາໄລກຽນຢາງ ຫາກໍ່ຈັດຕັ້ງພານັກສຶກສາກຳປູເຈຍເກືອບ 50 ຄົນທີ່ພວມຮ່ຳຮຽນຢູ່ໂຮງຮຽນກັບເມືອຢ້ຽມຢາມຄອບຄົວໃນໂອກາດບຸນປີໃໝ່ປະຈຳຊາດຫວຽດນາມ ປີ 2022. ພາບ: tienphong.vn |
ວັນທີ 17 ມັງກອນນີ້, ທ່ານ ປອ. ຫງວຽນວັນແທ່ງ, ຮອງເລຂາຄະນະພັກ, ຮອງອະທິການບໍດີມະຫາວິທະຍາໄລ ກຽນຢາງ ໃຫ້ຮູ້ວ່າ ໄດ້ສໍາເລັດການຈັດຕັ້ງພາບັນດານັກສຶກສາກຳປູເຈຍກັບຄືນເມືອບ້ານ ເນື່ອງໃນໂອກາດບຸນປີໃໝ່ປະຈຳຊາດຫວຽດນາມ ປີ 2022.
ເນື່ອງຈາກຜົນກະທົບຈາກການລະບາດຂອງພະຍາດໂຄວິດ-19 ໃນໄລຍະ 2 ປີຜ່ານມາ ບັນດານັກສຶກສາກຳປູເຈຍບໍ່ສາມາດກັບຄືນບ້ານເກີດເມືອງນອນໄດ້, ສະນັ້ນ ທາງໂຮງຮຽນຈຶ່ງຕອບສະໜອງຕາມຄຳສະເໜີ, ຄວາມມຸ່ງມາດປາດຖະໜາຂອງນັກສຶກສາ ແລະ ໃຫ້ການສະໜັບສະໜູນຢ່າງຄົບຖ້ວນ.
ທ່ານ ປອ. ຫງວຽນວັນແທ່ງ ໃຫ້ຮູ້ວ່າ ມະຫາວິທະຍາໄລກຽນຢາງ ໄດ້ເຮັດວຽກ ແລະ ໄດ້ຮັບການອຳນວຍຄວາມສະດວກ ແລະ ການໜູນຊ່ວຍ ຈາກຄະນະກຳມະການປະຊາຊົນ ແລະ ພະແນກການຕ່າງປະເທດແຂວງກຽນຢາງ ໃນການໃຫ້ນັກສຶກສາກັບເມືອບ້ານຢ່າງປອດໄພ ແລະ ຮັບປະກັນການປ້ອງກັນພະຍາດໂຄວິດ-19.
ທີ່ດ່ານຊາຍແດນສາກົນ ຮ່າຕຽນ, ນ້ອງ Kao LiLy ເປັນນັກສຶກສາ ກຳປູເຈຍ ຂະແໜງເຕັກໂນໂລຊີຊີວະພາບ ໃຫ້ຮູ້ວ່າ: “ຂ້າພະເຈົ້າຮູ້ສຶກດີໃຈ ແລະ ມີຄວາມສຸກເມື່ອໂຮງຮຽນຈັດຕັ້ງພາຂ້າພະເຈົ້າກັບເມືອບ້ານ ພາຍຫຼັງ 2 ປີຈາກຄອບຄົວຍ້ອນພະຍາດລະບາດ. ຂ້າພະເຈົ້າຂໍຂອບໃຈການນຳແຂວງ ກຽນຢາງ ແລະ ມະຫາວິທະຍາໄລ ກຽນຢາງ ທີ່ໄດ້ສ້າງເງື່ອນໄຂດີທີ່ສຸດເພື່ອໃຫ້ພວກເຮົາກັບຄືນເມືອບ້ານເກີດເມືອງນອນໃນໂອກາດນີ້”.
ຄາດວ່າ, ວັນທີ 9 ກຸມພາ, ມະຫາວິທະຍາໄລ ກຽນຢາງ ຈະຕ້ອນຮັບນັກສຶກສາ ກຳປູເຈຍ ຈຳນວນ 50 ຄົນ ຂອງບັນດາລຸ້ນ 1, 2, 3 ຈາກດ່ານຊາຍແດນສາກົນ ຮ່າຕຽນ (ແຂວງ ກຽນຢາງ) ແລະ ນັກສຶກສາ ອິນໂດເນເຊຍ 2 ຄົນ ຢູ່ສະໜາມບິນສາກົນ ເຕິນເຊີຍເຍີດ ສົ່ງກັບ ຫໍພັກຂອງມະຫາວິທະຍາໄລ ກຽນຢາງ ເພື່ອກັບຄືນຮໍ່າຮຽນ.
ຫຼັງຈາກໄລຍະພັກນີ້, ນັກສຶກສາຕ່າງປະເທດທີ່ກັບຄືນມາຈະໄດ້ຮັບການກວດວິເຄາະສໍາລັບພູມຕ້ານທານ COVID-19 ໂດຍໄວ, ຈັດຕັ້ງປະຕິບັດການຈຳກັດບໍລິເວນເປັນເວລາ 3 ມື້ ແລະ ເອົາຕົວຢ່າງສໍາລັບການກວດວິເຄາະ PCR ກ່ອນທີ່ຈະເຂົ້າຮ່ວມການສຶກສາແບບລວມສຸມ.
ໄຊພອນ
