| ເປັນຄັ້ງທຳອິດຫວຽດນາມ ໄດ້ຮັບການແຕ່ງຕັ້ງເປັນປະທານຮ່ວມ OECD ຂອງ SEARP | |
| ອົດສະຕາລີສ້າງສູນການສຶກສາທຳອິດຢູ່ ຫວຽດນາມ |
 |
| ການລົງນາມສັນຍາການຮ່ວມມືລະຫວ່າງສອງຝ່າຍ (ພາບ: TTXVN) |
ກອງປະຊຸມຄັ້ງນີ້ໂດຍສະມາຄົມນັກທຸລະກິດນະຄອນໂຮ່ຈິມິນ (HUBA) ສົມທົບກັບສູນບໍລິການການຕ່າງປະເທດ (FSC), ພະແນກການຕ່າງປະເທດນະຄອນໂຮ່ຈິມິນ ຈັດຕັ້ງໃນວັນທີ 21 ທັນວາ.
ທ່ານ ເລຫິວເຫງ້ຍ, ຮອງປະທານ HUBA ໃຫ້ຮູ້ວ່າ: ໂດຍໄດ້ຜ່ານໄລຍະຂອງຄວາມຫຍຸ້ງຍາກທັງດ້ານການຜະລິດ ແລະ ການດຳເນີນທຸລະກິດ, ໃນນັ້ນ, ບັນດາວິສາຫະກິດນະຄອນ ໂຮ່ຈີມິນ ເວົ້າສະເພາະ, ແລະ ວິສາຫະກິດ ຫວຽດນາມ ເວົ້າລວມ ໄດ້ມານະພະຍາຍາມຟື້ນຟູການຜະລິດສົ່ງອອກ, ຕອບສະໜອງຄວາມຕ້ອງການບໍລິໂພກໃນຊຸມ ເດືອນທ້າຍປີ ແລະ ຊຸກຍູ້ການສົ່ງອອກ.
ເພື່ອໜູນຊ່ວຍວິສາຫະກິດເຊື່ອມຕໍ່ຕ່ອງໂສ້ການສະໜອງ, ຊອກຫາລູກຄ້າ ແລະ ຕະຫຼາດໃໝ່, ສະມາຄົມວິສາຫະກິດນະຄອນໄດ້ລົງນາມສັນຍາຮ່ວມມືກັບສູນບໍລິການການພົວພັນຕ່າງປະເທດ, ສົມທົບກັບສະມາຄົມນັກທຸລະກິດ ຫວຽດນາມ ຢູ່ຕ່າງປະເທດຈັດຕັ້ງບັນດາເຫດການແລກປ່ຽນ ແລະ ສົ່ງເສີມການຄ້າ. ຍູ້ແຮງບັນດາຜະລິດຕະພັນ ແລະ ສິນຄ້າຂອງວິສາຫະກິດ ຫວຽດນາມ ເຂົ້າສູ່ຕະຫຼາດບໍລິໂພກທີ່ມີຄວາມສາມາດບົ່ມຊ້ອນ, ໂດຍເລີ່ມຈາກຕະຫຼາດ ອົດສະຕາລີ.
ທ່ານ ເຈີ່ນບາຟຸກ, ປະທານສະມາຄົມນັກທຸລະກິດ ຫວຽດນາມ ຢູ່ ອົດສະຕາລີ ໃຫ້ຮູ້ວ່າ: ແຕ່ລະປີ, ຕະຫຼາດ ອົດສະຕາລີ ນຳເຂົ້າສິນຄ້າໃນປະລິມານທີ່ຫຼາຍ ເຊິ່ງຂຶ້ນເຖິງ 600 ຕື້ USD, ແຕ່ວົງເງິນແລກປ່ຽນການຄ້າລະຫວ່າງ ຫວຽດນາມ ແລະ ອົດສະຕາລີ ຍັງຄົງມີໜ້ອຍກ່ວາຫຼາຍເມື່ອທຽບໃສ່ກັບຄວາມສາມາດບົ່ມຊ້ອນຂອງທັງສອງຝ່າຍ. ປີ 2020, ວົງເງິນການຄ້າສອງຝ່າຍລະຫວ່າງຫວຽດນາມ ແລະ ອົດສະຕາລີ ບັນລຸພຽງແຕ່ 8,3 ຕື້ USD, ສະເພາະໃນ 11 ເດືອນຂອງປີ 2021, ການນຳເຂົ້າ ແລະ ສົ່ງອອກຫວຽດນາມ - ອົດສະຕາລີ ບັນລຸໄດ້ 10 ຕື້ USD.
ຕາມທ່ານ ຟຸກ ແລ້ວ, ສະມາຄົມວິສາຫະກິດ ຫວຽດນາມ ປະຈຳ ອົດສະຕາລີ ຫາກໍ່ສ້າງຕັ້ງສູນສົ່ງເສີມການຄ້າ ຫວຽດນາມ - ອົດສະຕາລີ ແລະ ສະພາການຄ້າ ຫວຽດນາມ ຢູ່ນະຄອນ Melbourne ດ້ວຍຈຸດປະສົງຊຸກຍູ້ການສົ່ງອອກສິນຄ້າ ແລະ ຜະລິດຕະພັນຂອງ ຫວຽດນາມ ໄປຍັງຕະຫຼາດ ອົດສະຕາລີ. ຜ່ານການແນະນຳ, ໂຄສະນາ ຜະລິດຕະພັນຂອງຫວຽດນາມ ເຂົ້າສູ່ລະບົບຊຸບເປີມາເກັດໃນທົ່ວ ອົດສະຕາລີ.
ບຸນຄົງ
