ນີ້ແມ່ນ 2 ຊັ້ນຮຽນທີ່ນະຄອນໂຮ່ຈີມິນ ເລືອກເຟັ້ນເພື່ອທົດລອງການຈັດຕັ້ງການຮຽນ-ການສອນໂດຍກົງ (2 ອາທິດ) ໃນສະພາບການປັບຕົວເຂົ້າກັບສະພາບການໃໝ່. ຜົນການສຳຫຼວດຄວາມຄິດເຫັນຂອງຜູ້ປົກຄອງນັກຮຽນ ຊັ້ນ ມ 4 ແລະ ມ 7 ໂດຍພະແນກສຶກສາ ແລະ ບຳລຸງສ້າງນະຄອນໂຮ່ຈີມິນ ປະຕິບັດ ໄດ້ສະແດງໃຫ້ເຫັນວ່າ ຜູ້ປົກຄອງນັກຮຽນເກືອບ 80% ເຫັນດີກັບນະໂຍບາຍໃຫ້ນັກຮຽນໄດ້ຮຽນຢູ່ໂຮງຮຽນໂດຍກົງ.
 |
| ນັກຮຽນ ມ 4, ມ 7 ຢູ່ນະຄອນໂຮ່ຈີມິນ ໄດ້ກັບຄືນໄປຮຽນຢູ່ໂຮງຮຽນ. (ພາບ: ngaynay.vn) |
ເມື່ອນັກຮຽນມາໂຮງຮຽນ, ເຂົາເຈົ້າ ຕ້ອງປະຕິບັດຕາມຫຼັກການ 5K, ໂຮງຮຽນສ່ວນຫຼາຍ ແມ່ນປະຕິບັດຕາມຄຳແນະນຳ ແລະ ຄຳກ່າວເຕືອນຂອງຂະແໜງການສຶກສາ ແລະ ສາທາລະນະສຸກ ກ່ຽວກັບການສະກັດກັ້ນພະຍາດລະບາດ ດ້ວຍແຜນການ ແລະ ຂັ້ນຕອນຢ່າງເຂັ້ມງວດ.
ຫວ່າງແລ້ວນີ້, ການນຳຂອງພະແນກສາທາລະນະສຸກ ແລະ ພະແນກສຶກສາ ແລະ ບຳລຸງສ້າງນະຄອນ ໂຮ່ຈີມິນ ໄດ້ສຳຫຼວດ ແລະ ກວດກາການປະຕິບັດແຜນການຈັດຕັ້ງການສິດສອນໂດຍກົງ ຢູ່ໂຮງຮຽນຈຳນວນໜຶ່ງ.
ທ່ານ ຕັງຈີ໋ແທືອງ, ຫົວໜ້າພະແນກສາທາລະນະສຸກ ນະຄອນໂຮ່ຈີມິນ ຕີລາຄາວ່າ ໂຮງຮຽນທັງໝົດໄດ້ກະກຽມແຜນການຕ້ອນຮັບນັກຮຽນເປັນຢ່າງດີ, ພິເສດແມ່ນ ໃນຂັ້ນຕອນກວດການັກຮຽນກ່ອນເຂົ້າໂຮງຮຽນ.
ບັນດາໂຮງຮຽນບໍ່ຄວນກັງວົນເກີນໄປ ເພາະວ່າຂະແໜງການ ໄດ້ມີຄໍາແນະນໍາການຈັດການຢ່າງຄົບຖ້ວນແລ້ວ; ນອກຈາກນັ້ນ, ນັກຮຽນໃນຊັ້ນ ມ 4 ແລະ ມ 7 ກໍໄດ້ຮັບການສັກຢາກັນພະຍາດຢ່າງຄົບຖ້ວນ. ເຖິງຢ່າງໃດກໍ່ຕາມ, ບັນດາໂຮງຮຽນ ຕ້ອງໄດ້ຕິດຕາມກວດກາສຸຂະພາບຂອງນັກຮຽນ, ໂດຍສະເພາະແມ່ນ ຜູ້ທີ່ມີພະຍາດປະຈຳຕົວ.
ບົນພື້ນຖານການຈັດຕັ້ງທົດລອງ ພ້ອມກັບການຜັນແປຕົວຈິງຂອງການແຜ່ລະບາດ, ນະຄອນຈະຄິດໄລ່ ການຄ່ອຍໆເປີດກວ້າງບັນດາເປົ້າໝາຍ ທີ່ຈະໄດ້ກັບຄືນໄປຮຽນຢູ່ໂຮງຮຽນໂດຍກົງ.
ຄຳຮຸ່ງ
