ໂດຍໂອ້ລົມກັບນັກຂ່າວຕອນຄ່ຳວັນທີ 6 ທັນວາ, ທ່ານ ດັ້ງຝູກງວຽນ, ເລຂາທິການສະມາຄົມຜັກ ແລະ ໝາກໄມ້ຫວຽດນາມ ໃຫ້ຮູ້ວ່າ ຫວ່າງມໍ່ໆມານີ້, ທີ່ເວທີປາໄສອອນໄລນ໌ “ເຊື່ອມຕໍ່ການສະໜອງ ແລະ ຄວາມຕ້ອງການຕົ້ນໄມ້ໃຫ້ໝາກ” ຈັດຕັ້ງໂດຍ ກຸ່ມບໍລິຫານງານເວທີປາໄສ ຜະລິດຕະພັນກະເສດ 970 ຂອງກະຊວງກະສິກຳ ແລະ ພັດທະນາຊົນນະບົດ ສົມທົບກັບກົມປຸງແຕ່ງຜະລິດຕະພັນກະເສດ ແລະ ພັດທະນາຕະຫຼາດ, ທ່ານ ສະແດງຄວາມເປັນຫ່ວງວ່າ ການສົ່ງອອກຜັກ ແລະ ໝາກໄມ້ ຈະປະສົບກັບຄວາມຫຍຸ້ງຍາກຢ່າງໜ້ອຍ 6-7 ອາທິດທີ່ຈະມາເຖິງ. ເຖິງຢ່າງໃດກໍຕາມ, ການສົ່ງອອກຜັກ ແລະ ໝາກໄມ້ໄປຍັງບັນດາປະເທດ ແລະ ເຂດແຄ້ວນຜ່ານທ່າກຳປັ່ນປ່ຽນຖ່າຍສິນຄ້າຢູ່ພາກໃຕ້ຂອງຈີນ ຈະປະສົບກັບຄວາມຫຍຸ້ງຍາກສຳລັບບັນດາປະເທດ, ບໍ່ພຽງແຕ່ກັບການສົ່ງອອກຂອງຫວຽດນາມເທົ່ານັ້ນ, ຄືດັ່ງບາງອົງການສື່ມວນຊົນໄດ້ນຳສະເໜີຂ່າວ.
 |
| ຈີນບໍ່ຢຸດຊົ່ວຄາວການນຳເຂົ້າຜັກ ແລະ ໝາກໄມ້ຈາກຫວຽດນາມ. (ພາບ: laodong.vn) |
ທ່ານ ດັ້ງຝູກງວຽນ ເນັ້ນໜັກວ່າ: ຈີນກຳລັງຮັດແໜ້ນການຄວບຄຸມການແຜ່ລະບາດຂອງພະຍາດໂຄວິດ-19 ຕາມຍຸດທະສາດ “ ZERO COVID-19”. ເນື່ອງຈາກກົດລະບຽບການກັກກັນທີ່ເຂັ້ມງວດສໍາລັບຄະນະເດີນເຮືອ (ຄະນະເດີນເຮືອຕ້ອງປະຕິບັດການຈຳກັດບໍລິເວນ 6-7 ອາທິດ ຫຼັງຈາກການເດີນທາງປະຕິບັດງານ), ບັນດາຜູ້ຂຸດຄົ້ນກຳປັ່ນບັນທຸກຂົນສົ່ງ ແລະ ປ່ຽນຖ່າຍສິນຄ້າຢູ່ທ່າກຳປັ່ນ ໃນພາກໃຕ້ຂອງຈີນ ໄດ້ຕັດສິນໃຈໂຈະການບໍລິການຢ່າງໜ້ອຍ 6 ອາທິດໃນລະຫວ່າງວັນບຸນປີໃໝ່ປະຈຳຊຊາດປີ 2022.
ບັນດາບໍລິສັດຂົນສົ່ງທະເລໃຫຍ່ຂອງໂລກ ເຊັ່ນ: Ocean Network Express, Hapag-Lloyd ແລະ Evergreen ທັງໝົດໄດ້ແຈ້ງໃຫ້ລູກຄ້າຢຸດການຮັບໃບສັ່ງສິນຄ້າຊົ່ວຄາວ ສໍາລັບສິນຄ້າທີ່ຈະໄປຍັງທ່າກຳປັ່ນຂະຫນາດນ້ອຍໃນເຂດແມ່ນ້ຳ ເຈົາຢາງ ແລະ ແຂວງ Fujian (ປະເທດຈີນ) ເນື່ອງຈາກເຫດຜົນຂ້າງເທິງ. ອີງຕາມກຸ່ມບໍລິສັດ Hapag-Lloyd ແລ້ວ: "ການໂຈະຊົ່ວຄາວນີ້ ແມ່ນເນື່ອງມາຈາກຂໍ້ກໍານົດໃນການຈຳກັດບໍລິເວນ COVID-19 ສໍາລັບຄະນະລູກເຮືອ ທີ່ເດີນທາງລະຫວ່າງພາກໃຕ້ຂອງຈີນ ແລະ ຮ່ອງກົງ ຫຼັງຈາກວັນພັກປີໃຫມ່ປະຈຳຊາດ 2022".
“ສະນັ້ນ, ບໍ່ມີເລ່ືອງທີ່ຈີນ ຈະຢຸດການນຳເຂົ້າຜັກ ແລະ ໝາກໄມ້ຈາກຫວຽດນາມ. ແຕ່ພາຍໃຕ້ລະບຽບການກັກກັນຍ້ອນພະຍາດໂຄວິດ-19 ທີ່ເຄັ່ງຄັດດັ່ງທີ່ກ່າວມາຂ້າງເທິງ, ການຂົນສົ່ງ ແລະ ປ່ຽນຖ່າຍສິນຄ້າຢູ່ບັນດາທ່າກຳປັ່ນຂົນສົ່ງຂະໜາດນ້ອຍ ຖືກຂາດວັກຂາດຕອນ ອາດຈະສ້າງຄວາມກົດດັນໃຫ້ແກ່ການຂົນສົ່ງທາງບົກ” ທ່ານ ດັ້ງຝູກງວຽນ ກ່າວ.
ຄຳຮຸ່ງ
