| ທ່ອງທ່ຽວໄຕ້ຫວັນ ຜ່ານແວ່ນຕາ VR | |
| ບິ່ງລຽວໃນລະດູໜາວ - ສະຖານທີ່ນັດພົບທີ່ປະທັບໃຈຂອງນັກທ່ອງທ່ຽວ |
 |
| ພາບປະກອບ: TTXVN |
ເຖິງວ່າຈຳນວນນັກທ່ອງທ່ຽວຫຼຸດລົງຫຼາຍເມື່ອທຽບໃສ່ປີກາຍ, ແຕ່ຕົວເລກນີ້ຍັງມີຄວາມໝາຍຢ່າງແທ້ຈິງໃນສະພາບການແຜ່ລະບາດຂອງພະຍາດໂຄວິດ-19, ການເຄື່ອນໄຫວທ່ອງທ່ຽວທີ່ໄດ້ຮັບຜົນກະທົບຢ່າງໜັກໜ່ວງ.
ໃນຊຸມປີມໍ່ໆມານີ້, ເມື່ອດອກຕາເວັນປ່າອອກດອກ, ປ່າສະຫງວນແຫ່ງຊາດ ບາວີ ພັດໄດ້ກາຍເປັນຈຸດດຶງດູດນັກທ່ອງທ່ຽວຈາກທຸກແຖບຖິ່ນເຂົ້າມາຊົມດອກໄມ້ປ່າທໍາມະຊາດ, ທີ່ລຽບງ່າຍແຕ່ສວຍງາມຫຼາຍນີ້. ຈໍານວນນັກທ່ອງທ່ຽວ ຈະໄປທ່ຽງຊົມຫຼາຍທີ່ສຸດໃນທ້າຍອາທິດ, ໃນນັ້ນສ່ວນໃຫຍ່ແມ່ນຊາວຫນຸ່ມ. ດ້ວຍທ່າໄດ້ປຽບທີ່ມີດອກໄມ້ທີ່ເປັນເອກະລັກສະເພາະ, ປ່າສະຫງວນແຫ່ງຊາດ ບາວີ ໄດ້ກາຍເປັນສະຖານທີ່ທີ່ຫາຍາກເພື່ອດຶງດູດນັກທ່ອງທ່ຽວໃນປະຈຸບັນ, ເມື່ອພະຍາດໂຄວິດ-19 ພວມກໍ່ຜົນກະທົບຢ່າງໃຫຍ່ຫຼວງຕໍ່ການເຄື່ອນໄຫວທ່ອງທ່ຽວຢູ່ນະຄອນຫຼວງ. ຍ້ອນວ່າໃນເວລານີ້, ຊາວຮ່າໂນ້ຍມັກເລືອກເອົາສະຖານທີ່ໃກ້ຄຽງ, ເຂດກວ້າງໃຫຍ່, ໃກ້ກັບທຳມະຊາດເປັນສະຖານທີ່ທ່ອງທ່ຽວ ແລະ ລົງພຶດຕິກຳຕົວຈິງ.
ທ່ານ ຫງວຽນຟີຮຸ່ງ, ຜູ້ອຳນວຍການສູນສຶກສາສິ່ງແວດລ້ອມ ແລະ ການບໍລິການ ເຂດປ່າສະຫງວນແຫ່ງຊາດ ບາວີ ໃຫ້ຮູ້ວ່າ: ເພື່ອຮັບໃຊ້ຄວາມຕ້ອງການຂອງແຂກທ່ອງທ່ຽວໄດ້ດີກວ່າເກົ່າ, ຄະນະຄຸ້ມຄອງປ່າສະຫງວນໄດ້ຈັດຕັ້ງການບໍລິການທ່ອງທ່ຽວຫຼາຍຢ່າງຄື: ທີ່ພັກ, ເຕັ້ນ, ອາຫານການກິນ... ເກືອບ 100% ແຫຼ່ງຊັບພະຍາກອນມະນຸດໄດ້ຮັບການລະດົມເພື່ອແນະນຳ, ໂຄສະນາໃຫ້ແກ່ນັກທ່ອງທ່ຽວເພື່ອປົກປັກຮັກສາດອກໄມ້ ແລະ ປົກປັກຮັກສາລະບົບນິເວດຂອງປ່າສະຫງວນ.
ລຽບຕາມເສັ້ນທາງ ແລະ ບໍລິເວນປ່າດອກໄມ້, ປ່າສະຫງວນ ໄດ້ຕິດຕັ້ງປ້າຍເຕືອນປະຊາຊົນບໍ່ໃຫ້ລົກຕົ້ນໄມ້, ຫັກງ່າ, ເດັດດອກໄມ້, ຈູດໄຟໃນປ່າ, ຮັກສາສຸຂະອະນາໄມສິ່ງແວດລ້ອມ. ເມື່ອພະຍາດລະບາດຍັງມີການຜັນແປຢ່າງສັບສົນ, ຄະນະຄຸ້ມຄອງປ່າສະຫງວນແຫ່ງຊາດບາວີ ໄດ້ຮຽກຮ້ອງໃຫ້ນັກທ່ອງທ່ຽວປະຕິບັດຕາມສານ 5K ແລະ ປະຕິບັດລະບຽບການອື່ນໆກ່ຽວກັບການປ້ອງກັນ ແລະ ຄວບຄຸມພະຍາດໂຄວິດ-19. ບັນດາສະຖານທີ່ພັກພາອາໄສ ຮັບແຂກທ່ອງທ່ຽວພຽງແຕ່ 50%, ກຸ່ມແຂກທ່ອງທ່ຽວຫຼາຍກວ່າ 30 ຄົນເຂົ້າຮ່ວມກິດຈະກໍາຢູ່ກາງແຈ້ງຕ້ອງປະຕິບັດການວິໄຈຫາເຊື້ອແບບໄວ.
ລະດູດອກຕາເວັນປ່າຢູ່ປ່າສະຫງວນແຫ່ງຊາດ ບາວີ ເລີ່ມແຕ່ຕົ້ນເດືອນພະຈິກ ຫາກາງເດືອນທັນວາ ຂອງທຸກໆປີ. ໃນເວລານີ້, ຈາກປະຕູກວດປີ້ໄປ 400 ແມັດ, ທັງສອງຟາກຂອງເສັ້ນທາງ, ດອກຕາເວັນປ່າຈະເບີກບານຢ່າງງົດງາມ. ໂດຍສະເພາະ, ຜ່ານປ່າແປກ 400 ແມັດ ຈະເປັນປ່າດອກຕາເວັນປ່າທີ່ມີເນື້ອທີ່ກວ່າ 10 ເຮັກຕາ, ລວມມີ 5 ເຂດ. ມີເສັ້ນທາງຍ່າງຍາວກວ່າ 3 ກິໂລແມັດ, ນັກທ່ອງທ່ຽວສາມາດຍ່າງໄປມາໃນທ່າມກາງຜ້າພົມຂອງດອກໄມ້ທີ່ມີສີເຫຼືອງສົດໃສ ປະສົມກັບປ່າໄມ້ສີຂຽວຫຼາຍພັນຕົ້ນ ເພື່ອຮັບຊົມຄວາມງົດງາມຂອງດອກໄມ້.
ຄະນະຄຸ້ມຄອງປ່າສະຫງວນແຫ່ງຊາດ ບາວີ ໄດ້ຄຸ້ມຄອງເຂດດອກໄມ້ເປັນຢ່າງດີ ດ້ວຍການລົງທຶນໃນການດູແລ, ໃສ່ຝຸ່ນ, ລິໃບ, ຕັດກິ່ງງ່າທີ່ຕາຍແລ້ວ ແລະ ຫຍ້າ. ນອກເໜືອເຂດທີ່ດອກຕາເວັນປ່າແລ້ວ, ເຂດດອກໄມ້ກະແຈກກະຈາຍອື່ນໆຍັງໄດ້ຮັບການຄຸ້ມຄອງ ແລະ ປົກປັກຮັກສາຢ່າງສະເໝີຕົ້ນສະເໝີປາຍເພື່ອໃຫ້ມີການເຕີບໂຕທີ່ດີ.
ບຸນຄົງ
