 |
| ພາບປະກອບ: baoquocte.vn |
ໂດຍໄດ້ຮັບຄຳເຊື້ອເຊີນຂອງ ທ່ານປະທານາທິບໍດີສະຫະພັນ ສະວິດ Guy Parmelin ແລະ ທ່ານປະທານາທິບໍດີ ສະຫະພັນ ລັດເຊຍ Vladimir Putin, ທ່ານປະທານປະເທດ ຫວຽດນາມ ຫງວຽນຊວັນຟຸກ ໄດ້ນຳໜ້າຄະນະຜູ້ແທນຂັ້ນສູງ ຫວຽດນາມ ໄປຢ້ຽມຢາມສະຫະພັນ ສະວິດ ແລະ ສະຫະພັນ ລັດເຊຍ ໃນລະຫວ່າງວັນທີ 25 ພະຈິກ ຫາວັນທີ 2 ທັນວາ 2021.
ການຢ້ຽມຢາມແມ່ນເຫດການສຳຄັນ ເພື່ອແນໃສ່ປັບປຸງການພົວພັນສອງຝ່າຍ, ສ້າງພື້ນຖານໃຫ້ແກ່ບັນດາຂົງເຂດຮ່ວມມືໃໝ່ລະຫວ່າງ ຫວຽດນາມ ກັບ ສະວິດ ແລະ ລັດເຊຍ.
ສະວິດແມ່ນສະຖານທີ່ຢ້ຽມຢາມແຫ່ງທຳອິດຂອງ ທ່ານປະທານປະເທດ ຫວຽດນາມ ຫງວຽນຊວັນຟຸກ ໃນການໄປປະຕິບັດງານຄັ້ງນີ້. ການຢ້ຽມຢາມມີຄວາມໝາຍພິເສດ ໃນສະພາບການສະເຫຼີມສະຫຼອງ ວັນສອງປະເທດສ້າງຕັ້ງການພົວພັນທາງການທູດ ຄົບຮອບ 50 ປີ (11 ຕຸລາ 1971 – 11 ຕຸລາ 2021) ແລະ ການຮ່ວມມືພັດທະນາຄົບຮອບ 30 ປີ.
50 ປີແຫ່ງການເພີ່ມພູນຄູນສ້າງການພົວພັນທີ່ເປັນມູນເຊື້ອ
ສະວິດແມ່ນໜຶ່ງໃນບັນດາປະເທດຝ່າຍຕາເວັນຕົກທຳອິດ ທີ່ສ້າງຕັ້ງການພົວພັນທາງການທູດ ກັບ ຫວຽດນາມ ໃນຈຸດເວລາ ຫວຽດນາມ ປະສົບກັບຄວາມຫຍຸ້ງຍາກທີ່ສຸດ, ທັງດຳເນີນການຕໍ່ສູ້ເພື່ອທ້ອນໂຮມປະເທດຊາດ ຢູ່ພາກໃຕ້, ທັງສຸມໃສ່ສ້າງສັງຄົມນິຍົມ ຢູ່ພາກເໜືອ. ໃນຕົວຈິງແລ້ວ, ການພົວພັນສອງຝ່າຍ ໄດ້ສ້າງຕັ້ງຂຶ້ນກ່ອນນັ້ນ ແລະ ຄ່ອຍໆໄດ້ຮັບການເພີ່ມພູນຄູນສ້າງຕາມວັນເວລາ ພ້ອມກັບເຫດການສຳຄັນຫຼາຍຢ່າງ ເຊິ່ງພົ້ນເດັ່ນແມ່ນ ເລື່ອງສະວິດ ເປັນສັກຂີພິຍານໃຫ້ແກ່ສົນທິສັນຍາ ເຊີແນວ ປະຫວັດສາດ, ເຊິ່ງໄດ້ຮັບການຈົດທະບຽນໃນວັນທີ 20 ກໍລະກົດ ປີ 1954 ຮັບຮູ້ ປະເທດ ຫວຽດນາມ ທີ່ມີເອກະລາດ, ອະທິປະໄຕ, ເອກະພາບ ແລະ ຜືນແຜ່ນດິນອັນຄົບຖວ້ນ.
50 ປີທີ່ຜ່ານມາ, ການພົວພັນສອງຝ່າຍນັ້ນບັນລຸໄດ້ບາດກ້າວທີ່ດີພໍສົມຄວນໃນທຸກຂົງເຂດ. ການຮ່ວມມືໃນເບື້ອງຕົ້ນລະຫວ່າງ ສອງປະເທດສຸມໃສ່ການຊ່ວຍເຫຼືອດ້ານມະນຸດສະທຳ ແລະ ໜູນຊ່ວຍການພັດທະນາເປັນຕົ້ນຕໍ. ໃນ 3 ທົດສະວັດຜ່ານມາ, ລັດຖະບານ ສະວິດ ໄດ້ສະໜອງເງິນເປັນຈຳນວນກ່ວາ 600 ລ້ານ USD ເພື່ອໜູນຊ່ວຍການພັດທະນາເສດຖະກິດ ສັງຄົມ ຂອງ ຫວຽດນາມ. ເດືອນມີນາ ປີ 2021, ສະວິດ ໄດ້ປະກາດໂຄງການຮ່ວມມືພັດທະນາ ສະວິດ - ຫວຽດນາມ 2021 – 2024 ດ້ວຍທຶນ ODA 70 ລ້ານ CHF, ຕາມນັ້ນແລ້ວ ຫວຽດນາມ ສືບຕໍ່ແມ່ນໜຶ່ງໃນຈຳນວນໜ້ອຍປະເທດທີ່ນອນໃນບັນຊີລາຍຊື່ຄູ່ຮ່ວມມືບຸລິມະສິດ.
ຊຸມປີຜ່ານມາ, ສອງຝ່າຍໄດ້ດຳເນີນການຢ້ຽມຢາມແລກປ່ຽນຄະນະຂັ້ນສູງ ກ່ວາ 30 ຄັ້ງ. ຫວ່າງມໍ່ໆມານີ້ ແມ່ນການຢ້ຽມຢາມ ຫວຽດນາມ ຂອງທ່ານຮອງປະທານາທິບໍດີ, ລັດຖະມົນຕີການຕ່າງປະເທດ ສະວິດ Ignazio Cassis (ເດືອນສິງຫາ 2021). ແລະປັດຈຸບັນ ແມ່ນການຢ້ຽມຢາມສະວິດ ຢ່າງເປັນທາງການຂອງ ທ່ານປະທານປະເທດ ຫງວຽນຊວັນຟຸກ.
ໂດຍແບ່ງປັນຄວາມຫຍຸ້ງຍາກ ແລະ ສະໜັບສະໜູນບັນດາຄວາມມານະພະຍາຍາມຂອງ ລັດຖະບານ ຫວຽດນາມ ໃນການຮັບມືກັບການລະບາດໂຄວິດ - 19 ຮອບຕ່າງໆ, ໄລຍະຜ່ານມາ ສະວິດ ໄດ້ໜູນຊ່ວຍອຸປະກອນການແພດ 13 ໂຕນໃຫ້ແກ່ ຫວຽດນາມ. ມີວິສາຫະກິດ ສະວິດ ຈຳນວນໜຶ່ງ ກໍ່ຊ່ວຍເຫຼືອ ສະໜັບສະໜູນກອງທຶນວັກຊິນກັນໂຄວິດ - 19 ໂດຍສະຖານທູດ ຫວຽດນາມ ປະຈຳ Bern ປຸກລະດົມ.
ໃນການຮ່ວມມືດ້ານເສດຖະກິດ, ຍອດວົງເງິນການສົ່ງອອກ ນຳເຂົ້າ ລະຫວ່າງ ຫວຽດນາມ ແລະ ສະວິດ ໃນປີ 2020 ແລະ ໃນຊຸມປີ 2016 - 2018 ຮັກສາຢູ່ລະດັບຕ່ຳກ່ວາ 1 ຕື້ USD. ມີບໍລິສັດສະວິດກ່ວາ 100 ແຫ່ງ ລວມມີບັນດາບໍລິສັດທີ່ມີຊື່ສຽງແຖວໜ້າໂລກຄື: Nestle, ABB, Novartis, Roche, Zuellig Pharma, Holcim, Schindler... ໄດ້ປະສົບຜົນສຳເລັດໃນການດຳເນີນທຸລະກິດຢູ່ ຫວຽດນາມ ດ້ວຍຍອດເງິນລົງທຶນເກືອບ 2 ຕື້ USD, ນຳ ສະວິດ ກາຍເປັນນັກລົງທຶນເອີລົບໃຫຍ່ອັນດັບທີ 6 ຢູ່ ຫວຽດນາມ. ເມື່ອຕີລາຄາກ່ຽວກັບການພົວພັນສອງຝ່າຍ ເນື່ອງໃນໂອກາດວັນຫວຽດນາມ ຢູ່ສະວິດ (ເດືອນຕຸລາ 2021), ທ່ານຮອງລັດຖະມົນຕີການຕ່າງປະເທດ ຫວຽດນາມ ດັ້ງຮ່ວາງຢາງ ຖືວ່າ:
ການພົວພັນມິດຕະພາບອັນຍາວນານ ແລະ ມີຊີວິດຊີວານັ້ນ ແມ່ນພື້ນຖານອັນໝັ້ນແກ່ນ ເພື່ອໃຫ້ລັດຖະບານ ແລະ ປະຊາຊົນສອງປະເທດ ເສີມສ້າງ, ພັດທະນາ, ບັນລຸໄດ້ໝາກຜົນທີ່ຕັ້ງໜ້າໃນຫຼາຍຂົງເຂດຢ່າງບໍ່ຢຸດຢັ້ງ. ໃນການຮ່ວມມືພັດທະນາ, ສະວິດ ໄດ້ຮັກສາການຮ່ວມມືພັດທະນາກັບຫວຽດນາມ ໃນຕະຫຼອດໄລຍະ 30 ປີຜ່ານມາ. ບັນດາໂຄງການນັບທັງສອງຝ່າຍ ແລະ ຫຼາຍຝ່າຍລ້ວນແຕ່ປະກອບສ່ວນຢ່າງມີປະສິດທິຜົນໃຫ້ແກ່ບັນດາຜົນງານການພັດທະນາດ້ານເສດຖະກິດສັງຄົມ ແລະ ປະຕິບັດບັນດາເປົ້າໝາຍສະຫັດສະວັດ, ມຸ່ງໄປເຖິງເປົ້າໝາຍພັດທະນາແບບຍືນຍົງຢູ່ ຫວຽດນາມ.
ການພົວພັນສອງຝ່າຍຈະສືບຕໍ່ເປີດກວ້າງ ແລະ ເຂົ້າສູ່ລວງເລິກ
ອາດເວົ້າໄດ້ວ່າຜົນງານດີເດັ່ນທີ່ສຸດ ເຊິ່ງ ຫວຽດນາມ ແລະ ສະວິດ ບັນລຸໄດ້ໃນ ໄລຍະ 50 ປີຜ່ານມາ ແມ່ນຄວາມໄວ້ເນື້ອເຊື່ອໃຈ ແລະ ຄວາມເຂົ້າໃຈເຊິ່ງກັນແລະກັນໃນຫຼາຍຂົງເຂດ, ການແບ່ງປັນບັນດາມູນຄ່າລວມຂອງທົ່ວໂລກ ແລະ ພິເສດແມ່ນການສະໜິດຕິດພັນ ລະຫວ່າງປະຊາຊົນສອງປະເທດ.
ດ້ວຍລັກສະນະເພີ່ມເຕີມຂອງສອງພື້ນຖານເສດຖະກິດ ແລະ ກຳລັງໜູນດ້ານການເມືອງຢ່າງແຮງຄືໃນປັດຈຸບັນ, ການພົວພັນຮ່ວມມືຂອງ ຫວຽດນາມ - ສະວິດ ຈະສືບຕໍ່ເປີດກວ້າງ ແລະ ເຂົ້າສູ່ລວງເລິກ, ຫັນຄວາມສາມາດບົ່ມຊ້ອນອັນໃຫຍ່ຫຼວງໃນການຮ່ວມມືດ້ານເສດຖະກິດ, ການຄ້າ ແລະ ການລົງທຶນ, ການດູແລສຸຂະພາບໃຫ້ປະກົດຜົນເປັນຈິງ. ເລື່ອງການລົງນາມສັນຍາການຄ້າເສລີ (FTA) ລະຫວ່າງ ຫວຽດນາມ ແລະ ສະຫະສະມາຄົມການຄ້າເສລີ ເອີລົບ (EFTA) ເຊິ່ງ ສະວິດ ແມ່ນໜຶ່ງໃນບັນດາປະເທດສ້າງຕັ້ງ ຈະສ້າງກຳລັງໜູນໃຫຍ່ໃຫ້ແກ່ການພົວພັນດ້ານເສດຖະກິດ ແລະ ການຄ້າສອງຝ່າຍ. ໂດຍແບ່ງປັນເນື່ອງໃນເຫດການວັນຫວຽດນາມ ຢູ່ ສະວິດ, ທ່ານເອກອັກຄະລັດຖະທູດ ສະວິດ ປະຈຳ ຫວຽດນາມ Ivo Sieber ເຊື່ອໝັ້ນວ່າ:
ຂ້າພະເຈົ້າມີຄວາມເຊື່ອໝັ້ນຕໍ່ອະນາຄົດຂອງ 2 ປະເທດ ດ້ວຍພື້ນຖານອັນໝັ້ນແກ່ນ ຂອງການພົວພັນລະຫວ່າງສະວິດ ແລະ ຫວຽດນາມ. ພວກເຮົາມີການຮ່ວມມືກັນຢ່າງກ້ວາງຂວາງໃນຫຼາຍຂົງເຂດຄື: ການເມືອງ, ເສດຖະກິດ, ວັດທະນະທຳ, ການຄົ້ນຄ້ວາ. ຂ້າພະເຈົ້າຄິດວ່ານີ້ແມ່ນບັນດາຂົງເຂດເຊິ່ງພວກເຮົາສືບຕໍ່ເພີ່ມທະວີການຮ່ວມມື. ທັງສອງປະເທດພວມເຈລະຈາສັນຍາການຄ້າເສລີ ແລະ ພວກຂ້າພະເຈົ້າເຊື່ອໝັ້ນວ່າ ວິວັດກາເຈລະຈາອາດຈະສິ້ນສຸດໂດຍໄວ, ສ້າງກາລະໂອກາດທາງການຄ້າຫຼາຍຢ່າງ, ຕັ້ງພື້ນຖານເສດຖະກິດຢ່າງໝັ້ນແກ່ນກ່ວາອີກ. ພາຍຫຼັງເປີດປະຕູຄືນໃໝ່, ພວກເຮົາຈະພັດທະນາການທ່ອງທ່ຽວ, ການພົວພັນແລກປ່ຽນລະຫວ່າງນັກທຸລະກິດ, ນັກການເມືອງ ແລະ ບັນດານັກຄົ້ນຄ້ວາ ຢ່າງແຮງກ່ວາອີກ. ສິ່ງນີ້ຈະເປີດກາລະໂອກາດເພື່ອເພີ່ມທະວີການຮ່ວມມືໃນອະນາຄົດ.
ບັນດາຜົນງານເຊິ່ງ ຫວຽດນາມ ແລະ ສະວິດ ບັນລຸໄດ້ໃນ 50 ປີຜ່ານມາໄດ້ສະແດງໃຫ້ເຫັນຄວາມສາມາດບົ່ມຊ້ອນຂອງສາຍພົວພັນຮ່ວມມືຫວຽດນາມ - ສະວິດ. ການຢ້ຽມຢາມສະຫະພັນ ສະວິດ ຢ່າງເປັນທາງການຂອງ ທ່ານປະທານປະເທດ ຫງວຽນຊວັນຟຸກ ຄັ້ງນີ້ ຈະປະກອບສ່ວນປັບປຸງນ້ຳໃຈມິດຕະພາບ, ຢັ້ງຢືນຄຳໝັ້ນສັນຍາສືບຕໍ່ຮ່ວມມື, ສ້າງພື້ນຖານໃຫ້ແກ່ການພົວພັນສອງຝ່າຍ ເປີດກວ້າງ ແລະ ເພີ່ມທະວີໃນອະນາຄົດ.
ບຸນຄົງ
