ໂດຍໄດ້ຮັບຄຳເຊີນຂອງ ທ່ານປະທານາທິບໍດີ ສະຫະພັນ ສະວິດ Guy Parmelin ແລະ ທ່ານປະທານາທິບໍດີສະຫະພັນ ລັດເຊຍ Vladimir Putin, ທ່ານປະທານປະເທດ ຫວຽດນາມ ຫງວຽນຊວນຟຸກ ໄດ້ນຳໜ້າຄະນະຜູ້ແທນຂັ້ນສູງຫວຽດນາມ ໄປຢ້ຽມຢາມສະຫະພັນ ສະວິດ ແລະ ສະຫະພັນ ລັດເຊຍ ຢ່າງເປັນທາງການ ແຕ່ວັນທີ 25 ພະຈິກ - 2 ທັນວາ 2021.
 |
| ທ່ານເອກອັກຄະລັດຖະທູດ Bezdetko Gennady |
ໃນໂອກາດນີ້, ທ່ານເອກອັກຄະລັດຖະທູດ Bezdetko Gennady ໄດ້ໃຫ້ການຕອບສໍາພາດຕໍ່ວາລະສານ ຍຸກສະໄໝ. ທ່ານເອກອັກຄະລັດຖະທູດໄດ້ເນັ້ນໜັກວ່າ: “ການພົວພັນຕ່າງປະເທດປະຊາຊົນມີຄວາມສໍາຄັນເປັນພິເສດໃນການພົວພັນສອງປະເທດລັດເຊຍ - ຫວຽດນາມ. ນັບແຕ່ເວລາສ້າງຕັ້ງການພົວພັນທາງການທູດ, ມີພົນລະເມືອງຫວຽດນາມຫລາຍຄົນໄດ້ໄປເຮັດວຽກ ແລະ ຮ່ຳຮຽນຢູ່ປະເທດພວກຂ້າພະເຈົ້າ.
ເນື່ອງຈາກມີຄວາມຮູ້ ແລະ ປະສົບການທີ່ໄດ້ຮ່ຳຮຽນຢູ່ມະຫາວິທະຍາໄລ ໂຊວຽດ ແລະ ລັດເຊຍ, ມີຫຼາຍຄົນໄດ້ປະສົບຜົນສຳເລັດດີເດັ່ນໃນດ້ານຕ່າງໆ ແລະ ສືບຕໍ່ປະກອບສ່ວນສຳຄັນເຂົ້າໃນການພັດທະນາເສດຖະກິດ - ສັງຄົມ ຫວຽດນາມ. ເຂົາເຈົ້າແມ່ນຊັບສົມບັດອັນລ້ຳຄ່າລວມຂອງພວກເຮົາ, ເປັນຂົວຕໍ່ ແລະ ເສີມຂະຫຍາຍມູນເຊື້ອມິດຕະພາບລະຫວ່າງປະຊາຊົນສອງປະເທດ ລັດເຊຍ ແລະ ຫວຽດນາມ ຈາກລຸ້ນຄົນນີ້ສູ່ລຸ້ນຄົນຕໍ່ໆໄປ”.
ທ່ານເອກອັກຄະລັດຖະທູດໃຫ້ຮູ້ວ່າ ອົງການສະຫະພັນກ່ຽວກັບ ປະຊາຄົມບັນດາປະເທດ ເອກະລາດ, ພໍ່ແມ່ພີ່ນ້ອງທີ່ອາໄສຢູ່ຕ່າງປະເທດ ແລະ ການຮ່ວມມືດ້ານມະນຸດສະທຳສາກົນ ໄດ້ດຳເນີນງານພາຍໃຕ້ການໜູນຊ່ວຍຂອງກະຊວງການຕ່າງປະເທດ ລັດເຊຍ.
ສຳນັກງານຜູ້ຕາງໜ້າຂອງອົງການນີ້ຢູ່ຫວຽດນາມ ໄດ້ເອີ້ນຊື່ວ່າ ສູນວິທະຍາສາດ ແລະ ວັດທະນະທຳ ລັດເຊຍ, ປະຈຸບັນພວມດໍາເນີນງານໂດຍກົງກັບບັນດາກະຊວງ, ອົງການທີ່ກ່ຽວຂ້ອງພ້ອມກັບບັນດາອົງການ ແລະ ບັນດານັກເຄື່ອນໄຫວສັງຄົມ, ເຊິ່ງນໍາມາການປະກອບສ່ວນຢ່າງໃຫຍ່ຫຼວງເຂົ້າໃນການຊຸກຍູ້ການຮ່ວມມືລະຫວ່າງ ລັດເຊຍ - ຫວຽດນາມ ໃນດ້ານມະນຸດສະທຳ ແລະ ປັບປຸງການພົວພັນລະຫວ່າງບັນດາທ້ອງຖິ່ນຂອງສອງປະເທດ. ສະຫະພັນລັດເຊຍ ຄາດວ່າຈະສືບຕໍ່ໃຫ້ຄວາມເອົາໃຈໃສ່ທີ່ສຸດໃຫ້ແກ່ການພັດທະນາການຮ່ວມມືໃນຂົງເຂດສຳຄັນນີ້.
ທ່ານເອກອັກຄະລັດຖະທູດ Bezdetko Gennady ຢືນຢັນວ່າ: “ຄູ່ຮ່ວມມືຕົ້ນຕໍຂອງພວກຂ້າພະເຈົ້າແມ່ນສະຫະພັນບັນດາອົງການມິດຕະພາບ ຫວຽດນາມ. ດ້ວຍຄະນະການນຳຂອງສະຫະພັນບັນດາອົງການມິດຕະພາບຫວຽດນາມ, ພວກຂ້າພະເຈົ້າໄດ້ສ້າງຕັ້ງການຮ່ວມມືຢ່າງມີປະສິດທິຜົນໃນທຸກບັນຫາ, ໃນນັ້ນມີການຈັດຕັ້ງ ແລະ ດຳເນີນບັນດາການເຄື່ອນໄຫວຮ່ວມກັນສະເຫຼີມສະຫຼອງບັນດາວັນພັກໃນປະຫວັດສາດຂອງລັດເຊຍ, ຫວຽດນາມ ແລະ ການພົວພັນສອງຝ່າຍລະຫວ່າງພວກເຮົາ”.
ກ່ຽວກັບເນື້ອໃນຕົ້ນຕໍຂອງການຢ້ຽມຢາມລັດເຊຍໃນຄັ້ງນີ້ຂອງ ທ່ານປະທານປະເທດ ຫງວຽນຊວນຟຸກ, ທ່ານ ເອກອັກຄະລັດຖະທູດ ຖືວ່າ, ນີ້ແມ່ນໜຶ່ງໃນບັນດາເຫດການສຳຄັນໃນໂຄງການດຳເນີນງານຂອງສອງປະເທດໃນປີນີ້, ຄາດວ່າຈະນຳມາເຊິ່ງການຊຸກຍູ້ການພົວພັນຄູ່ຮ່ວມມືຍຸດທະສາດຮອບດ້ານ ຫວຽດນາມ - ລັດເຊຍ ໃນຫຼາຍຂົງເຂດ, ຮັບປະກັນການສືບຕໍ່ພັດທະນາການພົວພັນລະຫວ່າງສອງປະເທດຂຶ້ນສູ່ລະດັບສູງໃໝ່.
ຜ່ານການຢ້ຽມຢາມ, ຫວຽດນາມ ແລະ ສະຫະພັນ ລັດເຊຍ ຈະດຳເນີນການແລກປ່ຽນຢ່າງລະອຽດກ່ຽວກັບການສືບຕໍ່ການເພີ່ມທະວີ ແລະ ປະຕິບັດໂຄງປະກອບການຄ້າລະຫວ່າງ 2 ປະເທດໃຫ້ສົມບູນແບບ, ຊຸກຍູ້ການຮ່ວມມືໃນບັນດາຂົງເຂດດັ້ງເດີມ ແລະ ບັນດາຂົງເຂດທີ່ມີແງ່ຫວັງ, ລວມມີ: ການສະໜອງ ແລະ ນຳໃຊ້ອາຍແກັສແຫຼວ (LNG). ການປະກອບລົດໃຫຍ່, ໄຟຟ້າ, ການທະນາຄານແລະການເງິນ.
ພິເສດ, ສະຫະພັນ ລັດເຊຍ ມີຄວາມສົນໃຈໃນການເປີດກວ້າງການຮ່ວມມືໃນຂົງເຂດປ້ອງກັນຊາດ, ປ້ອງກັນຄວາມສະຫງົບ, ບຳລຸງສ້າງວິຊາຊີບໃຫ້ບັນດາທະຫານຫວຽດນາມ ຢູ່ບັນດາມະຫາວິທະຍາໄລວິຊາສະເພາະຂອງລັດເຊຍ.
ທ່ານເອກອັກຄະລັດຖະທູດ ເນັ້ນໜັກວ່າ ຫວຽດນາມ - ລັດເຊຍ ຈະສືບຕໍ່ສົມທົບກັນຢ່າງແໜ້ນແຟ້ນໃນຂົງເຂດການສຶກສາ ແລະ ບຳລຸງສ້າງບຸກຄະລາກອນ, ພ້ອມກັນນັ້ນ ກໍ່ເປີດກວ້າງການຮ່ວມມືດ້ານວັດທະນະທຳ ແລະ ທ່ອງທ່ຽວ, ສ້າງຕັ້ງບັນດາການພົບປະແລກປ່ຽນກັບມະຫາຊົນ, ບັນດາອົງການຊາວໜຸ່ມຂອງ 2 ປະເທດ.
ໜຶ່ງໃນບັນດາຂົງເຂດຮ່ວມມືອັນຈຳເປັນ ແລະ ຮີບດ່ວນແມ່ນການຕ້ານການແຜ່ລະບາດຂອງພະຍາດໂຄວິດ-19, ຫຼຸດຜ່ອນຜົນສະທ້ອນທາງລົບຕໍ່ສຸຂະພາບຂອງປະຊາຊົນສອງປະເທດ. ໃນໄລຍະຈະມາເຖິງ, ລັດເຊຍ ຢືນຢັນການເພີ່ມທະວີການຮ່ວມມືກັບ ຫວຽດນາມ ໃນການປ້ອງກັນພະຍາດໂຄວິດ-19, ພ້ອມກັບການຄົ້ນຄ້ວາ, ຜະລິດວັກຊີນ, ຢາປົວພະຍາດ ແລະ ແບ່ງປັນບົດຮຽນໃນການປ້ອງກັນພະຍາດ.
ທ່ານເອກອັກຄະລັດຖະທູດ Bezdetko Gennady ເຊື່ອໝັ້ນວ່າ ການຢ້ຽມຢາມຂອງທ່ານປະທານປະເທດ ຫງວຽນຊວນຟຸກ ຈະປະສົບຜົນສຳເລັດຢ່າງຈົບງາມ ແລະ ຈະກາຍເປັນອີກບາດກ້າວທີ່ສຳຄັນເພື່ອແນໃສ່ເພີ່ມທະວີການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງ ລັດເຊຍ - ຫວຽດນາມ.
ຄາດວ່າ, ທ່ານປະທານປະເທດ ຫງວຽນຊວນຟຸກ ແລະ ທ່ານປະທານາທິບໍດີ Vladimir Putin ຈະມີການແລກປ່ຽນບັນດາທິດທາງໃຫຍ່ທີ່ມີລັກສະນະຍຸດທະສາດສຳຄັນ, ພ້ອມກັນນັ້ນ ກໍ່ແກ້ໄຂບັນດາຂໍ້ຄົງຄ້າງ, ຕິດຄັດ ເພື່ອສ້າງບາດກ້າວບຸກທະລຸໃໝ່ໃນການພົວພັນ ຫວຽດນາມ - ສະຫະພັນ ລັດເຊຍ.
ໄຊພອນ
