 |
| ມອບຫຼຽນກາລະນຶກ "ເພື່ອສັນຕິພາບ ແລະມິດຕະພາບລະຫວ່າງບັນດາຊາດ" ໃຫ້ແກ່ ທ່ານເອກອັກຄະລັດຖະທູດ Kari Kahiluoto. ພາບ: ຕວນຫວຽດ |
ວັນທີ 10 ສິງຫາ, ຢູ່ຮ່າໂນ້ຍ, ໂດຍຕາງໜ້າໃຫ້ຄະນະປະທານສະຫະພັນບັນດາອົງການມິດຕະພາບຫວຽດນາມ, ທ່ານນາງ ເອກອັກຄະລັດຖະທູດ ຫງວຽນເຟືອງງາ - ປະທານສະຫະພັນບັນດາອົງການມິດຕະພາບຫວຽດນາມ ໄດ້ມອບຫຼຽນກາລະນຶກ "ເພື່ອສັນຕິພາບ ແລະມິດຕະພາບລະຫວ່າງບັນດາຊາດ" ໃຫ້ແກ່ ທ່ານ Kari Kahiluoto ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງສາທາລະນະລັດແຟງລັງ ປະຈຳ ຫວຽດນາມ.
ນີ້ແມ່ນລາງວັນອັນລ້ຳຄ່າທີ່ສຸດເຊິ່ງສະຫະພັນບັນດາອົງການຈັດຕັ້ງມິດຕະພາບຫວຽດນາມມອບໃຫ້ ທ່ານເອກອັກຄະລັດຖະທູດ Kari Kahiluoto ເນື່ອງໃນໂອກາດສິ້ນສຸດອາຍຸການເຮັດວຽກຂອງທ່ານເອກອັກຄະລັດຖະທູດ.
ທ່ານນາງ ເອກອັກຄະລັດຖະທູດ ຫງວຽນເຟືອງງາ ໃຫ້ຮູ້ວ່າ: ຫວຽດນາມ ແລະແຟງລັງ ໄດ້ສ້າງຕັ້ງການພົວພັນທາງການທູດນັບແຕ່ປີ 1973. ໃນຕະຫຼອດໄລຍະເກືອບ 50 ປີທີ່ຜ່ານມາ, ການພົວພັນມິດຕະພາບທີ່ເປັນມູນເຊື້ອລະຫວ່າງສອງປະເທດໄດ້ພັດທະນາຢ່າງບໍ່ຢຸດຢັ້ງ ແລະເຂົ້າສູ່ລວງເລິກໃນຫຼາຍຂົງເຂດຄື: ເສດຖະກິດ, ການຄ້າ, ການສຶກສາ, ເຕັກໂນໂລຢີສູງ, ນະວັດຕະກໍາໃໝ່, start up, ນໍ້າສະອາດ, ພະລັງງານທີ່ສະອາດ ແລະການພົບປະແລກປ່ຽນປະຊາຊົນ...
ໃນໄລຍະດຳລົງຕຳແໜ່ງ ຢູ່ຫວຽດນາມ, ດ້ວຍປະສົບການ ແລະຄວາມສຸດອົກສຸດໃຈຂອງຕົນ, ທ່ານເອກອັກຄະລັດຖະທູດ Kari Kahiluoto ໄດ້ປະກອບສ່ວນອັນສຳຄັນເຂົ້າໃນການເພີ່ມທະວີ ແລະຊຸກຍູ້ສາຍພົວພັນມິດຕະພາບທີ່ເປັນມູນເຊື້ອ ແລະການຮ່ວມມືລະຫວ່າງຫວຽດນາມ ແລະແຟງລັງ, ເຮັດໃຫ້ເກີດຄວາມປະທັບໃຈອັນດີງາມຢູ່ໃນໃຈຂອງຄົນຫວຽດນາມ.
ທ່ານນາງ ເອກອັກຄະລັດຖະທູດ ຫງວຽນເຟືອງງາ ຫວັງວ່າ ເຖິງວ່າໃນຖານະຕຳແໜ່ງໃດກໍ່ຕາມ ແຕ່ທ່ານເອກອັກຄະລັດຖະທູດ Kari Kahiluoto ກໍ່ຈະສືບຕໍ່ມີການປະກອບສ່ວນໃນການປັບປຸງ, ພັດທະນາການພົວພັນມິດຕະພາບທີ່ເປັນມູນເຊື້ອ ລະຫວ່າງຫວຽດນາມ ແລະແຟງລັງ ໃຫ້ຫຼາຍກວ່າອີກ.
ທ່ານເອກອັກຄະລັດຖະທູດ Kari Kahiluoto ກໍ່ໄດ້ສະແດງຄວາມຂອບອົກຂອບໃຈຕໍ່ສະມາຄົມມິດຕະພາບຫວຽດນາມ - ແຟງລັງ (ສະມາຊິກຂອງສະຫະພັນບັນດາອົງການຈັດຕັ້ງມິດຕະພາບຫວຽດນາມ) ທີ່ໄດ້ໃຫ້ການໜູນຊ່ວຍຕົນໃນຕະຫຼອດໄລຍະທີ່ດໍາລົງຕໍາແໜ່ງ; ຢືນຢັນວ່າຈະສືບຕໍ່ມານະພະຍາຍາມປະກອບສ່ວນເຂົ້າໃນການເພີ່ມພູນຄູນສ້າງສາຍພົວພັນມິດຕະພາບລະຫວ່າງປະຊາຊົນສອງປະເທດ, ປະກອບສ່ວນເຂົ້າໃນການປັບປຸງ ແລະພັດທະນາສາຍພົວພັນມິດຕະພາບ ຫວຽດນາມ-ແຟງລັງ.
ໄຊພອນ
