 |
| ພິທີມອບໃບຢັ້ງຢືນ ແລະໃບປະກາດສໍາເລັດຊຸດຮຽນພາສາຫວຽດນາມ ແລະວິຊາສະເພາະໃຫ້ນັກສຶກສາລາວ ຢູ່ມະຫາວິທະຍາໄລກວ໋າງນາມ. ພາບ: ຮ.ເຈືອງ |
ເພື່ອຮັບປະກັນໃຫ້ນັກສຶກສາແຂວງເຊກອງ ແລະຈໍາປາສັກ ເຂົ້າຮຽນຢ່າງທັນການ, ແຂວງກວ໋າງນາມ ໄດ້ສືບຕໍ່ຮັບ ແລະມອບທຶນສຶກສາ 45 ທຶນ ໃຫ້ນັກສຶກສາລາວຈາກແຂວງເຊກອງ ແລະຈໍາປາສັກ ໄປຮຽນພາສາຫວຽດນາມ ໃນສົກຮຽນ 2021 – 2022, ຫຼັງຈາກນັ້ນ ໄປຮຽນວິຊາສະເພາະ ຢູ່ ມະຫາວິທະຍາໄລ ແລະວິທະຍາໄລຕ່າງໆໃນແຂວງ.
ເພື່ອສ້າງກາລະໂອກາດ ແລະເງື່ອນໄຂສະດວກໃຫ້ນັກສຶກສາລາວ ໄດ້ຮ່ຳຮຽນ, ນັບແຕ່ປີ 2019 ຮອດປະຈຸບັນ, ແຂວງກວ໋າງນາມ ໄດ້ປະຕິບັດນະໂຍບາຍທຶນການສຶກສາ ແລະຫໍພັກໂດຍບໍ່ເສຍຄ່າໃຫ້ນັກສຶກສາລາວທຶນສ່ວນຕົວມາຮຽນພາສາຫວຽດນາມ ແລະວິຊາສະເພາະ.
ປະຈຸບັນ, ມີນັກສຶກສາລາວ 235 ຄົນພວມຮຽນພາສາຫວຽດນາມ ແລະວິຊາສະເພາະຄື: ຫວຽດນາມວິທະຍາ, ເຕັກໂນໂລຢີຂໍ້ມູນຂ່າວສານ... ຢູ່ບັນດາມະຫາວິທະຍາໄລ ແລະວິທະຍາໄລແຂວງກວ໋າງນາມ.
ນັບແຕ່ສົກຮຽນ 2006-2007 ມາຮອດປະຈຸບັນ, ແຕ່ລະປີ, ແຂວງກວ໋າງນາມ ໄດ້ຮັບ ແລະມອບທຶນການສຶກສາໃຫ້ນັກສຶກສາທີ່ມາຈາກແຂວງຈໍາປາສັກ ແລະ ເຊກອງ ມາຮຽນພາສາຫວຽດນາມ ແລະວິຊາສະເພາະ ຈໍານວນ 40-50 ຄົນ. ພາຍຫຼັງການບຳລຸງມາເປັນເວລາ 10 ກວ່າປີ, ນັກສຶກສາລາວຫຼາຍຮ້ອຍຄົນ ທີ່ ຮຽນຈົບມະຫາວິທະຍາໄລ ແລະວິທະຍາໄລຕ່າງໆໃນແຂວງໄດ້ກັບຄືນໄປປະຕິບັດງານ ຢູ່ ລາວ. ປະຈຸບັນນີ້, ນັກສຶກສາລາວຫຼາຍຄົນພວມດຳລົງຕຳແໜ່ງສຳຄັນໃນອົງການ ແລະວິສາຫະກິດໃນປະເທດຂອງຕົນ.
ດ້ວຍບັນດາວຽກງານທີ່ແທດຈິງ, ແຂວງກວ໋າງນາມ ໄດ້ປະກອບສ່ວນບຳລຸງສ້າງແຫຼ່ງຊັບພະຍາກອນມະນຸດໃຫ້ແກ່ປະເທດເພື່ອນມິດລາວ, ພ້ອມກັນນັ້ນກໍ່ເພີ່ມພູນຄູນສ້າງນ້ຳໃຈອັນສັກສິດ, ໝັ້ນແກ່ນລະຫວ່າງສອງປະເທດຫວຽດນາມ - ລາວ ອ້າຍນ້ອງ.
ໄຊພອນ
