 |
| ທ່ານນາຍົກລັດຖະມົນຕີ ຟ້າມມິງຈິງ ແລະ ທ່ານ Pascal Soriot, ຜູ້ອຳນວຍການໃຫຍ່ ຝ່າຍບໍລິຫານບໍລິສັດ AstraZeneca (ພາບ: dangcongsan.vn) |
ຕອນເຊົ້າວັນທີ 2 ພະຈິກ (ຕາມເວລາ ອັງກິດ), ຢູ່ສູນ Engine Works, Glasgow, ອັງກິດ ໃນຂອບເຂດການໄປປະຕິບັດງານເຂົ້າຮ່ວມກອງປະຊຸມສຸດຍອດ COP 26 ແລະ ຢ້ຽມຢາມ, ເຮັດວຽກຢູ່ ອັງກິດ, ທ່ານນາຍົກລັດຖະມົນຕີ ຟ້າມມິງຈິງ ໄດ້ໃຫ້ການຕ້ອນຮັບທ່ານ Pascal Soriot, ຜູ້ອຳນວຍການໃຫຍ່ ຝ່າຍບໍລິຫານບໍລິສັດ AstraZeneca ແລະ ເປັນສັກຂີພະຍານພິທີລົງນາມຂໍ້ຕົກລົງການຮ່ວມມື (MOU) ລະຫວ່າງ AstraZeneca ແລະ ກະຊວງສາທາລະນະສຸກ ຫວຽດນາມ ແລະ ສັນຍາຊື້ວັກຊິນ 25 ລ້ານໂດສ ແລະ ຜະລິດຕະພັນສຳຮອງ ໂຄວິດ - 19 ກັບ VNVC.
ກ່າວຄຳເຫັນທີ່ພິທີລົງນາມຂໍ້ຕົກລົງ, ທ່ານນາຍົກລັດຖະມົນຕີ ໄດ້ຕີລາຄາສູງບົດບາດຂອງ ບໍລິສັດ AstraZeneca ໃນຄວາມມານະພະຍາຍາມຕ້ານໂລກລະບາດໂຄວິດ - 19 ໃນທົ່ວໂລກ. ທ່ານນາຍົກລັດຖະມົນຕີ ໄດ້ສະແດງຄວາມຂອບອົກຂອບໃຈຕໍ່ບັນດາການປະກອບສ່ວນຂອງ AstraZeneca ຕໍ່ຂະແໜງການແພດ ຫວຽດນາມ, ສະໜອງວັກຊິນ AstraZeneca ເກືອບ 20 ລ້ານໂດສ ໂດຍແມ່ນວັກຊິນກັນໂຄວິດ - 19 ທຳອິດຢູ່ ຫວຽດນາມ ທີ່ໄດ້ຮັບການອະນຸຍາດ.
ໃນສະພາບການໂລກລະບາດໂຄວິດ - 19 ຍັງມີການຜັນແປຢ່າງສັບສົນ, ຍາກທີ່ຈະຄາດຄະເນລ່ວງໜ້າໄດ້ນັ້ນ, ທ່ານນາຍົກລັດຖະມົນຕີ ໄດ້ສະເໜີໃຫ້ AstraZeneca ສືບຕໍ່ໜູນຊ່ວຍ ຫວຽດນາມ ໃນການປ້ອງກັນ, ຕ້ານໂລກລະບາດໂຄວິດ - 19 ໃນປີ 2022. ທ່ານນາຍົກລັດຖະມົນຕີ ສະເໜີໃຫ້ AstraZeneca ສືບຕໍ່ໜູນຊ່ວຍ ຫວຽດນາມ ໃນວຽກງານປ້ອງກັນ ຕ້ານໂລກລະບາດໂຄວິດ - 19, ສະເໜີມອບຮັບວັກຊິນ ຕາມສັນຍາ ແລະ ການຮ່ວມມືມອບຮັບວັກຊິນ, ຢາປິ່ນປົ່ວພະຍາດໂຄວິດ - 19 ປີ 2022 ໂດຍໄວ. ທ່ານນາຍົກລັດຖະມົນຕີ ໄດ້ສະເໜີໃຫ້ AstraZeneca ສົມທົບກັນໜູນຊ່ວຍ ຫວຽດນາມ ຍົກສູງກຳລັງຄວາມສາມາດທາງການແພດ, ລວມມີການບຳລຸງສ້າງຖັນແຖວພະນັກງານການແພດ, ການຮ່ວມມືວັກຊິນເພື່ອຕ້ານເຊື້ອໄວຣັດສາຍພັນໃໝ່, ວັກຊິນສຳລັບເດັກນ້ອຍ ແລະ ຢາປິ່ນປົວພະຍາດຊະນິດຕ່າງໆ...
ສ່ວນທ່ານ Pascal Soriot ຜູ້ອຳນວຍການໃຫຍ່ ຝ່າຍບໍລິຫານ AstraZeneca ໄດ້ຕີລາຄາສູງຄວາມມານະພະຍາຍາມ ແລະ ໝາກຜົນໃນການປ້ອງກັນ, ຕ້ານໂລກລະບາດໂຄວິດ - 19 ຂອງ ຫວຽດນາມ ແລະ ໃຫ້ຄຳໝັ້ນສັນຍາຈະມອບວັກຊິນທີ່ຍັງເຫຼືອໃນສັນຍາທີ່ໄດ້ຮັບການລົງນາມແລ້ວ ໃນເດືອນພະຈິກຂອງປີນີ້. ທ່ານ Pascal Soriot ໃຫ້ຮູ້ວ່າ AstraZeneca ມີຄຳໝັ້ນສັນຍາຍາວນານກັບ ຫວຽດນາມ, ບໍ່ພຽງແຕ່ໃນການເຄື່ອນໄຫວສະໜອງວັກຊິນ ເທົ່ານັ້ນ ຫາກຍັງແມ່ນການລົງທຶນຜະລິດຢູ່ ຫວຽດນາມ ອີກດ້ວຍ.
ທ່ານ Pascal Soriot ໃຫ້ຮູ້ວ່າ ນອກການການລົງທຶນປະມານ 220 ລ້ານ USD ໃນໄລຍະ 2020 – 2024 ທີ່ໄດ້ໃຫ້ຄຳໝັ້ນສັນຍາ, AstraZeneca ຈະລົງທຶນຕື່ມອີກ 90 ລ້ານ USD ເພື່ອແນໃສ່ໜູນຊ່ວຍ ຫວຽດນາມ ຍົກສູງກຳລັງຄວາມສາມາດໃນການຜະລິດການຢາພາຍໃນປະເທດ, ໃນເບື້້ອງຕົ້ນຈະມີຜະລິດຕະພັນການຢາກັນພະຍາດທີ່ບໍ່ຕິດແປດ 3 ຊະນິດໃນໄລຍະ 2022 – 2030. ຜູ້ອຳນວຍການໃຫຍ່ ຝ່າຍບໍລິຫານ AstraZeneca ໃຫ້ຮູ້ວ່າ ພວມພິຈາລະນາການຮ່ວມມືຜະລິດ ຫຼື ຖ່າຍທອດເຕັກໂນໂລຢີຜະລິດວັກຊິນກັນໂຄວິດ - 19 ໃຫ້ ຫວຽດນາມ, ສ້າງໂຮງງານຜະລິດຢາ, ວັກຊິນ, ຜະລິດຕະພັນການແພດຢູ່ ຫວຽດນາມ.
ສອງຝ່າຍໄດ້ເຫັນດີເປັນເອກະພາບເພີ່ມທະວີການໜູນຊ່ວຍສົມທົບກັນລົງທຶນເຂົ້າຂົງເຂດຄົ້ນຄ້ວາຜະລິດການຢາມຸ່ງໄປເຖິງເປົ້າໝາຍພັດທະນາການຂະແໜງສາທາລະນະສຸກແບບຍືນຍົງ.
ບຸນຄົງ
