ທ່ານເອກອັກຄະລັດຖະທູດ Park Noh Wan ປະກາດວ່າ ສ.ເກົາຫຼີ ຈະສະໜັບສະໜູນລັດຖະບານ ແລະ ປະຊາຊົນຫວຽດນາມ ດ້ວຍວັກຊີນ Astra Zeneca 1,1 ລ້ານໂດສ ແລະ ຄາດວ່າຈະມາຮອດຫວຽດນາມ ໃນວັນທີ 13 ຕຸລາ; ໃນຂະນະນັ້ນ, ສ.ເກົາຫຼີຈະສືບຕໍ່ພິຈາລະນາການໜູນຊ່ວຍດ້ານການແພດ, ໃນນັ້ນມີວັກຊີນ ໃຫ້ແກ່ຫວຽດນາມໃນໄລຍະຈະມາເຖິງ.
ທ່ານເອກອັກຄະລັດຖະທູດ Park Noh Wan ຢືນຢັນວ່າ ຫວຽດນາມເປັນຄູ່ຮ່ວມມືສໍາຄັນທີ່ສຸດຂອງ ສ.ເກົາຫຼີ, ໂດຍສະເພາະ ແມ່ນໃນດ້ານເສດຖະກິດ, ການລົງທຶນ ແລະ ການຄ້າ. ສ.ເກົາຫຼີ ປາດຖະໜາຢາກຍົກລະດັບການພົວພັນລະຫວ່າງສອງປະເທດ ຂຶ້ນສູ່ລະດັບສູງໃໝ່ ເນື່ອງໃນໂອກາດວັນສ້າງຕັ້ງສາຍພົວພັນການທູດ ຄົບຮອບ 30 ປີ.
 |
| ທ່ານເອກອັກຄະລັດຖະທູດ Park Noh Wan ແລະ ທ່ານນາຍົກລັດຖະມົນຕີ ຟ້າມມິງຈິງ. (ພາບ: TTXVN) |
ທ່ານນາຍົກລັດຖະມົນຕີ ຟ້າມມິງຈິງ ໄດ້ຢືນຢັນວ່າ ຫວຽດນາມຍາມໃດກໍ່ຖືເປັນສໍາຄັນການພົວພັນຄູ່ຮ່ວມມືຍຸດທະສາດຂອງສອງປະເທດ ແລະ ພ້ອມແລ້ວທີ່ຈະຮ່ວມມືຢ່າງແໜ້ນແຟ້ນກັບ ສ.ເກົາຫຼີ ເພື່ອຊຸກຍູ້ປະສິດທິຜົນ ແລະ ເນື້ອໃນຂອງບັນດາກົນໄກທີ່ມີຢູ່ແລ້ວ ແລະ ເປີດຍຸກໃໝໃນໄລຍະໃໝ່ ຍົກລະດັບການຮ່ວມມືດ້ວຍຜົນສໍາເລັດໃໝ່ຫຼາຍຢ່າງ, ເປົ້າໝາຍສູງກວ່າ ແລະ ມຸ່ງໄປສູ່ອະນາຄົດອັນດີງາມໃນສາຍພົວພັນລະຫວ່າງສອງປະເທດ.
ທ່ານນາຍົກລັດຖະມົນຕີ ໄດ້ສະເໜີໃຫ້ສອງຝ່າຍ ສືບຕໍ່ຮັກສາການແລກປ່ຽນ ແລະ ພົບປະພົວພັນຄະນະຜູ້ແທນຂັ້ນສູງໃນຫຼາຍຮູບແບບທີ່ມີໄຫວພິບ, ເພີ່ມທະວີການພົວພັນທາງການທູດປະຊາຊົນ, ຜ່ານນັ້ນ ກໍ່ເພີ່ມທະວີຄວາມໄວ້ເນື້ອເຊື່ອໃຈ ແລະ ຄວາມເຂົ້າໃຈເຊິ່ງກັນ ແລະ ກັນ.
ທ່ານນາຍົກລັດຖະມົນຕີ ຟ້າມມິງຈິງ ຫວັງວ່າຝ່າຍ ສ.ເກົາຫຼີ ຈະສືບຕໍ່ໃຫ້ການຮ່ວມມື ແລະ ໜູນຊ່ວຍຫວຽດນາມ ໃນການປ້ອງກັນ ແລະ ຄວບຄຸມການລະບາດຂອງພະຍາດ, ໂດຍສະເພາະແມ່ນວັກຊີນ ແລະ ຢາປິ່ນປົວພະຍາດໂຄວິດ-19, ພັດທະນາອຸດສາຫະກຳການຢາ ແລະ ຍົກລະດັບຄວາມສາມາດທາງການແພດ.
ສອງຝ່າຍສືບຕໍ່ຊຸກຍູ້ບັນດາວິສາຫະກິດ ສ.ເກົາຫຼີ, ພິເສດແມ່ນບັນດາກຸ່ມບໍລິສັດ, ວິສາຫະກິດໃຫຍ່ຂອງ ສ.ເກົາຫຼີ ສືບຕໍ່ລົງທຶນເຂົ້າຫວຽດນາມ; ສະເໜີໃຫ້ທັງສອງຝ່າຍຄົ້ນຄວ້າການເຊື່ອມຕໍ່ຖ້ຽວບິນການຄ້າ ຄືນໃໝ່ໂດຍໄວ; ຮັບຮອງໜັງສືຜ່ານແດນວັກຊີນຂອງຊຶ່ງກັນແລະກັນໂດຍໄວ, ເຮັດໃຫ້ກິດຈະກໍາທາງເສດຖະກິດ ລະຫວ່າງສອງປະເທດເປັນເປັນປົກກະຕິ, ຜ່ານນັ້ນ ກໍ່ປະກອບສ່ວນເຮັດໃຫ້ລະບົບຕ່ອງໂສ້ການສະໜອງສິນຄ້າ ລະຫວ່າງສອງປະເທດ ແລະ ທົ່ວໂລກເປັນປົກກະຕິ.
ທ່ານນາຍົກລັດຖະມົນຕີ ກໍ່ສະເໜີໃຫ້ ສ.ເກົາຫຼີ ເອົາໃຈໃສ່ ແລະ ສ້າງເງື່ອນໄຂສະດວກໃຫ້ປະຊາຄົມຊາວຫວຽດນາມ ທີ່ພວມດຳລົງຊີວິດ, ຮ່ຳຮຽນ ແລະ ເຮັດວຽກຢູ່ ສ.ເກົາຫຼີ.
ຄຳຮຸ່ງ
