 |
| ທ່ານປະທານປະເທດ ຫງວຽນຊວັນຟຸກ ພົບປະກັບທ່ານພົນເອກ Raul Castro, ອະດີດເລຂາຜູ້ທີໜຶ່ງພັກກອມມູນິດ ກູບາ (ພາບ: TTXVN) |
ນີ້ແມ່ນເນື້ອໃນນອນໃນຖະແຫຼງການຮ່ວມມື ຫວຽດນາມ - ກູບາ ໃນຂອບເຂດການຢ້ຽມຢາມ ກູບາ ຢ່າງເປັນທາງການ ຂອງ ທ່ານປະທານປະເທດ ຫງວຽນຊວັນຟຸກ ໃນລະຫວ່າງວັນທີ 18 – 20 ກັນຍາ.
ຢູ່ກູບາ, ທ່ານປະທານປະເທດ ຫງວຽນຊວັນຟຸກ ໄດ້ມີການໂອ້ລົມສົນທະນາກັບບັນດາເຈົ້າໜ້າທີ່ຂັ້ນສູງຂອງ ກູບາ ຄື ທ່ານເລຂາຜູ້ທີໜຶ່ງພັກກອມມູນິດ ກູບາ, ປະທານປະເທດ ກູບາ Miguel Diaz-Canel, ທ່ານປະທານສະພາແຫ່ງຊາດ ອຳນາດການປົກຄອງ ປະຊາຊົນ Esteban Lazo Hernández, ທ່ານນາຍົກລັດຖະມົນຕີ Manuel Marrero Cruz, ພົບປະກັບທ່ານພົນເອກ Raul Castro, ອະດີດເລຂາຜູ້ທີໜຶ່ງພັກກອມມູນິດ ກູບາ ແລະ ນ້ອງຊາຍຂອງອະດີດປະມຸກລັດ Fidel Castro…
ຫວຽດນາມ ແລະ ກູບາເຫັນດີເປັນເອກະພາບເປີດກວ້າງ, ຮັດແໜ້ນ ແລະ ເຮັດໃຫ້ການພົວພັນຖານອ້າຍນ້ອງຢ່າງເລິກເຊິ່ງ, ສາມັກຄີ ແລະ ການຮ່ວມມືຮອບດ້ານເພື່ອແນໃສ່ປະກອບສ່ວນຢ່າງຕັ້ງໜ້າ ເຂົ້າໃນວິວັດການສ້າງສາ ແລະ ປົກປັກຮັກສາປະເທດຊາດ, ເພື່ອສັນຕິພາບ, ສະຖຽນລະພາບ ແລະ ພັດທະນາຢູ່ສອງພາກພື້ນ ແລະ ໃນໂລກ.
ສອງຝ່າຍໄດ້ສະແດງຄວາມເຊື່ອໝັ້ນວ່າ ບັນດາລຸ້ນຄົນໃນອະນາຄົດຂອງ ກູບາ ແລະ ຫວຽດນາມ ຈະຈົງຮັກພັກດີ ດ້ວຍມໍລະດົກທີ່ຍືນຍົງຄົງຕົວລະຫວ່າງປະຊາຊົນສອງປະເທດ, ຍາມໃດກໍ່ສາມັກຄີ ແລະ ຈະສືບຕໍ່ຮຽງບ່າຮຽງໄລ່ໃນພາລະກິດການສ້າງສາ ແລະ ປົກປັກຮັກສາສັງຄົມນິຍົມຂອງແຕ່ລະປະເທດ, ເພື່ອໂລກທີ່ມີຄວາມສະເໝີພາບກ່ວາ ແລະ ຍືນຍົງ.
ທ່ານປະທານປະເທດ ຫງວຽນຊວັນຟຸກ ສະແດງຄວາມຍິນດີຕໍ່ພັກກອມມູນິດ, ລັດຖະບານ ແລະ ປະຊາຊົນ ກູບາ ຕໍ່ຜົນສຳເລັດຂອງກອງປະຊຸມໃຫຍ່ຄັ້ງທີ VIII ທີ່ໄດ້ດຳເນີນໃນລະຫວ່າງວັນທີ 16 – 19 ເມສາ ປີ 2021. ການນຳ ຫວຽດນາມ ໄດ້ສະແດງຄວາມເຊື່ອໝັ້ນວ່າ ດ້ວຍແນວຄິດ, ທິດສະດີ ແລະ ແນວທາງທີ່ໄດ້ຮັບຮອງຢູ່ກອງປະຊຸມນີ້, ກູບາ ຈະສືບຕໍ່ຮັກສາ, ບໍ່ປະລະບັນດາໂຄງການພັດທະນາໃນວິວັດການສ້າງສາອະທິປະໄຕແຫ່ງຊາດ, ເອກະລາດ, ສັງຄົມນິຍົມ, ປະຊາທິປະໄຕ, ວັດທະນາຖາວອນ ແລະ ສະຖຽນລະພາບ.
ຫວຽດນາມ ໄດ້ຕີລາຄາສູງ ຄວາມເຊື່ອຖື ແລະ ການປະກອບສ່ວນເຂົ້າໃນການຢັ້ງຢືນຂອງ ກູບາ ກ່ຽວກັບນ້ຳໃຈສາມັກຄີສາກົນ ທີ່ກ້າຫານ ແລະ ໃສແຈ້ງໃນການປ້ອງກັນ, ຕ້ານໂລກລະບາດໂຄວິດ - 19, ເຊິ່ງໄດ້ສະແດງອອກຜ່ານການຈັດສົ່ງຄະນະແພດໝໍ 57 ຄະນະ ໄປຍັງ 40 ປະເທດ ແລະ ເຂດແຄ້ວນ.
ຫວຽດນາມ ຢັ້ງຢືນວ່າ ເຖິງວ່າ ຖືກປິດລ້ອມ, ຂວ້ຳບາດ ແລະ ດ້ວຍເງື່ອນໄຂຂອງປະເທດພວມພັດທະນາ, ແຕ່ກູບາ ໄດ້ກາຍເປັນປະເທດທຳອິດ ຢູ່ ອາເມລິກາລາຕິນ ແລະ ກາຣີເບ ພັດທະນາສຳເລັດວັກຊິນກັນໂຄວິດ - 19 3 ຊະນິດທີ່ມີປະສິດທິຜົນສູງ.
ຫວຽດນາມ ຢັ້ງຢືນຄືນຫຼັກການສະເໝີຕົ້ນສະເໝີປາຍການສະໜັບສະໜູນພາລະກິດອັນຊອບທຳຂອງປະຊາຊົນກູບາ ແລະ ການຕໍ່ສູ້ເພື່ອຢຸດຕິບັນດາຄຳສັ່ງປິດລ້ອມດ້ານເສດຖະກິດ, ການຄ້າ ແລະ ການເງິນແບບພຽງລຳພັງຝ່າຍດຽວ ແລະ ບໍ່ມີເຫດຜົນຕ້ານກູບາຢ່າງທັນທີ ແລະ ບໍ່ມີເງື່ອນໄຂໃດໆ.
ຫວຽດນາມ ຄັດຕ້ານການເພີ່ມທະວີບັນດາມາດຕະການປັດໄໝລົງໂທດແບບພຽງລຳພັງຝ່າຍດຽວ ແລະ ເນັ້ນໜັກເຖິງບັນດາມາດຕະການນີ້ ເຮັດໃຫ້ຄວາມຫຍຸ້ງຍາກກ່ຽວກັບເສດຖະກິດ ສັງຄົມຂອງປະຊາຊົນກູບາຮ້າຍແຮງກ່ວາ ໃນສະພາບການໂລກລະບາດໂຄວິດ - 19 ໃນປັດຈຸບັນ.
ສອງປະເທດຄັດຄ້ານເລື່ອງບັນດາປະເທດຍົກອອກບັນດາບັນຊີລາຍຊື່ຕີລາຄາແບບພຽງລຳພັງຝ່າຍດຽວຕໍ່ບັນດາປະເທດຕ່າງໆ.
ຫວຽດນາມ ຢັ້ງຢືນຄືນໃໝ່ການສະໜັບສະໜູນບັນດາຄວາມມານະພະຍາຍາມ ເພື່ອແນໃສ່ເຊື່ອມຕໍ່ການໂອ້ລົມເຈລະຈາ ແລະ ເປີດກ້ວາງການຮ່ວມມືລະຫວ່າງ ອາເມລິກາ ແລະ ກູບາ ໃນບັນດາບັນຫາ ທີ່ຕ່າງຝ່າຍຕ່າງມີຄວາມສົນໃຈ, ບົນພື້ນຖານສະເໝີພາບ, ເຄົາລົບອະທິປະໄຕ, ເອກະລາດ ແລະ ລະບົບການເມືອງຂອງແຕ່ລະປະເທດ.
ສອງຝ່າຍຈະສືບຕໍ່ສະໜັບສະໜູນເຊິ່ງກັນແລະກັນຢູ່ບັນດາອົງການສາກົນ ແລະ ເວທີປາໄສຫຼາຍຝ່າຍ ເຊິ່ງສອງຝ່າຍລ້ວນແຕ່ແມ່ນສະມາຊິກ, ພິເສດແມ່ນ ສະຫະປະຊາຊາດ...
ໃນວັນທີ 20 ກັນຍາ, ຕາມເວລາທ້ອງຖິ່ນ, ທ່ານປະທານປະເທດ ຫງວຽນຊວັນຟຸກ ໄດ້ພົບປະກັບຜູ້ນຳການປະຕິວັດ ກູບາ ທີ່ຍິ່ງໃຫຍ່, ພົນເອກ Raul Castro Ruz. ທ່ານປະທານປະເທດ ຫງວຽນຊວັນຟຸກ ໄດ້ສົ່ງຄຳຢື້ຢາມຖາມຂ່າວຢ່າງສະໜິດສະໜົມ ແລະ ຄຳອວຍພອນສຸຂະພາບຂອງທ່ານເລຂາທິການໃຫຍ່ ຫງວຽນຝຸຈ້ອງ, ການນຳພັກ, ລັດ ແລະ ປະຊາຊົນ ຫວຽດນາມ ໄປຍັງທ່ານພົນເອກ Raul Castro Ruz.
ທ່ານພົນເອກ Raul Castro Ruz ໄດ້ສະແດງຄວາມດີໃຈທີ່ໄດ້ພົບປະກັບ ທ່ານປະທານປະເທດ ຫງວຽນຊວັນຟຸກ ແລະ ສະແດງຄວາມຍິນດີຕໍ່ຜົນສຳເລັດຂອງການຢ້ຽມຢາມກູບາ ຢ່າງເປັນທາງການຂອງທ່ານປະທານປະເທດ ຫງວຽນຊວັນຟຸກ. ທ່ານພົນເອກ ໃຫ້ຮູ້ວ່າ ຍາມໃດກໍ່ຕິດຕາມ ແລະ ດີໃຈຕໍ່ບັນດາບາດກ້າວພັດທະນາຂອງ ຫວຽດນາມ.
ບຸນຄົງ
