| ທົດລອງການມອບຮັບສິນຄ້າສົ່ງອອກນຳເຂົ້າຜ່ານເສັ້ນທາງສະເພາະກິດ | |
| ເປີດຕະຫຼາດນັດສິນຄ້າຈີນ - ອາຊີໃຕ້ ປີ 2021 |
 |
| ສະຫາຍ ຫງວຽນຈ້ອງເງ້ຍ, ເລຂາທິການສູນກາງພັກ - ຫົວໜ້າຄະນະໂຄສະນາສຶກສາສູນກາງ (ພາບ: tuyengiao.vn) |
ທີ່ການໂອ້ລົມສົນທະນາ, ສະຫາຍ ຫງວຽນຈ້ອງເງ້ຍ ໄດ້ເນັ້ນໜັກວ່າ ການພົວພັນລະຫວ່າງສອງປະເທດ ຫວຽດນາມ ຈີນ ໃນໄລຍະທີ່ຜ່ານມາ ສືບຕໍ່ບັນລຸໄດ້ບັນດາບາດກ້າວພັດທະນາອັນດີງາມກ່ຽວກັບທຸກດ້ານ. ນັບແຕ່ຕົ້ນປີມາຮອດປັດຈຸບັນ, ເຖິງວ່າເງື່ອນໄຂໃນການເດີນທາງໄປມາຍັງປະສົບກັບຄວາມຫຍຸ້ງຍາກ ຍ້ອນຜົນສະທ້ອນຈາກໂລກລະບາດໂຄວິດ - 19, ແຕ່ທັງສອງຝ່າຍກໍ່ຍັງຮັກສາຊ່ອງທາງແລກປ່ຽນເປັນປະຈຳ ດ້ວຍຫຼາຍຮູບການທີ່ມີໄຫວພິບ, ບັນລຸປະສິດທິຜົນຢ່າງຕັ້ງໜ້າ.
ໃນໄລຍະຜ່ານມາ, ໂດຍໄດ້ຮັບຄຳເຊື້ອເຊີນຂອງຄະນະບໍລິຫານງານສູນກາງພັກກອມມູນິດຈີນ, ທ່ານ ເລຂາທິການໃຫຍ່ ຫງວຽນຝຸຈ້ອງ ໄດ້ນຳໜ້າຄະນະຜູ້ແທນຂັ້ນສູງ ພັກກອມມູນິດ ຫວຽດນາມ ເຂົ້າຮ່ວມ ແລະ ມີບົດກ່າວປະໄສສຳຄັນ ຢູ່ກອງປະຊຸມສຸດຍອດທາງໄກ ລະຫວ່າງ ພັກກອມມູນິດ ຈີນ ກັບບັນດາພັກການເມືອງ ໃນໂລກ.
ສອງຝ່າຍກໍ່ໄດ້ມີການຮ່ວມມືແລກປ່ຽນປະສົບການ, ໜູນຊ່ວຍເຊິ່ງກັນແລະກັນໃນວຽກງານປ້ອງກັນ, ຕ້ານໂລກລະບາດໂຄວິດ - 19. ຫວຽດນາມ ໄດ້ສະແດງຄວາມຂອບອົກຂອບໃຈຕໍ່ຈີນ ທີ່ໄດ້ໜູນຊ່ວຍວັກຊິນກັນໂຄວິດ - 19 2.700.000 ໂດສໃຫ້ແກ່ຫວຽດນາມ.
ບັນດາການເຄື່ອນໄຫວຮ່ວມມືດັ່ງກ່າວຍິ່ງສະແດງໃຫ້ເຫັນຄວາມຕັດສິນໃຈ, ນຳໃຈສາມັກຄີມິດຕະພາບ ລະຫວ່າງສອງພັກ, ສອງລັດ ແລະ ກອງທັບສອງປະເທດ, ສະແດງໃຫ້ເຫັນການພົວພັນຄູ່ຮ່ວມມືຍຸດທະສາດ ຢ່າງຮອບດ້ານລະຫວ່າງ ຫວຽດນາມ - ຈີນ ຢ່າງເລິກເຊິ່ງ.
ສະຫາຍ ຫງວຽນຈ້ອງເງ້ຍ ໄດ້ຢັ້ງຢືນວ່າ ພັກ, ລັດ ແລະ ປະຊາຊົນ ຫວຽດນາມ ມີຄວາມສະເໝີຕົ້ນສະເໝີປາຍ, ຖືການຮັກສາ ແລະ ພັດທະນາການພົວພັນຮ່ວມມືມິດຕະພາບອັນດີງາມ ແລະ ຍືນຍົງ ກັບພັກ, ລັດ ແລະ ປະຊາຊົນຈີນ ເປັນສຳຄັນ.
ສະຫາຍຫວັງວ່າ ສອງພັກ, ສອງລັດ ຫວຽດນາມ - ຈີນ ຈະພ້ອມກັນຮ່ວມມື, ຜ່ານຜ່າຄວາມຫຍຸ້ງຍາກ, ສິ່ງທ້າທາຍຂອງການພົວພັນຮ່ວມມືມິດຕະພາບ ຫວຽດນາມ - ຈີນ ສືບຕໍ່ຍາດໄດ້ບັນດາຜົນງານອັນຍິ່ງໃຫຍ່ໃນໄລຍະໃໝ່...
ສ່ວນສະຫາຍ Huang Kunming ໄດ້ແນະນຳກ່ຽວກັບສະພາບການຈີນ ແລະ ຄະນະໂຄສະນາສຶກສາສູນກາງພັກກອມມູນິດ ຈີນ, ທ່ານກໍ່ຕີລາຄາ ແລະ ສະເໜີທິດທາງການຮ່ວມມືລະຫວ່າງ ຄະນະໂຄສະນາສຶກສາສູນກາງພັກກອມມູນິດ ຫວຽດນາມ ແລະ ຄະນະໂຄສະນາສູນກາງພັກກອມມູນິດ ຈີນ ໃນໄລຍະຈະມາເຖິງ.
ສອງຝ່າຍໄດ້ເຫັນດີເປັນເອກະພາບຮ່ວມມືກັນຄົ້ນຄ້ວາຜັນຂະຫຍາຍບັນດາກອງປະຊຸມ, ກອງປະຊຸມສຳມະນາ, ໂອ້ລົມສົນທະນາແບ່ງປັນບົດຮຽນກ່ຽວກັບບັນດາບັນຫາທີ່ຕ່າງຝ່າຍຕ່າງມີຄວາມສົນໃຈຕາມຮູບການທາງໄກ, ແລກປ່ຽນສະພາບການຂອງກັນເປັນປະຈຳ, ຮັກສາການຕິດຕໍ່ພົວພັນລະຫວ່າງບັນດາໜ່ວຍງານຂອງ 2 ຄະນະ, ສືບຕໍ່ປະຕິບັດຂໍ້ຕົກລົງກ່ຽວກັບກົນໄກການຮ່ວມມືພົບປະລະຫວ່າງສອງຄະນະຢ່າງມີປະສິດທິຜົນ, ປະກອບສ່ວນຢ່າງແທດຈິງ ເຂົ້າໃນການພັດທະນາຂອງການພົວພັນມິດຕະພາບທີ່ເປັນມູນເຊື້ອ ແລະ ຄູ່ຮ່ວມມືຮອບດ້ານ ຫວຽດນາມ - ຈີນ.
ບຸນຄົງ
