 |
| ທ່ານເລຂາທິການໃຫຍ່ ຫງວຽນຝຸຈ້ອງ ກ່າວຄຳເຫັນທີ່ກອງປະຊຸມ (ພາບ: TTXVN) |
ວັນທີ 5 ສິງຫາ, ຄະນະຊີ້ນຳສູນກາງກ່ຽວກັບການປ້ອງກັນ, ຕ້ານການສໍ້ລາດບັງຫຼວງ ໄດ້ຈັດກອງປະຊຸມຄັ້ງທີ 20 ພາຍໃຕ້ການເປັນປະທານຂອງ ທ່ານເລຂາທິການໃຫຍ່ ຫງວຽນຝຸຈ້ອງ ຫົວໜ້າຄະນະຊີ້ນຳ, ເພື່ອຕີລາຄາສະພາບການ, ໝາກຜົນການປະຕິບັດງານໃນໄລຍະ 6 ເດືອນຕົ້ນປີ, ກຳນົດໜ້າທີ່ຈຸດສຸມ 6 ເດືອນທ້າຍປີ ແລະ ພິຈາລະນາຂໍ້ຕົກລົງບາງບັນຫາສຳຄັນອື່ນໆທີ່ຂຶ້ນກັບສິດອຳນາດຂອງຄະນະຊີ້ນຳ.
ກ່າວຄຳເຫັນທີ່ກອງປະຊຸມ, ທ່ານເລຂາທິການໃຫຍ່ ຫງວຽນຝຸຈ້ອງ ຊີ້ແຈ້ງວ່າ: ວຽກງານປ້ອງກັນ, ຕ້ານໄພສໍ້ລາດບັງຫຼວງ ສືບຕໍ່ໄດ້ຮັບການຊີ້ນຳ, ປະຕິບັດຢ່າງເດັດດ່ຽວ, ບໍ່ຢຸດຢັ້ງ, ບໍ່ຢຸດພັກ ແລະ ນັບມື້ນັບມີປະສິດທິຜົນ, ຈາກນັ້ນຖອນຫຼາຍບົດຮຽນອັນລ້ຳຄ່າເພື່ອປະຕິບັດຢ່າງແຮງກ່ວາ, ຂ້ຽວຂາດກ່ວາ, ມີປະສິດທິຜົນກ່ວາໃນໄລຍະທີ່ຜ່ານມາ.
ເລື່ອງແກ້ໄຂບັນຫາພະນັກງານທີ່ລະເມີດ ເຖິງວ່າຈະເຈັບປວດ, ແຕ່ເພື່ອພາລະກິດລວມ ແມ່ນບໍ່ອາດບໍ່ປະຕິບັດ; ປະຕິບັດຢ່າງເດັດດ່ຽວ ແຕ່ກໍ່ມີມະນຸດສະທຳ.
ໄລຍະທີ່ຜ່ານມາ, ໜ້າທີ່ຍິ່ງໜັກໜ່ວງກ່ວາເກົ່າ ແລະ ສືບຕໍ່ໄດ້ຮັບການປະຕິບັດຢ່າງມີແບບມີແຜນ, ເສີມຂະຫຍາຍໄດ້ບັນດາບົດຮຽນທີ່ບັນລຸໄດ້ໃນໄລຍະທີ່ຜ່ານມາ. ຄະນະຊີ້ນຳໄດ້ສຸມໃສ່ຊີ້ນຳບັນດາຄະດີ, ເຫດການໃຫຍ່, ທີ່ສັບສົນ, ຈຸດສຸມ, ແຕ່ບໍ່ເຮັດປ່ຽນແທນບັນດາອົງການເຈົ້າໜ້າທີ່. ຖ້າຫາກວ່າບັນດາອົງການ, ທ້ອງຖິ່ນ, ກະຊວງ, ຂະແໜງການບໍ່ປະຕິບັດ, ຄະນະຊີ້ນຳຈະຊີ້ນຳໂດຍກົງ, ເຮັດຢ່າງເຖິງຖອງ. ປະສົບການໃນໄລຍະທີ່ຜ່ານມາສະແດງໃຫ້ເຫັນວ່າ ພວກເຮົາໄດ້ເຮັດຢ່າງຕໍ່ເນື່ອງ, ມີແບບມີແຜນ, ທົນທານ ແລະ ມີປະສິດທິຜົນຫຼາຍຢ່າງ.
ການຕໍ່ສູ້ຕ້ານການສໍ້ລາດບັງຫຼວງ ໄດ້ກາຍເປັນຄວາມຮຽກຮ້ອງຕ້ອງການຢ່າງຮີບດ່ວນ, ເປັນໜ້າທີ່ປະຈຳ, ກາຍເປັນທ່າອ່ຽງທີ່ຈຳເປັນ, ບໍ່ອາດບໍ່ປະຕິບັດໄດ້. ຕ້ອງສົມທົບຢ່າງຄົບຊຸດກ່ວາ, ສຸມໃສ່ຊີ້ນຳແກ້ໄຂບັນດາຂອດທີ່ຍັງເປັນຈຸດອ່ອນ, ບັນດາເຫດການ, ບັນຫາທີ່ຍັງມີຄຳເຫັນທີ່ແຕກຕ່າງກັນ, ບັນຫາຮອດໃສຕ້ອງແກ້ໄຂຮອດຫັ້ນ.
ບຸນຄົງ
