 |
| ທ່ານເລຂາທິການໃຫຍ່ ຫງວຽນຝຸຈ້ອງ (ພາບ: TTXVN) |
ຂໍ້ສັງເກດກ່ຽວກັບບົດຂຽນ “ບາງບັນຫາທິດສະດີ ແລະ ພຶດຕິກຳຕົວຈິງ ກ່ຽວກັບສັງຄົມນິຍົມ ແລະ ເສັ້ນທາງມຸ່ງໄປເຖິງສັງຄົມນິຍົມ ຢູ່ ຫວຽດນາມ” ຂອງທ່ານເລຂາທິການໃຫຍ່ ຫງວຽນຝຸຈ້ອງ, ທ່ານ Mohamed Abdoun ຜູ້ອຳນວຍການພິມຈຳໜ່າຍໜັງສືພິມເອເລັກໂຕນິກ www.lapatrienews.com ຂອງ ອານເຊຣີ ໄດ້ສະແດງຄວາມຈັບໃຈດ້ວຍເນື້ອໃນສ້າງພື້ນຖານເສດຖະກິດການຕະຫຼາດຕາມການກຳນົດທິດສັງຄົມນິຍົມ ຢູ່ ຫວຽດນາມ.
ທ່ານ Mohamed Abdoun ໄດ້ຢ້ຳຄືນຂໍ້ສະເໜີຂອງທ່ານເລຂາທິການໃຫຍ່ ຫງວຽນຝຸຈ້ອງ ໃນບົດຂຽນ: “ຍົກອອກທັດສະນະຄະຕິພັດທະນາເສດຖະກິດການຕະຫຼາດຕາມທິດສັງຄົມນິຍົມ ແມ່ນບາດກ້າວບຸກທະລຸທິດສະດີພື້ນຖານທີ່ສຸດ ແລະ ຄວາມຄິດປະດິດສ້າງຂອງພັກ, ແມ່ນໝາກຜົນທິດສະດີສຳຄັນໃນ 35 ປີແຫ່ງການປະຕິບັດແນວທາງປ່ຽນແປງໃໝ່, ເລີ່ມຈາກພຶດຕິກຳຕົວຈິງ ຫວຽດນາມ ແລະ ການຮັບເອົາບົດຮຽນປະສົບການຂອງໂລກທີ່ມີການເລືອກເຟັ້ນ”.
ຕາມທ່ານ Mohamed Abdoun ແລ້ວ, ບັນດາເນື້ອໃນພື້ນຖານກ່ຽວກັບພື້ນຖານເສດຖະກິດການຕະຫຼາດກຳນົດທິດສັງຄົມນິຍົມຢູ່ ຫວຽດນາມ ກໍ່ໄດ້ເຕື້ອງເຖິງໃນບັນດາເອກະສານຂອງ ກອງປະຊຸມໃຫຍ່ຄັ້ງທີ 13 ຂອງພັກກອມມູນິດ ຫວຽດນາມ ທີ່ໄດ້ດຳເນີນໃນວັນທີ 25 ມັງກອນ ຫາວັນທີ 1 ກຸມພາ 2021, ໃນນັ້ນມີພາກສະຫຼຸບພຶດຕິກຳຕົວຈິງ, ຄົ້ນຄ້ວາທິດສະດີການພັດທະນາເສດຖະກິດ ແລະ ວິວັດການປ່ຽນແປງໃໝ່ຂອງປະເທດຊາດ.
ດ້ວຍຄວາມສາມາດປ່ຽນແປງໃໝ່ດ້ວຍຕົນເອງ, ຮັບມືກັບສະພາບການໃໝ່ ແລະ ປະເຊີນໜ້າກັບບັນດາສິ່ງທ້າທາຍອັນໃຫຍ່ຫຼວງດ້ວຍຕົນເອງ, ພັກກອມມູນິດ ຫວຽດນາມ ໄດ້ມີການປ່ຽນແປງໃໝ່ອີກຄັ້ງໜຶ່ງດ້ວຍວິທີການຊຸກຍູ້ບາງນິຍາມທີ່ມີລັກສະນະປະຕິວັດກ່ຽວກັບພື້ນຖານເສດຖະກິດການຕະຫຼາດຕາມທິດສັງຄົມນິຍົມ, ໃນຂະນະທີ່ຍັງຮັກສາບັນດາຫຼັກການພື້ນຖານຂອງ ລັດທິ ມາກ - ເລນິນ.
ບົດຂຽນຂອງ ທ່ານເລຂາທິການໃຫຍ່ ຫງວຽນຝຸຈ້ອງ ສະແດງໃຫ້ເຫັນວ່າ ຢູ່ ຫວຽດນາມ ນິຍາມເສດຖະກິດການຕະຫຼາດມີລັກສະນະມະນຸດສະທຳ, ມະນຸດບໍ່ຖືກຫັນເປັນເງິນຕາ. ແບບຢ່າງການຄຸ້ມຄອງໃນໂລກລະບາດໂຄວິດ - 19 ໄດ້ພິສູດໃຫ້ເຫັນບັນດາລັກສະນະທີ່ຖືກຕ້ອງໃນວິໄສທັດ ກໍ່ຄືບັນດາເລືອກເຟັ້ນ ແລະ ການກຳນົດທິດ ເຊິ່ງພັກກອມມູນິດ ຫວຽດນາມ ໄດ້ຮັບຮອງເອົາ.
ພັກກອມມູນິດ ຫວຽດນາມ ກໍ່ຢຶດໝັ້ນກັບເປົ້າໝາຍສຸດທ້າຍແມ່ນສັງຄົມນິຍົມທີ່ແທ້ຈິງ, ໄດ້ປະກອບດ້ວຍເຄື່ອງມືທຳການຜະລິດຢ່າງມີປະສິດທິຜົນ ແລະ ທັນສະໄໝ, ເຊິ່ງເປັນພື້ນຖານກະສິກຳທີ່ຕອບສະໜອງຄວາມຮຽກຮ້ອງຕ້ອງການຂອງປະຊາຊົນ, ແລະຍິ່ງໄປກ່ວານັ້ນ, ຖ້າມີຄວາມຕ້ອງການ ກໍ່ອາດຈະຊ່ວຍເຫຼືອບາງປະເທດບ້ານໃກ້ເຮືອນຄຽງໄດ້.
ໂດຍຜ່ານຜ່າບັ້ນສົງຄາມຫຼາຍຄັ້ງ, ປະເທດຫວຽດນາມ ຖືກທຳລາຍຢ່າງສິ້ນເຊິງ, ນັບທັງບັນດາໂຄງປະກອບເສດຖະກິດ, ແຕ່ວ່າ ພາຍໃຕ້ການນຳພາອັນສະຫຼາດສ່ອງໄສຂອງພັກກອມມູນິດ ຫວຽດນາມ ແລະ ຜູ້ນຳທີ່ຍິ່ງໃຫຍ່ ໂຮ່ຈີມິນ, ຫວຽດນາມ ໄດ້ຟື້ນຟູ ແລະ ພັດທະນາຢ່າງໄວວາ.
ບົດຂຽນຂອງທ່ານເລຂາທິການໃຫຍ່ ຫງວຽນຝຸຈ້ອງ ກໍ່ເນັ້ນໜັກເຖິງເສັ້ນທາງມຸ່ງໄປເຖິງສັງຄົມນິຍົມ ຍັງຍາວໄກ ແລະ ມີຄວາມຫຍຸ້ງຍາກກາກກຳບໍ່ໜ້ອຍ.
ບົນເສັ້ນທາງນັ້ນ ຈະບໍ່ເຮັດໃຫ້ເສຍທາດຂາດຄຸນສັງຄົມ ແລະ ປະຊາຄົມຂອງປະເທດຊາດ - ຊົນຊາດຢ່າງເດັດຂາດ, ໝາຍຄວາມວ່າ ມີຄວາມຍຸຕິທຳສັງຄົມ ແລະຄວາມສະເໝີພາບ ໃນການແຈກຢາຍຊັບສິນ ເພື່ອນຳຜົນປະໂຫຍດມາໃຫ້ທຸກຄົນ.
ບຸນຄົງ
