 |
ທ່ານ ບຸນທອງ ຈິດມະນີ ກ່າວຄໍາເຫັນທີ່ກອງປະຊຸມ
ການເຜີຍແຜ່ເຊື່ອມຊຶມມະຕິກອງປະຊຸມຄົບຄະນະຄັ້ງທີ 7 ຂອງຄະນະບໍລິຫານງານສູນກາງພັກສະໄໝທີ X ຂອງພັກໃຫ້ແກ່ພະນັກງານການນຳຫລັກແຫລ່ງ 4 ກະຊວງຂົງເຂດວັດທະນະທຳ-ສັງຄົມ ກໍຄື ກະຊວງຖະແຫລງຂ່າວວັດທະນະທຳ ແລະ ທ່ອງທ່ຽວ, ກະຊວງແຮງງານ ແລະ ສະຫວັດດີການສັງຄົມ, ກະຊວງສາທາລະນະສຸກ ແລະ ກະຊວງສຶກສາທິການ ແລະ ກິລາ ໄດ້ຈັດຂຶ້ນໃນວັນທີ 14-15 ມັງກອນ 2019 ທີ່ນະຄອນຫລວງວຽງຈັນ. ໃຫ້ກຽດປາຖະກະຖາໂດຍ ທ່ານບຸນທອງ ຈິດມະນີ ກຳມະການກົມການເມືອງ, ເລຂາທິການສູນກາງພັກ, ຮອງນາຍົກລັດຖະມົນຕີ,ປະທານຄະນະກວດກາ ສູນກາງພັກ, ປະທານອົງການກວດກາລັດຖະບານ ແລະ ຫົວໜ້າອົງການຕ້ານສໍ້ລາດບັງຫລວງ. ກອງປະຊຸມໃນຄັ້ງນີ້, ບັນດາຜູ້ເຂົ້າຮ່ວມໄດ້ຮັບຟັງການເຜີຍແຜ່ເຊື່ອມຊຶມມະຕິວ່າດ້ວຍການເພີ່ມທະວີນຳພາແກ້ໄຂຄວາມຫຍຸ້ງກຍາກທາງດ້ານເສດຖະກິດ-ການເງິນ ແລະ ສ້າງຄວາມເຂັ້ມແຂງໃນການຄຸ້ມຄອງເສດຖະກິດມະຫາພາກ ແລະ ຈະໄດ້ຮັບຟັງການເຜີຍແຜ່ມະຕິວ່າດ້ວຍການປັບປຸງ ຮາກຖານການເມືອງຂອງລະບອບປະຊາທິປະໄຕປະຊາຊົນໃຫ້ເຂັ້ມແຂງ ແລະ ໜັກແໜ້ນ.
 |
ບັນດາຜູ້ແທນເຂົ້າຮ່ວມກອງປະຊຸມ
ໂອກາດນີ້, ທ່ານ ບຸນທອງ ຈິດມະນີ ໄດ້ຍົກໃຫ້ເຫັນເຖິງຜົນສຳເລັດຂອງກອງປະຊຸມຄົບຄະນະຄັ້ງທີ 7 ຂອງຄະນະບໍລິຫານງານສູນກາງພັກສະໄໝທີ X ເຊິ່ງກອງປະຊຸມໄດ້ຄົ້ນຄວ້າ, ປຶກສາຫາລືບາງບັນຫາທີ່ສຳຄັນໃນຂົງເຂດເສດຖະກິດ-ການເງິນ ໂດຍສະເພາະໄດ້ຄົ້ນຄວ້າປະກອບຄຳເຫັນຕໍ່ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ແລະ ແຜນເງິນຕາ ປີ 2018 ແລະ ທິດທາງແຜນການໃນປີ 2019, ຄົ້ນຄວ້າຕີລາຄາສະພາບການຈັດຕັ້ງປະຕິບັດວຽກງານຮາກຖານການເມືອງໃນໄລຍະຜ່ານມາ ແລະ ທິດທາງວຽກງານຈຸດສຸມໃນຕໍ່ໜ້າ.
ພ້ອມນັ້ນ, ທ່ານ ບຸນທອງ ຈິດມະນີ ຍັງໄດ້ຍົກໃຫ້ເຫັນສະພາບຄວາມຫຍຸ້ງຍາກດ້ານເສດຖະກິດ-ການເງິນ, ບັນຫາໜີ້ສິນສາທາລະນະ ແລະ ຄວາມອ່ອນແອ ຂອງວຽກງານແຜນການ, ການເງິນກໍຄືເສດຖະກິດມະຫາພາກ, ລວມທັງທິດທາງ, ມາດຕະການແກ້ໄຂ ແລະ ການຊີ້ນຳຈັດຕັ້ງປະຕິບັດເພື່ອຮັບປະກັນໃຫ້ການແກ້ໄຂບັນຫາຄວາມຫຍຸ້ງຍາກດ້ານເສດຖະກິດ-ການເງິນໄດ້ຮັບການຈັດຕັ້ງປະຕິບັດຢ່າງຖືກຕ້ອງ, ຍົກສູງຄວາມຮັບຜິດຊອບ, ຄວາມອາດສາມາດ ແລະ ບົດບາດນຳພາຕົວຈິງຂອງຄະນະພັກຂັ້ນຕ່າງໆຕໍ່ການແກ້ໄຂຄວາມຫຍຸ້ງຍາກດັ່ງກ່າວດ້ວຍການດຳເນີນການຢ່າງເປັນລະບົບ ແລະຕໍ່ເນື່ອງ.
（ແຫຼ່ງຂໍ້ມູນ： ຂປລ）
