 |
| ບັນດານັກປະຖະກະຖາ ເຂົ້າຮ່ວມກອງປະຊຸມ (ພາບ: thanhnien.vn) |
ວັນທີ 26 ກໍລະກົດ, ຢູ່ຮ່າໂນ້ຍ, ທ່ານຮອງປະທານ ທັງເປັນເລຂາທິການ ສະມາຄົມມິດຕະພາບ ຫວຽດນາມ - ສິງກະໂປ ຫງວຽນດຶກຮຸ່ງ ໄດ້ເປັນຜູ້ຕາງໜ້າສະມາຄົມເຂົ້າຮ່ວມ ກອງປະຊຸມສຳມະນາທາງໄກ “ການທູດມະຫາຊົນ ຢູ່ ອາຊີ 2021”.
ກອງປະຊຸມສຳມະນາໄດ້ດຳເນີນໃນລະຫວ່າງວັນທີ 26 – 30 ກໍລະກົດ 2021 ເຊິ່ງດຶງດູດໄດ້ການເຂົ້າຮ່ວມຂອງ 550 ຄົນ, ໃນນັ້ນມີ ນັກປະຖະກະຖາ 40 ຄົນ ເຊິ່ງແມ່ນບັນດານັກການທູດ, ນັກຊ່ຽວຊານ, ນັກຄົ້ນຄ້ວາ ໃນຂົງເຂດການທູດມະຫາຊົມທັງຢູ່ພາຍໃນ ແລະ ນອກພາກພື້ນອາຊີຕາເວັນອອກສ່ຽງໃຕ້.
ກອງປະຊຸມສຳມະນາລວມມີ 11 ວາລະປຶກສາຫາລືກ່ຽວກັບບັນດາຫົວຂໍ້ຄື: ການທູດມະຫາຊົນໃນສະພາບການໂລກລະບາດໂຄວິດ - 19, ເຊື່ອມຕໍ່ການດຳເນີນທຸລະກິດ ແລະ ການທູດ, ບັນດາວິທີການສຳຜັດທີ່ແຕກຕ່າງກັນ ໃນການວັດແທກ ແລະ ຕີລາຄາປະສິດທິຜົນຂອງການເຄື່ອນໄຫວການທູດມະຫາຊົນ, ການທູດ ລະຫວ່າງ ບັນດານະຄອນ, ມອບສິດໃຫ້ແກ່ໄວໜຸ່ມ ໃນຖານະເປັນບັນດານັກການທູດ ສ່ວນບຸກຄົນ, ບົດບາດຂອງ ອາຊີໃນການທູດສາທາລະນະສຸກ ທົ່ວໂລກ, ມູນຄ່າຍຸດທະສາດຂອງການຮ່ວມມືພັດທະນາ, ບັນຫາຂ່າວປອມ ໃນການທູດມະຫາຊົນ ແລະ ການທູດດີຈີຕອນ.
ໃນຂອບເຂດກອງປະຊຸມສຳມະນາ, ພ້ອມທັງເພື່ອແນໃສ່ສະເຫຼີມສະຫຼອງ 30 ປີແຫ່ງວັນສ້າງຕັ້ງ, ກອງທຶນສາກົນ ສິງກະໂປ ໄດ້ແນະນຳປຶ້ມຫົວທຳອິດກ່ຽວກັບການທູດມະຫາຊົນຢູ່ ອາຊີຕາເວັນອອກສ່ຽງໃຕ້ “Winning Hearts and Minds: Public Diplomacy in ASEAN”
ກອງທຶນສາກົນ ສິງກະໂປ ກໍ່ໄດ້ຈັດຕັ້ງງານວາງສະແດງແນະນຳກ່ຽວກັບບັນດາຄູ່ຮ່ວມມື, ອົງການຈັດຕັ້ງທີ່ມີຜົນກະທົບຕໍ່ການທູດປະຊາຊົນ ຢູ່ ອາຊີຕາເວັນອອກສ່ຽງໃຕ້. ສະມາຄົມມິດຕະພາບ ຫວຽດນາມ - ສິງກະໂປ ກໍ່ໄດ້ເຂົ້າຮ່ວມການວາງສະແດງຢູ່ງານວາງສະແດງຄັ້ງນີ້ດ້ວຍ.
ບຸນຄົງ
