ງານວາງສະແດງສິນຄ້າ ແລະ ຜະລິດຕະພັນຂອງກອງທັບ

ທ່ານ ສິນລະວົງ ຄຸດໄພທູນ ເຈົ້າຄອງນະຄອນຫຼວງວຽງຈັນ ພ້ອມຄະນະການນຳ ຢ້ຽມຊົມຜລິດຕະພັນ ແລະ ອຸປະກອນກອງທັບ.

ພິທີເປີດໄດ້ຈັດຂຶ້ນຢ່າງເປັນທາງການໃນຕອນແລງຂອງວັນທີ 4 ມັງກອນ 2019 ຜ່ານມາ ທີ່ເດີ່ນທາດຫຼວງເບື້ອງອ່າງນໍ້າໂພນເຄັງ ນະຄອນຫຼວງວຽງຈັນ ໂດຍການເຂົ້າຮ່ວມຂອງ ທ່ານ ສິນລະວົງ ຄຸດໄພທູນ ເຈົ້າຄອງນະຄອນຫຼວງວຽງຈັນ, ທ່ານ ກິແກ້ວ ໄຂຄຳພິທູນ ຫົວໜ້າຄະນະໂຄສະນາອົບຮົມສູນກາງພັກ, ທ່ານ ພົນໂທ ສຸວອນ ເລືອງບຸນມີ ຮອງລັດຖະມົນຕີ ກະຊວງປ້ອງກັນປະເທດ, ຫົວໜ້າກົມໃຫຍ່ເສນາທິການກອງທັບ ພ້ອມດ້ວຍບັນດາຄະນະນຳກະຊວງ, ອົງການອ້ອມຂ້າງສູນກາງ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

ທ່ານ ສິນລະວົງ ຄຸດໄພທູນ ເຈົ້າຄອງນະຄອນຫຼວງວຽງຈັນ, ທ່ານ ກິແກ້ວ ໄຂຄຳພິທູນ ຫົວໜ້າຄະນະໂຄສະນາອົບຮົມສູນກາງພັກ, ທ່ານ ພົນໂທ ສຸວອນ ເລືອງບຸນມີ ຮອງລັດຖະມົນຕີ ກະຊວງປ້ອງກັນປະເທດ, ຫົວໜ້າກົມໃຫຍ່ເສນາທິການກອງທັບ ຢ້ຽມຊົມຜລິດຕະພັນ ແລະ ອຸປະກອນກອງທັບ.

ທ່ານ ພົນຕີ ພູວົງ ວົງພົມ ຮອງລັດຖະມົນຕີ ກະຊວງປ້ອງກັນປະເທດ, ປະທານຈັດງານວາງສະແດງສິນຄ້າ ແລະ ຜະລິດຕະພັນກອງທັບ ກ່າວວ່າ: ການຈັດງານວາງສະແດງສິນຄ້າ ແລະ ຜະລິດຕະພັນກອງທັບ ເພື່ອຂໍ່ານັບຮັບຕ້ອນ ແລະ ສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວ ຄົບຮອບ 70 ປີ ຈັດຂຶ້ນເພື່ອເຮັດໃຫ້ປະຊາຊົນໄດ້ຮັບຮູ້ເຖິງຜົນງານການປະກອບສ່ວນຂອງກອງທັບເຂົ້າໃນຂົງເຂດຕ່າງໆຂອງສັງຄົມ ໂດຍສະເພາະແມ່ນໄວໜຸ່ມ, ເຍົາວະຊົນທີ່ເປັນອະນາຄົດຂອງຊາດ

ງານວາງສະແດງສິນຄ້າໃນຄັ້ງນີ້ ຈະຈັດຂຶ້ນເປັນເວລາ 6 ວັນ ນັບແຕ່ວັນທີ 4 ຫາ 9 ມັງກອນ 2019, ມີພາກສ່ວນທີ່ເຂົ້າຮ່ວມງານທັງໝົດ 43 ພາກສ່ວນ, ປະກອບດ້ວຍກົມກອງບໍລິຫານ 24 ຫົວໜ່ວຍ, ພາກສ່ວນຫົວໜ່ວຍທຸລະກິດກອງທັບ 15 ຫົວໜ່ວຍ ເຊັ່ນ: ກຸ່ມລັດວິສາຫະກິດ ພັດທະນາກະສິກຳ ອຸດສາຫະກຳ ແລະ ບໍລິການ ຂາເຂົ້າ – ຂາອອກ, ຫໍສະໝຸດກອງທັບ, ບໍລິສັດ ລາວຮຸ່ງ ຈຳກັດ, ບໍລິສັດ ລາວ ຢູນ ຈຳກັດ, ບໍລິສັດ ພູຫຼວງ ບໍລິການ ຊີເຈາະ ແລະ ຈູດລະເບີດ ຈຳກັດ, ບໍລິສັດ ຄຳໄຊ ຢົງຊີນ ຈຳກັດ, ກຸ່ມບໍລິສັດ ລັດວິສາຫະກິດ ລາວເດີນອາກາດ, ລັດວິສາຫະກິດການຄ້າ ຂາເຂົ້າ – ຂາອອກ ກອງທັບ ແລະ ອື່ນໆ. ນອກນັ້ນ, ຍັງມີພາກສ່ວນສະພາອຸດສາຫະກຳການຄ້າ ເຂົ້າຮ່ວມ.

（ແຫຼ່ງ​ຂໍ້​ມູນ​： ເສດກະກິດ-ການຄ້າ）