ທ່ານເລຂາທິການໃຫຍ່, ປະທານປະເທດລາວ ສິ້ນສຸດການຢ້ຽມຢາມສັນຖະວະໄມຕີຫວຽດນາມ ຢ່າງຈົບງາມ
	ທ່ານປະທານປະເທດ ຫງວຽນຊວນຟຸກ ພົບປະກັບທ່ານເລຂາທິການໃຫຍ່, ປະທານປະເທດ ລາວ ທອງລຸນ ສີສຸລິດ

ໃນການໃຫ້ສຳພາດຕໍ່ນັກຂ່າວໃນວັນທີ 29 ມິຖຸນານີ້, ພາຍຫຼັງທີ່ທ່ານເລຂາທິການໃຫຍ່, ປະທານປະເທດລາວ ທອງລຸນ ສີສຸລິດ ສິ້ນສຸດການຢ້ຽມຢາມສັນທະວະໄມຕີຢ່າງເປັນທາງການຢູ່ຫວຽດນາມ ແຕ່ວັນທີ 28-29 ມິຖຸນາ, ທ່ານ ເລຮ່ວາຍຈູງ, ຫົວໜ້າຄະນະພົວພັນຕ່າງປະເທດສູນກາງພັກກອມມູນິດຫວຽດນາມ ໄດ້ຊີ້ແຈ້ງບັນດາຈຸດໃໝ່ ແລະ ແນວທາງໃຫຍ່ໃນການພົວພັນຫວຽດນາມ - ລາວ.

ທ່ານ ເລຮ່ວາຍຈູງ, ຫົວໜ້າຄະນະພົວພັນຕ່າງປະເທດສູນກາງພັກກອມມູນິດຫວຽດນາມ. (ພາບ: TTXVN)

ສະຫາຍເລຮ່ວາຍຈູງ ໄດ້ຢືນຢັນວ່າ ຜູ້ນຳຂອງສອງປະເທດ ໄດ້ຕີລາຄາການຢ້ຽມຢາມແມ່ນມີຄວາມໝາຍພິເສດ, ເຮັດໃຫ້ສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານຫວຽດນາມ - ລາວ ເລິກເຊິ່ງກວ່າເກົ່າ; ນຳການພົວພັນຮ່ວມມືລະຫວ່າງສອງປະເທດຂຶ້ນສູ່ລະດັບສູງໃໝ່.

ຜູ້ນຳຂອງສອງປະເທດ, ບັນດາກະຊວງ ແລະ ຂະແໜງການ ໄດ້ປຶກສາຫາລື ແລະ ວາງທິດທາງເພື່ອຊຸກຍູ້ການພົວພັນຫວຽດນາມ - ລາວໃນໄລຍະຈະມາເຖິງ, ລະອຽດແມ່ນ: ເພີ່ມທະວີຄວາມໄວ້ເນື້ອເຊື່ອໃຈ, ຄວາມເຂົ້າໃຈດ້ານການເມືອງ, ແລະ ເພີ່ມທະວີການຮ່ວມມືໃນຂົງເຂດປ້ອງກັນຊາດ - ປ້ອງກັນຄວາມສະຫງົບຕື່ມອີກ, ພ້ອມທັງຊຸກຍູ້ເສດຖະກິດ, ວັດທະນະທຳ - ສັງຄົມ. ສອງຝ່າຍໄດ້ອອກຖະແຫຼງການຮ່ວມ ກ່ຽວກັບການຢ້ຽມຢາມຫວຽດນາມ ຂອງທ່ານເລຂາທິການໃຫຍ່, ປະທານປະເທດລາວ ທອງລຸນ ສີສຸລິດ. ສອງຝ່າຍໄດ້ລົງນາມໃນສັນຍາ ແລະ ຂໍ້ຕົກລົງທີ່ສຳຄັນຫຼາຍສະບັບ.

ສອງຝ່າຍໄດ້ຢັ້ງຢືນຄວາມຕັດສິນໃຈໃນການເຮັດໃຫ້ຄວາມໄວ້ເນື້ອເຊື່ອໃຈດ້ານການເມືອງເລິກເຊິ່ງກ່ວາເກົ່າ, ໃນນັ້ນມີການແລກປ່ຽນ ແລະ ການພົບປະກັນຢ່າງເປັນປະຈຳ ດ້ວຍຮູບແບບທີ່ມີໄຫວພິບຢູ່ຂັ້ນສູນກາງ ແລະ ທ້ອງຖິ່ນ.

ໃນສະພາບການໃໝ່, ສອງປະເທດຕ້ອງມີທິດທາງຮ່ວມມືດ້ານປ້ອງກັນຊາດ - ປ້ອງກັນຄວາມສະຫງົບ ເພື່ອກໍ່ສ້າງສັງຄົມນິຍົມ ແລະ ປົກປັກຮັກສາປະເທດຊາດ.

ການຢ້ຽມຢາມສັນຖະວະໄມຕີຢ່າງເປັນທາງການຢູ່ຫວຽດນາມ ແຕ່ວັນທີ 28-29 ມິຖຸນາ ຂອງທ່ານເລຂາທິການໃຫຍ່, ປະທານປະເທດລາວ ທອງລຸນ ສີສຸລິດ. (ພາບ: TTXVN)

ສອງຝ່າຍເຫັນດີເປັນເອກະພາບປະສານສົມທົບ, ແລກປ່ຽນຂໍ້ມູນຂ່າວສານ ແລະ ປະສົບການກ່ຽວກັບນະໂຍບາຍເສດຖະກິດມະຫາພາກ, ຊຸກຍູ້ການເຊື່ອມຕໍ່ຂອງພື້ນຖານເສດຖະກິດສອງປະເທດ ໃນຂອບການຮ່ວມມືເສດຖະກິດ 3 ປະເທດ: ຫວຽດນາມ, ລາວ ແລະ ກຳປູເຈຍ.

ຫວຽດນາມ ສືບຕໍ່ສະໜັບສະໜູນລາວ ກ່ຽວກັບພື້ນຖານໂຄງລ່າງ, ການສຶກສາ ແລະ ບຳລຸງສ້າງ. ສອງຝ່າຍຈະມີມາດຕະການແກ້ໄຂ ເພື່ອຊຸກຍູ້ການລົງທຶນ, ພິເສດແມ່ນການລົງທຶນຂອງວິສາຫະກິດຂອງສອງປະເທດ; ສ້າງກົນໄກການປະຕິບັດບັນດາຂໍ້ຕົກລົງລະຫວ່າງຫວຽດນາມ ແລະ ລາວ ເພື່ອເສີມຂະຫຍາຍການພົວພັນດ້ານການເມືອງທີ່ໄວ້ເນື້ອເຊື່ອໃຈ ລະຫວ່າງສອງປະເທດຫຼາຍກ່ວາເກົ່າ.

ສະຫາຍ ເລຮ່ວາຍຈູງ ຢືນຢັນວ່າ ການຢ້ຽມຢາມຄັ້ງນີ້ ໄດ້ຖືວ່າເປັນຂີດໝາຍປະຫວັດສາດ, ນຳການພົວພັນພິເສດ ຫວຽດນາມ - ລາວ ແລະ ລາວ - ຫວຽດນາມ ຂຶ້ນສູ່ລະດັບສູງໃໝ່, ເຮັດໃຫ້ການພົວພັນລະຫວ່າງສອງປະເທດນັບມື້ນັບເລິກເຊິ່ງ, ມີປະສິດທິຜົນ, ກວ້າງຂວາງກວ່າເກົ່າ, ຕອບສະໜອງ ໄດ້ຕາມຄວາມຮຽກຮ້ອງຕ້ອງການໃນໄລຍະໃໝ່, ໃນສະພາບການສາກົນທີ່ມີການຜັນແປໃໝ່ຫຼາຍຢ່າງ.