 |
| ບັນຍາກາດທີ່ກອງປະຊຸມ. ພາບ: baodansinh.vn. |
ກອງປະຊຸມຄັ້ງນີ້, ທັງສອງຝ່າຍໄດ້ຮ່ວມກັນທົບທວນ, ສະຫລຸບຕີລາຄາຜົນສຳເລັດ, ຂໍ້ສະດວກ ແລະຂໍ້ຫຍຸ້ງຍາກ, ບາງບົດຮຽນທີ່ຖອດຖອນໄດ້ໃນການປະຕິບັດວຽກງານຮ່ວມມືດ້ານແຮງງານ ແລະສະຫວັດດີການສັງຄົມຂອງສອງກະຊວງໃນໄລຍະຜ່ານມາ, ພ້ອມທັງໄດ້ຄົ້ນຄ້ວາປະກອບຄຳເຫັນໃສ່ເອກະສານຮ່າງບົດລາຍງານການຈັດຕັ້ງປະຕິບັດວຽກງານຂອງສອງກະຊວງໃນໄລຍະປີ 2019-2021 ແລະຮ່າງຂໍ້ຕົກລົງວ່າດ້ວຍການຮ່ວມມືໃນຂົງເຂດແຮງງານ ແລະສະຫວັດດີການສັງຄົມ 2021-2025 ສະບັບປັບປຸງໃໝ່ ເພື່ອເປັນການກະກຽມດ້ານເນື້ອໃນໃຫ້ແກ່ການກະກຽມຈັດກອງປະຊຸມລັດຖະມົນຕີແຮງງານ ແລະສະຫວັດດີການສັງຄົມ ລາວ-ຫວຽດນາມ ຄັ້ງທີ 7 ປີ 2021.
ນອກຈາກນີ້, ໃນກອງປະຊຸມທັງສອງຝ່າຍຍັງເຫັນດີເອກະພາບຈະສືບຕໍ່ແລກປ່ຽນຂໍ້ມູນເຊິ່ງກັນ ແລະກັນ ກ່ຽວກັບກົດໝາຍ, ລະບຽບການ ແລະນິຕິກຳຕ່າງໆ ທີ່ຕິດພັນກັບການອະນຸຍາດໃຫ້ແຮງງານລາວ ໄປເຮັດວຽກຢູ່ຕ່າງປະເທດ ແລະແຮງງານຕ່າງປະເທດທີ່ເຂົ້າມາເຮັດວຽກຢູ່ລາວ, ແລກປ່ຽນຂໍ້ມູນກ່ຽວກັບການແກ້ໄຂ ບັນຫາແຮງງານຕ່າງປະເທດທີ່ເຂົ້າມາເຄື່ອນໄຫວບໍ່ຖືກຕ້ອງຢູ່ສປປ ລາວ ແນໃສ່ເຮັດໃຫ້ການຮ່ວມມືດ້ານແຮງງານຂອງສອງກະຊວງໄດ້ຮັບການຜັນຂະຫຍາຍເຂົ້າສູ່ລວງເລິກ ແລະມີປະສິດທິຜົນຫລາຍຂຶ້ນ, ວິຊາການສອງຝ່າຍສືບຕໍ່ປັບປຸງເນື້ອໃນເອກະສານຮ່າງບົດລາຍງານ ແລະຮ່າງຂໍ້ຕົກລົງສະບັບປັບປຸງໃໝ່ ເພື່ອເຮັດໃຫ້ເອກະສານຮ່ວມມືດັ່ງກ່າວສາມາດນຳສະເໜີຮັບຮອງໃນກອງປະຊຸມລະດັບລັດຖະມົນຕີຂອງສອງກະຊວງ ແລະກ້າວສູ່ການຈັດຕັ້ງປະຕິບັດໃຫ້ປະກົດຜົນເປັນຈິງ.
kpl.gov.la
