 |
ເອກອັກຄະລັດຖະທູດ ແລະ ຜູ້ຕາງໜ້າອົງການສະຫະປະຊາຊາດ ໄດ້ເດີນທາງໄປຢ້ຽມຢາມ ແຂວງຄຳມ່ວນ
ຈຸດປະສົງຂອງການຢ້ຽມຢາມຄັ້ງນີ້, ແມ່ນເພື່ອປະເມີນຜົນໄດ້ຮັບແຕ່ຕົ້ນຮອດປັດຈຸບັນ, ກິດຈະກຳຕອບໂຕ້ໄພພິບັດນໍ້າຖ້ວມ ໄດ້ຮັບການປະສານງານ ໂດຍກະຊວງແຮງງານ ແລະ ສະຫວັດດີ ການສັງຄົມເຊິ່ງໄດ້ຮັບ ການສະໜັບສະໜູນ ຈາກ 4 ອົງການໃນເຄືອຂ່າຍ ສປຊ ເຊັ່ນ: ອົງການອາຫານ ແລະ ການກະເສດແຫ່ງສະຫະປະຊາຊາດ (FAO), ອົງການສະຫະປະຊາຊາດ ເພື່ອການ ພັດທະນາ (UNDP), ອົງ ການອາຫານໂລກ (WFP) ແລະ ອົງການອະນາໄມໂລກ (WHO).
ປັດຈຸບັນ, ກິດຈະກຳໄດ້ສຸມໃສ່ຮັບປະກັນ ຄວາມໝັ້ນຄົງດ້ານສະບຽງອາຫານ ໃຫ້ປະຊາຊົນທີ່ໄດ້ຮັບຜົນກະທົບ, ແກ້ໄຂການຂາດສານອາຫານ, ຊ່ວຍເລື່ອງການເຮັດວຽກຂອງໂຮງໝໍ ແລະ ສຸກສາລາ ໃນລະຫວ່າງ ການລະບາດຂອງພະຍາດ ທີ່ເກີດຈາກການຂາດທາດວິຕາມິນ ບີ 1 ແລະ ປັບປຸງການດຳລົງຊີ ວິດ ຂອງຜູ້ທີ່ສູນເສຍຊັບສີນເນື່ອງຈາກນໍ້າຖ້ວມ. ນອກຈາກນີ້, ອົງການ FAO ຍັງໄດ້ຊ່ວຍຊາວບ້ານປູກເຂົ້າ ແລະ ພືດຜັກ ຫລັງຈາກນໍ້າຖ້ວມໄດ້ທຳລາຍ ຜົນຜະລິດຂອງພວກເຂົາເຈົ້າ.
ອົງການ WFP ໄດ້ແຈກຢາຍເງິນສົດ ໃຫ້ຄົວເຮືອນຫລາຍກວ່າ 6.000 ຄົວເຮືອນ ເພື່ອຊື້ອາ ຫານໃນໄລຍະລໍຖ້າຜົນຜະລິດຂອງພວກເຂົາ, ເຊິ່ງຍັງເປັນການເຮັດໃຫ້ຕະຫລາດໃນທ້ອງຖິ່ນ ມີການຊື້ຂາຍເປັນປົກກະຕິ. ພ້ອມກັນນີ້, ອົງການ UNDP ໄດ້ສະໜອງໂອກາດ ໃນການເຮັດວຽກຊົ່ວຄາວ ແກ່ຜູ້ປະສົບໄພ, ໂດຍການທົດແທນເງິນໃຫ້ພວກເຂົາ ທີ່ໄດ້ສ້ອມແປງພື້ນຖານໂຄງລ່າງ ທີ່ໄດ້ຮັບຄວາມ ເສຍຫາຍຈາກນໍ້າຖ້ວມ ແລະ ອົງການ WHO ໄດ້ປ່ຽນອຸປະກອນພາຍໃນໂຮງໝໍເມືອງ ທີ່ໄດ້ຮັບຄວາມເສຍຫາຍ ແລະ ແຈກຢາຍວິຕາມິນບີ ເພື່ອຈຳກັດການແຜ່ລະບາດຂອງພະຍາດ ທີ່ເກີດຈາກການ ຂາດທາດວິ ຕາມິນບີ, ເຊິ່ງເກີດຂຶ້ນຫລັງຈາກທີ່ເກີດໄພພິບັດ.
 |
ເອກອັກຄະລັດຖະທູດ ແລະ ຜູ້ຕາງໜ້າອົງການສະຫະປະຊາຊາດ ຖ່າຍຮູບກັບປະຊາຊົນແຂວງຄຳມ່ວນ.
ທ່ານ ນາງ ຄາຣິນາ ອິມໂມເນັນ ຜູ້ປະສານງານອົງການ ສະຫະປະຊາຊາດ ປະຈຳ ສປປ ລາວ ກ່າວວ່າ: ປະຊາຊົນທີ່ໄດ້ຮັບຄວາມເດືອດຮ້ອນ ຈາກໄພນໍ້າຖ້ວມ ໄດ້ຮັບການຊ່ວຍ ເຫລືອຢ່າງວ່ອງໄວ ຖືວ່າເປັນສິ່ງສຳຄັນຫລາຍ. ພວກເຮົາຮັບຮູ້ການຕອບສະໜອງ ທີ່ທັນການຂອງກະຊວງແຮງງານ ແລະ ສະຫວັດດີການສັງຄົມ ຕໍ່ກັບຄວາມຕ້ອງການອັນຮີບດ່ວນ ແລະ ຫລາກຫລາຍຂອງ ປະຊາຊົນ ແຂວງຄຳມ່ວນ ແລະ ຫວັງວ່າກິດຈະກຳ ຈະສຳເລັດພາຍໃຕ້ການຊ່ວຍເຫລືອ ກອງທຶນຕອບໂຕ້ສຸກເສີນຂອງສະຫະປະຊາຊາດ.
（ແຫຼ່ງຂໍ້ມູນ： ຂປລ）
