 |
ທ່ານ ທອງຜ່ານ ສະຫວັນເພັດ ຮອງລັດຖະມົນຕີ ກະຊວງ ການຕາງປະເທດ ໄດ້ຕ້ອນຮັບ ການເຂົ້າຢ້ຽມ ຂ່ຳນັບ ແລະ ຍື່ນຈົດໝາຍ ແຕ່ງຕັ້ງຂອງ ທ່ານ ນາງ ຣິຄາດ້າ ຣິເຈີ .
ໂອກາດດັ່ງກ່າວ, ທ່ານຮອງລັດຖະມົນຕີ ກະຊວງການຕ່າງປະເທດ ໄດ້ສະແດງ ຄວາມຍິນດີ ຕ້ອນຮັບອັນອົບອຸ່ນ ມາຍັງຜູ້ຕາງໜ້າ ຂອງອົງການ UNDP ຄົນໃໝ່ ປະຈຳ ສປປ ລາວ ພ້ອມທັງ ສະແດງ ຄວາມຂອບໃຈ ແລະ ຕີລາຄາສູງ ຕໍ່ສາຍພົວພັນທີ່ດີ ແລະ ການຮ່ວມມື ຊ່ວຍເຫລືອເພື່ອການພັດ ທະນາຂອງອົງການ UNDP ຕໍ່ ສປປ ລາວ ໃນໄລຍະທີ່ຜ່ານມາ. ໃນນັ້ນ, ທ່ານ ທອງຜ່ານ ສະຫວັນເພັດ ໄດ້ສະແດງ ຄວາມເຊື່ອໝັ້ນວ່າ ພາຍໃຕ້ການນຳພາ ຂອງຜູ້ຕາງໜ້າຄົນໃໝ່, ອົງການ UN DP ຈະເພີ່ມທະວີ ການຮ່ວມມື ແລະ ສືບຕໍ່ໃຫ້ການສະໜັບສະໜູນແກ່ ສປປ ລາວ ໃນການຈັດຕັ້ງ ປະຕິບັດ ແຜນຍຸດທະສາດ ໂດຍສະເພາະ ແມ່ນດ້ານ ການພັດທະນາ ລະຫວ່າງ ສປປ ລາວ ແລະ ອົງການ UNDP, ການຈັດຕັ້ງ ປະຕິບັດ ແຜນພັດທະນາ ເສດຖະກິດ-ສັງຄົມ ແຫ່ງຊາດ, ການຫລຸດພົ້ນ ຈາກສະຖານະພາບ ປະເທດ ດ້ອຍພັດທະນາ ແລະ ການປະກອບສ່ວນ ເຂົ້າໃນການ ບັນລຸເປົ້າໝາຍ ການພັດ ທະນາແບບຍືນຍົງ (ປພຍ) ເພື່ອໃຫ້ສອດຄ່ອງ ກັບແຜນ ຍຸດທະສາດ ການພັດທະນາ ໃນພາກພື້ນ ແລະ ສາກົນ. ນອກຈາກນີ້, ທ່ານຮອງລັດຖະມົນຕີ ຍັງສະແດງ ຄວາມຂອບໃຈ ຕໍ່ອົງການດັ່ງກ່າວ ພ້ອມທັງ ອວຍພອນໃຫ້ ທ່ານຜູ້ຕາງໜ້າ ອົງການ UNDP ຄົນໃໝ່ ປະສົບຜົນສຳເລັດ ໃນການ ມາປະຕິບັດໜ້າທີ່ ຂອງທ່ານ ຢູ່ ສປປ ລາວ ໃນຄັ້ງນີ້.
ໃນໂອກາດດຽວກັນນີ້, ທ່ານ ນາງ ຣີຄາດ້າ ຣິເຈີ ກໍ່ໄດ້ສະແດງຄວາມຂອບໃຈ ຕໍ່ການຕ້ອນຮັບ ອົບອຸ່ນຂອງ ທ່ານ ທອງຜ່ານ ສະຫວັນເພັດ, ຮອງລັດຖະມົນຕີ ກະຊວງການຕ່າງປະເທດ ແລະ ສະແດງ ຄວາມຂອບໃຈ ມາຍັງລັດຖະບານ ແຫ່ງ ສປປ ລາວ ທີ່ໄດ້ອະນຸມັດໃຫ້ທ່ານ ມາປະຕິບັດໜ້າທີ່ຢູ່ ສປປ ລາວ. ທ່ານຍັງໄດ້ໃຫ້ຄຳໝັ້ນສັນຍາວ່າ ອົງການ UNDP ຈະສືບຕໍ່ ເພີ່ມທະວີ ການຮ່ວມມືກັບລັດ ຖະບານ ສປປ ລາວ ໃນການຈັດຕັ້ງ ປະຕິບັດແຜນງານຕ່າງໆ ທີ່ເປັນບູລິມະສິດຂອງ ສປປ ລາວ ໃຫ້ໄດ້ຮັບໝາກຜົນ ທີ່ດີໃນອະນາຄົດ ຂ້າງໜ້າ.
（ແຫຼ່ງຂໍ້ມູນ： ຂປລ）
