ທ່ານ ສະຫວັນຄອນ ຣາຊະມຸນຕີ, ຮອງລັດຖະມົນຕີກະ ຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ.(ພາບ: ສີວັນໄຊ)

ບັນດາຫົວຫນ້າກົມ, ຮອງຫົວຫນ້າກົມຕ່າງໆ ຈາກຫ້ອງວ່າການສໍານັກງານນາຍົກລັດ ຖະມົນຕີ, ກະຊວງຖວທ, ພ້ອມດ້ວຍວິທະຍາກອນຈາກມະຫາວີທະຍາໄລແຫ່ງຊາດ, ສະຖາບັນຄົ້ນຄວ້າວັດທະນະທໍາ ແລະ ວິທະຍາສາດສງຄົມແຫ່ງຊາດແລະ ສື່ມວນຊົນຈາກສໍານັກຂ່າວຕ່າງໆ ຂອງ ສູນກາງ ແລະ ທ້ອງຖິ່ນ ກໍ່ເຂົ້າຮ່ວມເຊັ່ນດຽວກັນ. ໃນໂອກາດພິທີເປີດກອງປະຊຸມ, ທ່ານຈະເລີນ ເຢຍປາວເຮີ, ລັດຖະມົນຕີປະຈໍາສໍານັກງານນາຍົກລັດຖະມົນຕີ, ໂຄສົກລັດຖະບານ ມີຄໍາເຫັນວ່າ: ການຈັດກອງປະຊຸມຄັ້ງນີ້ ເປັນການພົບປະ-ປຶກສາຫາລື ຮ່ວມກັນ ລະຫວ່າງໂຄສົກລັດຖະບານ ແລະ ພາກສ່ວນຕ່າງໆທີ່ເຮັດວຽກຕິດພັນກັບການນໍາໃຊ້ພາສາລາວ, ໂດຍສະເພາະແມ່ນສື່ມວນຊົນ, ທັງເປັນຄວາມເອົາໃຈໃສ່ໃນການຄຸ້ມຄອງຂໍ້ມູນຂ່າວສານຂອງລັດຖະບານ ຕໍ່ການນໍາໃຊ້ພາສາລາວ, ການຄຸ້ມຄອງ ແລະ ການນໍາໃຊ້ຂໍ້ມູນທາງສື່ອອນລາຍ ໃຫ້ໄປໃນທິດທາງດຽວກັນ ເປັນຕົ້ນ: ການຂຽນຂ່າວ, ການກ່າວຄໍາເຫັນຕ່າງໆ, ການໃຊ້ຄໍາສັບ,ວະລີ, ແລະ ປະໂຫຍກໃຫ້ຖືກຕ້ອງຕາມຫລັກໄວຍາກອນ, ໃຫ້ມີຄວາມຫມາຍຊັດເຈນ ເພື່ອເຮັດໃຫ້ການຄຸ້ມຄອງ ແລະ ການນໍາໃຊ້ຂໍ້ມູນຂ່າວສານ ທາງສື່ອອນລາຍ ມີຄວາມຖືກຕ້ອງ ແລະ ເຫມາະສົມ, ທັງເກີດຜົນປະໂຫຍດຕໍ່ຕົນເອງ ແລະ ສັງຄົມຢ່າງແທ້ຈິງ ແລະ ອື່ນໆ. ໃນກອງປະຊຸມກ່ຽວການນໍາໃຊ້ພາສາລາວ, ການຄຸ້ມຄອງ ແລະ ການນໍາໃຊ້ສື່ສັງຄົມອອນລາຍຄັ້ງທີ 2 ຄັ້ງນີ້, ບັນດາຜູ້ເຂົ້າຮ່ວມ ຈະໄດ້ຮຽນຮູ້ກ່ຽວກັບຫລັກການພື້ນຖານໃນການນໍາໃຊ້ພາສາລາວ, ສະພາບຕົວຈິງໃນການນໍາໃຊ້ພາສາລາວໃນສັງຄົມປະຈຸບັນ ແລະ ທິດທາງແກ້ໄຂໃນຕໍ່ຫນ້າ, ລວມທັງທັກສະການເວົ້າ, ການຄຸ້ມຄອງ ແລະ ການນໍາໃຊ້ສື່ສັງຄົມອອນລາຍ ແລະ ການຄຸ້ມຄອງສື່ມວນຊົນໃນຍຸກ 4.0. ກອງປະຊຸມຈະດໍາເນີນໄປເປັນເວລາ 2 ວັນຈຶ່ງຈະສໍາເລັດ.

（ແຫຼ່ງ​ຂໍ້​ມູນ​： ເດດອາລຸນ ແກ້ວວິໄລ/Lao National Radio）