ຍ້ອງຍໍນັກຮຽນຊະນະເລີດ ແຂ່ງຂັນເລກປິດສະໜາສາກົນ

18:36 | 25/04/2019

ເພື່ອເປັນການພັດທະນາການຮຽນ-ການສອນ ແຜນພັດທະນາການສຶກສາ ປະຈຳສົກຮຽນ 2018-2019 ສ້າງຄວາມສາມັກຄີພາຍໃນໂຮງຮຽນ ແລະ ນັກຮຽນ ເປັນການແລກປ່ຽນບົດຮຽນປະສົບປະການ ສ້າງພື້ນຖານຄວາມເຂັ້ມແຂງ ເພື່ອກ້າວສູ່ການແຂ່ງຂັນການຮຽນໃນລະດັບພາກພື້ນ ແລະ ສາກົນ ທາງໂຮງຮຽນນານາຊາດລາວ ໄດ້ຈັດການແຂ່ງຂັນເລກປິດສະໜາສາກົນຂຶ້ນວັນທີ 6-11 ເມສາ 2019 ທີ່ໂຮງຮຽນດັ່ງກ່າວ.

ຍ້ອງຍໍນັກຮຽນຊະນະເລີດ ແຂ່ງຂັນເລກປິດສະໜາສາກົນ. ພາບ: vientianemai.net

ການຈັດການແຂ່ງຂັນເລກປິດສະໜາສາກົນຈັດຂຶ້ນມາຫຼາຍສົກຮຽນ ສະເພາະສົກຮຽນ 2018-2019 ມີຈຳນວນໂຮງຮຽນທີ່ເຂົ້າສະໝັກທັງໝົດ 94 ໂຮງຮຽນ ໃນນັ້ນ ມີຊັ້ນປະຖົມ 51 ໂຮງຮຽນ ມີນັກສອບເສັງທັງໝົດ 791 ຄົນ ຍິງ 474 ຄົນ ຊັ້ນມັດທະຍົມມີ 43 ໂຮງຮຽນ ມີນັກສອບເສັງ 544 ຄົນ ຍິງ 333 ຄົນ.

ຈຳນວນໂຮງຮຽນທີ່ໄດ້ເຂົ້າຮອບມີ 19 ໂຮງຮຽນ ຄື: ໂຮງຮຽນນີຣະດາ ມສ ວຽງຈັນ ຫຼຽວໂຕ ປາດຖະໜາ ສັນທະລັກ ຫງຽນຢູ ນານາຊາດກຽດຕິສັກ ນານາຊາດປັນຍາທິບ ນານາຊາດວຽງຈັນພັດທະນາ ສຣິສັດທິຍາໃສ ນີຣະດາຈອມເພັດ ພອນແກ້ວວິທະຍາ ມີເຊີ້ນສິງກະໂປ ຮາກແກ້ວ ລາດຊະວົງ ໂຮເຟ ສິນໄຊ ພອນສະຫວັນ ແລະ ໂຮງຮຽນສີວັດທະນາ.

ສ່ວນຈຳນວນນັກຮຽນທີ່ໄດ້ຮັບລາງວັນຊັ້ນປະຖົມ ໄດ້ຮັບຫຼຽນຄຳ 15 ຫຼຽນ ເງິນ 30 ຫຼຽນ ທອງ 30 ຫຼຽນ ແລະ ຊັ້ນມັດທະຍົມກໍເຊັ່ນດຽວກັນ ໃນນັ້ນ ຊັ້ນປະຖົມໄດ້ຮັບຫຼຽນຄຳອັນດັບ 1 ນາງ ມໍລະກົດ ບຸນເພັດ ແລະ ອັນດັບ 2 ນາງ ພະນົມພອນ ວາຄຳໄຊ ທັງສອງຈາກໂຮງຮຽນຫງຽນຢູ ແລະ ອັນດັບ 3 ທ້າວ ອານາພອນ ແສງສະວັນ ຈາກໂຮງຮຽນສັນທະລັກ ສ່ວນຊັ້ນມັດທະຍົມໄດ້ຮັບຫຼຽນຄຳ ອັນດັບ 1 ນາງ ສັນຢົງ ໂຈ ຈາກໂຮງ ຮຽນ KIS ອັນດັບ 2 ນາງ ມິນຕາ ແກ່ນຈັນດີ ໂຮງຮຽນປາດຖະໜາ ແລະ ອັນດັບ 3 ນາງ ນ້ຳຝົນ ຈັນທະນະຄອນ ຈາກໂຮງຮຽນນີຣະດາ.

ພິທີສະຫຼຸບຜົນການແຂ່ງຂັນ ແລະ ມອບລາງວັນຄັ້ງນີ້ ຈັດຂຶ້ນວັນທີ 11 ເມສາ 2019 ຜ່ານມາ ທີ່ໂຮງຮຽນນານາຊາດລາວ ມີທ່ານ ບັງຈົງ ລັດທະວັນ ຮອງຫົວໜ້າກົມສາມັນ ກະຊວງສຶກສາທິການ ແລະ ກີລາ ທ່ານ ຊົມພູ ແກ້ວປັນຍາ ຫົວໜ້າພະແນກສຶກສາທິການ ແລະ ກີລາ ນະຄອນຫຼວງວຽງຈັນ ບັນດາຜູ້ອຳນວຍການໂຮງຮຽນ ພະນັກງານ ຄູ-ອາຈານ ແລະ ຜູ້ປົກຄອງນັກຮຽນເຂົ້າຮ່ວມ.

（ແຫຼ່ງຂໍ້ມູນ： vientianemai.net）