ສືບຕໍ່ປະເພນີ, ສືບຕໍ່ຂຽນບົດສຳເລັດໃນໄລຍະພັດທະນາໃໝ່ຂອງປະເທດ

ທ່ານ ປອ. ຟານແອັງເຊີນ, ປະທານສະຫະພັນບັນດາອົງການມິດຕະພາບຫວຽດນາມ.

ບັນດາທິດທາງດັ່ງກ່າວໄດ້ຖືກສ້າງຂຶ້ນບົນພື້ນຖານການປະເມີນຢ່າງຮອບຄອບຕໍ່ສະພາບການຂອງໂລກ ແລະ ພາກພື້ນ, ຊາບຊຶມບັນດາຄວາມຮຽກຮ້ອງທີ່ນັບມື້ນັບສູງຂຶ້ນຂອງການນຳພັກ, ລັດ, ພ້ອມທັງອີງໃສ່ສະພາບຕົວຈິງຂອງສະຫະພັນບັນດາອົງການມິດຕະພາບຫວຽດນາມ ແລະ ບັນດາອົງການສະມາຊິກຢູ່ສູນກາງ ແລະ ທ້ອງຖິ່ນ.

ໃນຫຼາຍສິບປີຜ່ານມາ, ບໍ່ເຄີຍມີເວລາໃດທີ່ໂລກຕ້ອງປະເຊີນພ້ອມກັນກັບຄວາມຜັນຜວນຫຼາຍດ້ານທີ່ສອດປະສານ ແລະ ສັບສົນເຊັ່ນນີ້ - ລະບຽບສາກົນເກີດຮອຍແຕກແຍກ, ການແຂ່ງຂັນທາງຍຸດທະສາດລະຫວ່າງບັນດາປະເທດໃຫຍ່ນັບມື້ນັບຮຸນແຮງ, ການປະທະກັນໃນຂອບເຂດຈຳກັດຢູ່ຫຼາຍພາກພື້ນ, ການເຕີບໂຕຂອງເສດຖະກິດໂລກຫຼຸດລົງ, ການປ່ຽນແປງດິນຟ້າອາກາດນັບມື້ນັບສົ່ງຜົນກະທົບໃນທາງລົບ, ແລະ ເຕັກໂນໂລຊີຫຼັກ, ໂດຍສະເພາະຂໍ້ມູນຂະໜາດໃຫຍ່, ປັນຍາປະດິດ, ການຮຽນຮູ້ຂອງເຄື່ອງຈັກ, ຊິບເຄິ່ງຊັກນຳໄຟຟ້າ ກຳລັງຈັດຮູບແບບພູມສັນຖານຂອງສາຍພົວພັນສາກົນຄືນໃໝ່ ດ້ວຍຮູບແບບທີ່ບໍ່ເຄີຍມີມາກ່ອນ.

ຢູ່ພາຍໃນປະເທດ, ໂດຍຊາບຊຶມ ແລະ ຜັນຂະຫຍາຍຄຳຊີ້ນຳຂອງການນຳພັກ, ລັດ, ສະຫະພັນບັນດາອົງການມິດຕະພາບຫວຽດນາມ ແລະ ບັນດາອົງການສະມາຊິກ ຫາກໍສຳເລັດການສັບຊ້ອນອົງການ ແລະ ກົງຈັກຢ່າງກວ້າງຂວາງ, ເພື່ອປັບຕົວເຂົ້າກັບຮູບແບບອຳນາດການປົກຄອງທ້ອງຖິ່ນ 2 ຂັ້ນໃນຂອບເຂດທົ່ວປະເທດ. ຂອບເຂດພື້ນທີ່ກວ້າງຂຶ້ນ, ປະລິມານວຽກງານຫຼາຍຂຶ້ນ - ຮຽກຮ້ອງໃຫ້ຄວາມສາມາດດ້ານການຈັດຕັ້ງ ແລະ ປະສານງານຂອງທົ່ວລະບົບຕ້ອງໄດ້ຍົກຂຶ້ນສູ່ລະດັບໃໝ່ທີ່ສູງກວ່າເກົ່າ.

ໂລກມີຄວາມຜັນຜວນ, ປະເທດກ້າວເຂົ້າສູ່ໄລຍະພັດທະນາໃໝ່, ລະບົບອົງການຫາກໍໄດ້ຮັບການສັບຊ້ອນຄືນໃໝ່ - ສາມປັດໄຈນີ້ເມື່ອປະສານເຂົ້າກັນ ໄດ້ວາງພາລະຮັບຜິດຊອບອັນໃຫຍ່ຫຼວງໄວ້ເທິງບ່າຂອງຜູ້ປະຕິບັດວຽກງານການຕ່າງປະເທດປະຊາຊົນໃນປັດຈຸບັນ - ນັ້ນຄື ການກຳນົດບັນດາທິດທາງໃຫຍ່ ແລະ ໃໝ່ ສຳລັບໄລຍະ 5 ປີຕໍ່ໜ້າ.

ປະເພນີອັນສະຫງ່າງາມ

ການຕ່າງປະເທດປະຊາຊົນ ແມ່ນຄວາມຄິດສ້າງສັນອັນໂດດເດັ່ນ ແລະ ມີລະດັບຍຸດທະສາດຂອງພັກເຮົາ ແລະ ຂອງປະທານ ໂຮ່ຈິມິນ - ເປັນວິທີການດ້ານການຕ່າງປະເທດທີ່ມີອັດຕະລັກຫວຽດນາມຢ່າງເຂັ້ມຂຸ້ນ, ຖືກສ້າງຕັ້ງ ແລະ ພັດທະນາຈາກຄວາມປາຖະໜາຢາກໄດ້ເອກະລາດ, ກຸ້ມຕົນເອງ, ຈາກປະເພນີຮັກສັນຕິພາບ ແລະ ມະນຸດສະທຳຂອງຊາດ, ຈາກແນວຄິດໂຮ່ຈິມິນ ແລະ ແນວທາງການຕ່າງປະເທດຂອງພັກ. ໃນຊຸມປີແຫ່ງການຕໍ່ສູ້ຍາດເອົາເອກະລາດຂອງຊາດ ແລະ ໂຮມປະເທດເປັນເອກະພາບ, ການຕ່າງປະເທດປະຊາຊົນນັ້ນເອງໄດ້ປະກອບສ່ວນປ່ຽນຄວາມປາຖະໜາສັນຕິພາບຂອງຫວຽດນາມໃຫ້ກາຍເປັນມະໂນທຳ, ກາຍເປັນສຽງຮ່ວມຂອງມະນຸດຊາດທີ່ກ້າວໜ້າ.

ເມື່ອກ້າວເຂົ້າສູ່ໄລຍະປ່ຽນແປງໃໝ່ ແລະ ການເຊື່ອມໂຍງສາກົນ, ການຕ່າງປະເທດປະຊາຊົນສືບຕໍ່ເປັນກຳລັງສຳຄັນ ປະກອບສ່ວນທຳລາຍສະພາບການປິດລ້ອມ ແລະ ຂວ້ຳບາດ, ບໍ່ພຽງແຕ່ນຳຫວຽດນາມ “ກ້າວອອກສູ່ໂລກ”, ແຕ່ຍັງນຳໂລກເຂົ້າຫາແຕ່ລະທ້ອງຖິ່ນ, ແຕ່ລະຊຸມຊົນ. ດ້ວຍເຄືອຂ່າຍຄູ່ຮ່ວມນັບພັນແຫ່ງຢູ່ທົ່ວທຸກທະວີບ, ບັນດາກິດຈະກຳສັນຕິພາບ, ສາມັກຄີ ແລະ ມິດຕະພາບນັບພັນກິດຈະກຳທີ່ຖືກຈັດຂຶ້ນໃນແຕ່ລະປີ, ການຕ່າງປະເທດປະຊາຊົນໄດ້ຂົນຂວາຍການຊ່ວຍເຫຼືອ, ປະກອບສ່ວນໃນການຫຼຸດຜ່ອນຄວາມທຸກຍາກ, ຮັບປະກັນສະຫວັດດີການສັງຄົມ, ສາທາລະນະສຸກ, ການສຶກສາ, ປົກປັກຮັກສາສິ່ງແວດລ້ອມ, ແກ້ໄຂຜົນຕາມມາຈາກສົງຄາມ, ຮັບມືກັບໄພທຳມະຊາດ ແລະ ພະຍາດລະບາດ; ພ້ອມກັນນັ້ນ ຍັງຊຸກຍູ້ວຽກງານຄົ້ນຄວ້າ, ຂໍ້ມູນຂ່າວສານຕ່າງປະເທດ ແລະ ວຽກງານຄົນຫວຽດນາມຢູ່ຕ່າງປະເທດ, ປະກອບສ່ວນໂຄສະນາພາບລັກຂອງປະເທດ ແລະ ປະຊາຊົນຫວຽດນາມ, ພ້ອມທັງເພີ່ມທະວີຄວາມເຂົ້າໃຈ ແລະ ຄວາມໄວ້ວາງໃຈລະຫວ່າງບັນດາຊາດ.

ທ່ານ ເລຂາທິການໃຫຍ່ ໂຕເລິມ, ປະທານປະເທດ ເລືອງເກື່ອງ ພ້ອມກັບ ເລຂາທິການໃຫຍ່, ປະທານປະເທດຈີນ ສີຈິ້ນຜິງ ແລະ ບັນດາຜູ້ແທນ ປະຕິບັດພິທີເປີດ “ຂະບວນເດີນທາງສີແດງເພື່ອຄົ້ນຄວ້າ, ຮ່ຳຮຽນຂອງຊາວໜຸ່ມ”, ຮ່າໂນ້ຍ, ເດືອນເມສາ 2025.

ໃນກະແສລວມດັ່ງກ່າວ, ສະຫະພັນບັນດາອົງການມິດຕະພາບຫວຽດນາມ ແລະ ບັນດາອົງການສະມາຊິກ ໄດ້ບໍ່ຢຸດຢັ້ງພັດທະນາເຕີບໃຫຍ່, ຄ່ອຍໆຢືນຢັນບົດບາດເປັນແກນຫຼັກ ແລະ ເປັນກຳລັງວິຊາສະເພາະໃນວຽກງານການຕ່າງປະເທດປະຊາຊົນ, ກາຍເປັນຂົວເຊື່ອມມິດຕະພາບ, ເປັນທູດແຫ່ງສັນຕິພາບ, ນຳສານຂອງຫວຽດນາມທີ່ຮັກສັນຕິພາບ, ຊື່ສັດຈິງໃຈ ແລະ ມີຄວາມຮັບຜິດຊອບ ໄປສູ່ມິດສະຫາຍໃນ 5 ທະວີບ.

ບົດຮຽນໃຫຍ່ປະການໜຶ່ງທີ່ປະຫວັດສາດໄດ້ຝາກໄວ້ໃຫ້ພວກເຮົາ - ຜູ້ປະຕິບັດວຽກງານການຕ່າງປະເທດປະຊາຊົນໃນປັດຈຸບັນ - ໄດ້ຖືກສະຫຼຸບໄວ້ໃນຄຳປະເມີນຂອງເລຂາທິການໃຫຍ່ ເລິມ ວ່າ: ຖານະ ແລະ ກຽດສັກສີຂອງປະເທດ ບໍ່ໄດ້ຢູ່ພຽງແຕ່ກຳລັງດ້ານວັດຖຸ ແຕ່ຍັງຢູ່ທີ່ “ກຳລັງແຮງທາງດ້ານຈິດໃຈ”. ນັ້ນຄື ປະຫວັດສາດອັນສະຫງ່າງາມ, ວັດທະນະທຳທີ່ອຸດົມດ້ວຍອັດຕະລັກຂອງຊາດ, ບັນດາຜົນສຳເລັດອັນໃຫຍ່ຫຼວງ ແລະ ມີຄວາມໝາຍທາງປະຫວັດສາດຂອງພາລະກິດປ່ຽນແປງໃໝ່, ແມ່ນແນວທາງການຕ່າງປະເທດແຫ່ງສັນຕິພາບ, ຮັກໄມຕີ, ແກ້ໄຂບັນຫາສາກົນຢ່າງກົມກຽວ, ມີເຫດຜົນ ແລະ ມີນ້ຳໃຈ, ເຄົາລົບກົດໝາຍສາກົນ, ພ້ອມທັງແມ່ນຄວາມເຫັນດີ ແລະ ການສະໜັບສະໜູນຈາກປະຊາຊົນໂລກ.

ຮ່ອງຮອຍໃນອາຍຸການທີ່ເຕັມໄປດ້ວຍສິ່ງທ້າທາຍ

ອາຍຸການ 2019 - 2026 ໄດ້ສິ້ນສຸດລົງໃນສະພາບການທີ່ໂລກມີຄວາມຜັນຜວນຢ່າງບໍ່ເຄີຍມີມາກ່ອນ, ສົ່ງຜົນກະທົບຢ່າງກວ້າງຂວາງ ແລະ ເລິກເຊິ່ງຕໍ່ຫວຽດນາມໂດຍລວມ ແລະ ຕໍ່ວຽກງານການຕ່າງປະເທດປະຊາຊົນໂດຍສະເພາະ. ໃນສະພາບການດັ່ງກ່າວ, ສະຫະພັນບັນດາອົງການມິດຕະພາບຫວຽດນາມ ແລະ ບັນດາອົງການສະມາຊິກ ໄດ້ພະຍາຍາມຜ່ານຜ່າຄວາມຫຍຸ້ງຍາກ, ຢືນຢັນຄວາມໜັກແໜ້ນ ແລະ ບັນລຸຫຼາຍຜົນສຳເລັດໃນທາງບວກ.

ສະຫະພັນບັນດາອົງການມິດຕະພາບຫວຽດນາມ ໄດ້ຄົ້ນຄວ້າສະເໜີແນະ ແລະ ຈັດຕັ້ງຫຼາຍກິດຈະກຳການຕ່າງປະເທດປະຊາຊົນ ໃນຂອບເຂດບັນດາການຢ້ຽມຢາມຂອງການນຳພັກ, ລັດ; ຈັດຕັ້ງສຳເລັດຫຼາຍພັນກິດຈະກຳການຕ່າງປະເທດປະຊາຊົນ ທັງຢູ່ສູນກາງ ແລະ ທ້ອງຖິ່ນ, ໃນນັ້ນມີບັນດາເຫດການຂະໜາດໃຫຍ່ທີ່ມີຜູ້ເຂົ້າຮ່ວມນັບພັນຄົນ, ແມ່ນແຕ່ນັບໝື່ນຄົນ. ຫຼາຍກົນໄກຮ່ວມມືທີ່ມີຈຸດເດັ່ນສະເພາະໄດ້ຖືກສ້າງຂຶ້ນ ແລະ ຮັກສາໄວ້ຢ່າງສະໝ່ຳສະເໝີກັບບັນດາຄູ່ຮ່ວມສຳຄັນ, ນັບແຕ່ເວທີປາໄສປະຊາຊົນ ຫວຽດນາມ - ຈີນ, ເວທີປາໄສປະຊາຊົນ ຫວຽດນາມ - ຣັດເຊຍ, ຊຸດກິດຈະກຳແລກປ່ຽນມິດຕະພາບ ຫວຽດນາມ - ສະຫະລັດອາເມລິກາ, ໂຄງການ “ບົ່ມເພາະໜໍ່ແໜງມິດຕະພາບ”, ການປະກວດ “ຂອງທີ່ລະນຶກເລົ່າເລື່ອງ”, ພ້ອມທັງບັນດາກິດຈະກຳກັບຄູ່ຮ່ວມຢູ່ບັນດາປະເທດອາຊຽນ, ເອີຣົບ ແລະ ບັນດາມິດສະຫາຍດັ້ງເດີມ, ປະກອບສ່ວນປັບປຸງຄວາມໄວ້ວາງໃຈທາງການເມືອງໃຫ້ໝັ້ນຄົງ, ຮັດແໜ້ນມິດຕະພາບ ແລະ ເປີດກວ້າງພື້ນທີ່ເພື່ອຊຸກຍູ້ການຮ່ວມມືພັດທະນາເສດຖະກິດ - ສັງຄົມຢ່າງຍືນຍົງ.

ທ່ານ ໂຕເລິມ, ເລຂາທິການໃຫຍ່, ປະທານປະເທດ ພົບປະກັບການນຳພັກກອມມູນິດ, ບັນດາອົງການຝ່າຍຊ້າຍ ແລະ ມິດສະຫາຍສະຫະລັດອາເມລິກາ ຢູ່ນະຄອນ New York, ເດືອນກັນຍາ 2024, ໃນໂຄງການທີ່ຄະນະຕ່າງປະເທດສູນກາງ, ສະຫະພັນບັນດາອົງການມິດຕະພາບຫວຽດນາມ ແລະ ຄະນະຜູ້ແທນຖາວອນຫວຽດນາມປະຈຳສະຫະປະຊາຊາດ ປະສານສົມທົບກັນຈັດຕັ້ງ.

ພວກເຮົາໄດ້ເປັນເຈົ້າພາບຈັດຕັ້ງກອງປະຊຸມໃຫຍ່ ຄັ້ງທີ XXII ຂອງສະພາສັນຕິພາບໂລກ ໃນປີ 2022 ສຳເລັດຜົນຢ່າງຈົບງາມ, ແລະ ສອງຄັ້ງຕິດຕໍ່ກັນຢືນອັນດັບໜຶ່ງຂອງໂລກດ້ານຈຳນວນລາຍເຊັນສະໜັບສະໜູນຂະບວນການປົດອາວຸດນິວເຄລຍ, ຢືນຢັນຄວາມຮັບຜິດຊອບ ແລະ ສຽງຂອງປະຊາຊົນຫວຽດນາມ ຕໍ່ສັນຕິພາບ ແລະ ຄວາມໝັ້ນຄົງຂອງມະນຸດຊາດ.

ໃນສະພາບການທີ່ແຫຼ່ງການຊ່ວຍເຫຼືອສາກົນທົ່ວໂລກຫຼຸດລົງ, ແຫຼ່ງການຊ່ວຍເຫຼືອຈາກອົງການ NGO ຕ່າງປະເທດ ຍັງຄົງຖືກຮັກສາໄວ້ຢ່າງໝັ້ນຄົງໃນແຕ່ລະປີ, ປະກອບສ່ວນກໍ່ສ້າງເຮືອນນັບພັນຫຼັງໃຫ້ແກ່ຄົນທຸກຍາກ ໃນໂຄງການລຶບລ້າງເຮືອນຊົ່ວຄາວ ແລະ ເຮືອນຊຸດໂຊມ, ລະດົມທຶນຫຼາຍຮ້ອຍຕື້ດົ່ງ ເພື່ອຮັບມືກັບການແຜ່ລະບາດ COVID-19 ແລະ ແກ້ໄຂຜົນຕາມມາຈາກໄພທຳມະຊາດ, ພ້ອມທັງຫຼາຍພັນຕື້ດົ່ງ ສຳລັບບັນດາໂຄງການແກ້ໄຂຜົນຕາມມາຈາກສົງຄາມ, ຊ່ວຍເຫຼືອຄົນພິການ, ສະໜັບສະໜູນດ້ານສາທາລະນະສຸກ, ການສຶກສາ, ຮັບມືກັບການປ່ຽນແປງດິນຟ້າອາກາດ, ສ້າງອາຊີບ ແລະ ລາຍຮັບທີ່ຍືນຍົງ...

ຜູ້ຕາງໜ້າບັນດາອົງການ NGO ຕ່າງປະເທດ ຮັບໃບຍ້ອງຍໍຈາກສະຫະພັນບັນດາອົງການມິດຕະພາບຫວຽດນາມ ໃນພິທີຍ້ອງຍໍການປະກອບສ່ວນ ປີ 2024.

ຄຸນນະພາບວຽກງານຄົ້ນຄວ້າ, ສະເໜີແນະ ແລະ ຂໍ້ມູນຂ່າວສານຕ່າງປະເທດ ໄດ້ຮັບການປັບປຸງຢ່າງເຫັນໄດ້ຊັດ, ປະກອບສ່ວນຢ່າງເປັນຮູບປະທຳເຂົ້າໃນຂະບວນການຕັດສິນໃຈຕໍ່ຫຼາຍບັນຫາການຕ່າງປະເທດທີ່ສຳຄັນ.

ໃນໄລຍະ 2019 - 2026, ສະຫະພັນບັນດາອົງການມິດຕະພາບຫວຽດນາມ ເປັນກຽດໄດ້ຮັບຫຼຽນໄຊໂຮ່ຈິມິນ ແລະ ຫຼຽນໄຊແຮງງານ ຊັ້ນໜຶ່ງ ສຳລັບບັນດາຄວາມພະຍາຍາມ ແລະ ຜົນສຳເລັດໃນທາງບວກ ໃນວຽກງານການຕ່າງປະເທດປະຊາຊົນ.

ຜົນສຳເລັດທັງໝົດເຫຼົ່ານັ້ນ, ເຖິງແມ່ນເປັນສິ່ງທີ່ໜ້າພາກພູມໃຈ, ແຕ່ກໍຍັງບໍ່ແມ່ນຈຸດໝາຍສຸດທ້າຍ. ເມື່ອເບິ່ງກົງເຂົ້າສູ່ຄວາມເປັນຈິງ, ການເຄື່ອນໄຫວຂອງສະຫະພັນບັນດາອົງການມິດຕະພາບຫວຽດນາມ ຍັງມີຂໍ້ຈຳກັດບາງປະການ: ການຮັບຮູ້ຕໍ່ບົດບາດຂອງການຕ່າງປະເທດປະຊາຊົນຢູ່ບາງແຫ່ງຍັງບໍ່ຄົບຖ້ວນ; ບາງກິດຈະກຳຍັງມີລັກສະນະຮູບການ, ຍັງບໍ່ສ້າງຄຸນຄ່າທີ່ແທ້ຈິງ; ເຄືອຂ່າຍຄູ່ຮ່ວມຢູ່ບັນດາເຂດຍຸດທະສາດ ແລະ ໃນບັນດາກຸ່ມທີ່ມີອິດທິພົນ ຍັງບໍ່ສົມສ່ວນກັບຄວາມຮຽກຮ້ອງ; ວຽກງານຄົ້ນຄວ້າ, ສະເໜີແນະ ໃນບາງເວລາຍັງມີລັກສະນະແກ້ໄຂເປັນເລື່ອງໆ, ຍັງບໍ່ທັນກັບບັນດາການປ່ຽນແປງອັນໄວວາ ແລະ ສັບສົນຂອງສະພາບການໂລກ. ການກຳນົດໃຫ້ຊັດເຈນບັນດາຂໍ້ຈຳກັດເຫຼົ່ານີ້ ແມ່ນພື້ນຖານໃຫ້ກອງປະຊຸມໃຫຍ່ ຄັ້ງທີ VII ກຳນົດທິດທາງ, ເປົ້າໝາຍໃໝ່ ແລະ ວິທີແກ້ໄຂພື້ນຖານ ສຳລັບອາຍຸການໃໝ່.

ເສັ້ນທາງຂ້າງໜ້າ

ຈາກບັນດາບົດຮຽນຂອງອາຍຸການທີ່ຜ່ານມາ ແລະ ຕໍ່ໜ້າບັນດາຄວາມຮຽກຮ້ອງຂອງໄລຍະພັດທະນາໃໝ່ຂອງປະເທດ, ກອງປະຊຸມໃຫຍ່ ຄັ້ງທີ VII, ອາຍຸການ 2026 - 2031 ໄດ້ກຳນົດເປົ້າໝາຍຕະຫຼອດອາຍຸການວ່າ: “ສ້າງສະຫະພັນບັນດາອົງການມິດຕະພາບຫວຽດນາມ ຕັ້ງແຕ່ສູນກາງເຖິງທ້ອງຖິ່ນໃຫ້ເຂັ້ມແຂງຮອບດ້ານ, ມີຖັນແຖວພະນັກງານທີ່ມີຫຼັກໝັ້ນການເມືອງໜັກແໜ້ນ, ຊຳນານພາສາຕ່າງປະເທດ, ເກັ່ງກ້າດ້ານວິຊາສະເພາະ; ພັດທະນາເຄືອຂ່າຍຄູ່ຮ່ວມສາກົນທີ່ກວ້າງຂວາງ ແລະ ມີອິດທິພົນຢ່າງເລິກເຊິ່ງ. ຢືນຢັນຢ່າງໜັກແໜ້ນ ແລະ ສົ່ງເສີມສູງສຸດບົດບາດເປັນແກນຫຼັກໃນເສົາຄ້ຳການຕ່າງປະເທດປະຊາຊົນ; ປະສານສົມທົບຢ່າງແໜ້ນແຟ້ນ ແລະ ມີປະສິດທິຜົນກັບການຕ່າງປະເທດຂອງພັກ ແລະ ການທູດຂອງລັດ, ປະກອບສ່ວນປະຕິບັດໜ້າທີ່ “ສຳຄັນຍິ່ງ, ເປັນປະຈຳ” ໃຫ້ສຳເລັດຜົນ, ສົ່ງເສີມບົດບາດນຳໜ້າໃນການສ້າງ ແລະ ຮັກສາສະພາບແວດລ້ອມສັນຕິພາບ, ໝັ້ນຄົງ, ປົກປ້ອງປິຕຸພູມແຕ່ຫົວທີ, ແຕ່ໄກ ຢ່າງໜັກແໜ້ນ, ປະກອບສ່ວນນຳພາປະເທດກ້າວເຂົ້າສູ່ໄລຍະພັດທະນາໃໝ່”.

ຄຽງຄູ່ກັບໜ້າທີ່ແກນກາງແມ່ນ “ສ້າງພື້ນຖານສັງຄົມໃນທາງບວກ, ເອື້ອອຳນວຍ” ໃຫ້ແກ່ສາຍພົວພັນລະຫວ່າງຫວຽດນາມກັບບັນດາປະເທດ, ການຕ່າງປະເທດປະຊາຊົນຈຳເປັນຕ້ອງເປັນເຈົ້າການສ້າງສັນແຫຼ່ງກຳລັງເພື່ອການພັດທະນາ, ສ້າງສັນພາບລັກ ແລະ ກຽດສັກສີຂອງປະເທດ, ສ້າງສັນພື້ນທີ່ສົນທະນາ ເພື່ອປົກປ້ອງຜົນປະໂຫຍດຂອງປະເທດແຕ່ຫົວທີ, ແຕ່ໄກ; ຖືເອົາປະສິດທິຜົນທີ່ແທ້ຈິງ, ຜົນປະໂຫຍດຂອງປະເທດຊາດ - ຂອງຊາດ ແລະ ຂອງປະຊາຊົນ ເປັນມາດຕະຖານວັດແທກສຳລັບທຸກກິດຈະກຳ.

ພິທີລົງນາມບົດບັນທຶກຄວາມເຂົ້າໃຈວ່າດ້ວຍການຮ່ວມມື ລະຫວ່າງໂຮງໝໍມິດຕະພາບ ແລະ ສູນມະເຮັງ Napalkov ໃນຂອບເຂດເວທີປາໄສປະຊາຊົນ ຫວຽດນາມ - ຣັດເຊຍ ຄັ້ງທີໜຶ່ງ, ເດືອນກັນຍາ 2025.

ເພື່ອຫັນບັນດາທິດທາງດັ່ງກ່າວໃຫ້ກາຍເປັນຈິງ, ທິດນຳການດຳເນີນງານຕະຫຼອດອາຍຸການໄດ້ຖືກກຳນົດຢ່າງຈະແຈ້ງວ່າ: “ເປັນເຈົ້າການປັບຕົວ, ບຸກທະລຸດ້ານນະວັດຕະກຳ, ເປັນຮູບປະທຳ, ມີປະສິດທິຜົນ”, ຄຽງຄູ່ກັບບັນດາກຸ່ມໜ້າທີ່ ແລະ ວິທີແກ້ໄຂຈຸດສຸມ, ນັບແຕ່ການຍົກສູງການຮັບຮູ້ກ່ຽວກັບຖານະ ແລະ ບົດບາດຂອງການຕ່າງປະເທດປະຊາຊົນ, ເຖິງການຂະຫຍາຍ ແລະ ຫຼາກຫຼາຍສາຍພົວພັນການຕ່າງປະເທດ; ເປັນເຈົ້າການຂະຫຍາຍເຄືອຂ່າຍຄູ່ຮ່ວມໄປສູ່ບັນດາກຸ່ມເປົ້າໝາຍໃໝ່ທີ່ມີອິດທິພົນ - ປັນຍາຊົນ, ສະມາຊິກສະພາ, ອຳນາດການປົກຄອງທ້ອງຖິ່ນ, ວິສາຫະກິດ, ອົງການສັງຄົມ, ເຄືອຂ່າຍນັກວິຊາການ, ສື່ມວນຊົນ ແລະ ບັນດາສູນຄົ້ນຄວ້າ; ຍູ້ແຮງການຂົນຂວາຍ, ຍົກສູງປະສິດທິຜົນການເຊື່ອມຕໍ່ແຫຼ່ງກຳລັງສາກົນ; ປ່ຽນໃໝ່ວຽກງານຂໍ້ມູນຂ່າວສານຕ່າງປະເທດ; ຍົກລະດັບວຽກງານຄົ້ນຄວ້າ, ສະເໜີແນະ.

ສືບທອດພື້ນຖານທີ່ຄົນຮຸ່ນກ່ອນໄດ້ສ້າງສົມໄວ້, ບໍ່ຢຸດຢັ້ງປ່ຽນໃໝ່ແນວຄິດ, ວິທີເຂົ້າເຖິງ, ເນື້ອໃນ ແລະ ຮູບແບບການເຄື່ອນໄຫວ, ຍົກລະດັບຄຸນຄ່າ, ນັ້ນແມ່ນເສັ້ນທາງໃຫ້ວຽກງານການຕ່າງປະເທດປະຊາຊົນຂອງສະຫະພັນບັນດາອົງການມິດຕະພາບຫວຽດນາມ ຢືນຢັນຖານະຂອງຕົນໃຫ້ສົມຄູ່ກັບຄວາມຮຽກຮ້ອງໃໝ່ໃນການພັດທະນາປະເທດ.

ຂ້າພະເຈົ້າມາຫວຽດນາມ ເພາະຕົວເລກ 11 ຍສໝ - ໃນເຊົ້າມື້ໜຶ່ງຂອງເດືອນ 7, ຂ້າພະເຈົ້າໄດ້ພົບທ່ານ Bob Frank ຢູ່ຮ່າໂນ້ຍ, ໃນການກັບມາຫວຽດນາມຄັ້ງທີ 13 ຂອງທ່ານ. ຄັ້ງນີ້ ທ່ານກໍກັບມາອີກເພາະຕົວເລກທີ່ຝັງໃຈບໍ່ຮູ້ລືມ: ເລກ 11.

ການຈັບມືຂອງຫຸ່ນຍົນ ຍສໝ - ໃນເດືອນພຶດສະພາ 2026, ໃນເວທີປາໄສສຸດຍອດການພັດທະນາອຸດສາຫະກຳປັນຍາປະດິດ ຈີນ - ອາຊຽນ ຄັ້ງທີ II, ສຽງ “ແຕກ” ເບົາໆຂອງຂໍ້ຕໍ່ກົນຈັກໄດ້ດັງຂຶ້ນ ເມື່ອແຂນຂອງຫຸ່ນຍົນທີ່ຖືກສ້າງຂຶ້ນຈາກຈິງໄດ້ຄ່ອຍໆຍື່ນອອກມາ ແລະ ວາງລົງໃນຝາມືຂອງທ່ານ ຫງວຽນກວັນ – ອະດີດລັດຖະມົນຕີກະຊວງວິທະຍາສາດ ແລະ ເຕັກໂນໂລຊີ ຫວຽດນາມ. ຊ່ວງເວລານັ້ນເກີດຂຶ້ນພຽງບໍ່ກີ່ວິນາທີ, ແຕ່ສຳລັບຂ້າພະເຈົ້າ, ມັນແມ່ນຈຸດຈົບທີ່ສົມບູນຂອງເສັ້ນທາງອັນຍາວນານ ແລະ ກໍເປັນການເລີ່ມຕົ້ນຂອງຄວາມຝັນໃໝ່ທີ່ຂ້າພະເຈົ້າບົ່ມເພາະປູກຝັງມາຕະຫຼອດ 2 ທົດສະວັດຢູ່ເທິງຜືນແຜ່ນດິນຮູບຮ່າງຄ້າຍຕົວ S ແຫ່ງນີ້.