ຫວຽດນາມ - ລາວ ຊຸກຍູ້ການຮັບຮູ້ລາຍເຊັນດິຈິຕອນເຊິ່ງກັນ ແລະ ກັນ

ແລກປ່ຽນປະສົບການພັດທະນາລາຍເຊັນດິຈິຕອນ ແລະ ການບໍລິການທີ່ໜ້າເຊື່ອຖື

ພາຍໃຕ້ຂອບການຮ່ວມມືລະຫວ່າງສອງປະເທດ, ສູນຢັ້ງຢືນທາງເອເລັກໂຕຣນິກແຫ່ງຊາດ (NEAC), ສັງກັດກະຊວງວິທະຍາສາດ ແລະ ເຕັກໂນໂລຊີຫວຽດນາມ, ໄດ້ພົບປະເຮັດວຽກກັບຄະນະຜູ້ແທນສູນອິນເຕີເນັດແຫ່ງຊາດລາວ (LANIC), ສັງກັດກະຊວງເຕັກໂນໂລຊີ ແລະ ການສື່ສານລາວ, ໂດຍມີທ່ານ ມີນາໄຊ ພິລາວົງ, ຜູ້ອຳນວຍການ LANIC ເປັນຫົວໜ້າຄະນະ.

ສອງຝ່າຍໄດ້ສຸມໃສ່ແລກປ່ຽນກ່ຽວກັບການຄຸ້ມຄອງ, ການດຳເນີນງານຂອງລະບົບຢັ້ງຢືນລາຍເຊັນດິຈິຕອນ, ການພັດທະນາການບໍລິການທີ່ໜ້າເຊື່ອຖື ແລະ ການປັບປຸງຂອບກົດໝາຍ ເພື່ອຮັບປະກັນຄວາມເປັນຂອງແທ້, ຄວາມຄົບຖ້ວນສົມບູນ ແລະ ຄວາມປອດໄພຂອງບັນດາທຸລະກຳທາງເອເລັກໂຕຣນິກ.

ທ່ານ ມີນາໄຊ ພິລາວົງ, ຜູ້ອຳນວຍການ LANIC ໃຫ້ຮູ້ວ່າ ລາວພວມຍົກລະດັບໂຄງລ່າງພື້ນຖານການຢັ້ງຢືນລາຍເຊັນດິຈິຕອນ, ພັດທະນາບັນດາການບໍລິການທີ່ໜ້າເຊື່ອຖື ແລະ ສຶກສາຄົ້ນຄວ້າການປັບປຸງກົດໝາຍວ່າດ້ວຍລາຍເຊັນເອເລັກໂຕຣນິກ ເພື່ອຕອບສະໜອງການພັດທະນາຂອງເຕັກໂນໂລຊີ ແລະ ຂະຫຍາຍການນຳໃຊ້ໃນບັນດາຂົງເຂດເສດຖະກິດ - ສັງຄົມ.

ທ່ານນາງ ໂຕ ທິ ທູ ເຮືອງ, ຜູ້ອຳນວຍການ NEAC ໄດ້ເນັ້ນໜັກເຖິງຄວາມຈຳເປັນໃນການສ້າງນະໂຍບາຍໃຫ້ສອດຄ່ອງກັບສະພາບຕົວຈິງ, ມີວິໄສທັດໄລຍະຍາວ, ຮັບປະກັນຄວາມເປັນຂອງແທ້, ຄວາມຄົບຖ້ວນສົມບູນ ແລະ ຄວາມຮັບຜິດຊອບທາງກົດໝາຍຕໍ່ຂໍ້ຄວາມຂໍ້ມູນໃນອະນາຄົດ.

ຝ່າຍລາວໃຫ້ຄວາມສົນໃຈເປັນພິເສດຕໍ່ປະສົບການຂອງຫວຽດນາມໃນການຄຸ້ມຄອງລະບົບຢັ້ງຢືນລາຍເຊັນດິຈິຕອນ ແລະ ການນຳໃຊ້ໃນຂົງເຂດພາສີ, ອາກອນ ແລະ ການນຳເຂົ້າ - ສົ່ງອອກສິນຄ້າ.

ຕາມຂໍ້ມູນທີ່ NEAC ໄດ້ແບ່ງປັນ, ນັບຮອດວັນທີ 15/10/2026, ຫວຽດນາມໄດ້ອອກ ໃບຢັ້ງຢືນລາຍເຊັນດິຈິຕອນປະມານ 36,16 ລ້ານໃບ, ໂດຍອັດຕາການເຂົ້າເຖິງໃນກຸ່ມປະຊາກອນຜູ້ໃຫຍ່ບັນລຸ 52,26%.

ນອກຈາກຜົນສຳເລັດໃນການພັດທະນາລາຍເຊັນດິຈິຕອນແລ້ວ, ຜູ້ຕາງໜ້າ NEAC ຍັງໄດ້ແນະນຳປະສົບການໃນການສ້າງກອບກົດໝາຍ, ລະບົບມາດຕະຖານ, ຂໍ້ກຳນົດທາງເຕັກນິກ ແລະ ການຄຸ້ມຄອງກິດຈະກຳການໃຫ້ບໍລິການຢັ້ງຢືນ.

ທ່ານນາງ ໂຕ ທິ ທູ ເຮືອງ, ຜູ້ອຳນວຍການ NEAC ໄດ້ເນັ້ນໜັກເຖິງບົດບາດຂອງຂອບກົດໝາຍໃນການພັດທະນາບັນດາການບໍລິການທີ່ໜ້າເຊື່ອຖື. ຈາກປະສົບການປະຕິບັດກົດໝາຍວ່າດ້ວຍທຸລະກຳທາງເອເລັກໂຕຣນິກ ປີ 2023, ທ່ານນາງໄດ້ສະເໜີໃຫ້ຝ່າຍລາວສຶກສາຄົ້ນຄວ້າເພີ່ມເຕີມລະບຽບການກ່ຽວກັບການບໍລິການຢັ້ງຢືນຂໍ້ຄວາມຂໍ້ມູນ, ເພື່ອຮັບໃຊ້ການຕົກລົງເຮັດສັນຍາເອເລັກໂຕຣນິກ ແລະ ບັນດາທຸລະກຳໃນສະພາບແວດລ້ອມດິຈິຕອນ.

ທ່ານນາງຍັງໄດ້ໃຫ້ຂໍ້ສັງເກດກ່ຽວກັບບັນດາຂໍ້ຮຽກຮ້ອງທາງກົດໝາຍໃໝ່ທີ່ເກີດຂຶ້ນຈາກການພັດທະນາຂອງປັນຍາປະດິດ (AI) ແລະ ບັນດາລະບົບອັດຕະໂນມັດ. ຕາມນັ້ນ, ນະໂຍບາຍຕ້ອງຕອບສະໜອງຂໍ້ຮຽກຮ້ອງສະເພາະໜ້າ, ພ້ອມທັງຮັບປະກັນຄວາມເປັນຂອງແທ້, ຄວາມຄົບຖ້ວນສົມບູນ ແລະ ຄວາມຮັບຜິດຊອບທາງກົດໝາຍຕໍ່ຂໍ້ຄວາມຂໍ້ມູນໃນອະນາຄົດ.

ໃນການແລກປ່ຽນກ່ຽວກັບເນື້ອໃນດັ່ງກ່າວ, ທ່ານ ຟ້າມ ກວກ ຮວ່ານ, ຮອງຜູ້ອຳນວຍການ NEAC ໄດ້ສະເໜີໃຫ້ລາວສຶກສາຄົ້ນຄວ້າຂະຫຍາຍຂອບເຂດການຄຸ້ມຄອງຂອງກົດໝາຍວ່າດ້ວຍລາຍເຊັນເອເລັກໂຕຣນິກ ໃຫ້ກວມເອົາທັງລາຍເຊັນເອເລັກໂຕຣນິກ ແລະ ການບໍລິການທີ່ໜ້າເຊື່ອຖື.

ແນວທາງດັ່ງກ່າວຈະສ້າງພື້ນຖານທາງກົດໝາຍເພື່ອພັດທະນາບັນດາການບໍລິການ ເຊັ່ນ ການປະທັບຕາເວລາ ແລະ ການຢັ້ງຢືນຂໍ້ຄວາມຂໍ້ມູນ, ເພື່ອຕອບສະໜອງຄວາມຕ້ອງການດ້ານທຸລະກຳທາງເອເລັກໂຕຣນິກທີ່ປອດໄພ ແລະ ໂປ່ງໃສ.

ສຶກສາຄົ້ນຄວ້າກົນໄກການຮັບຮູ້ລາຍເຊັນດິຈິຕອນລະຫວ່າງສອງປະເທດ

ໜຶ່ງໃນບັນດາເນື້ອໃນສຳຄັນທີ່ NEAC ແລະ LANIC ໄດ້ປຶກສາຫາລື ແມ່ນຄວາມເປັນໄປໄດ້ໃນການຮັບຮູ້ລາຍເຊັນດິຈິຕອນເຊິ່ງກັນ ແລະ ກັນ, ເພື່ອສ້າງຄວາມສະດວກໃຫ້ແກ່ບັນດາອົງການ ແລະ ວິສາຫະກິດໃນການດຳເນີນທຸລະກຳທາງເອເລັກໂຕຣນິກຂ້າມຊາຍແດນ, ໂດຍສະເພາະໃນຂົງເຂດພາສີ ແລະ ການນຳເຂົ້າ - ສົ່ງອອກ.

NEAC ໄດ້ແນະນຳແນວທາງການສ້າງບັນຊີລາຍຊື່ທີ່ໜ້າເຊື່ອຖືຮ່ວມກັນ (Trust List). ຕາມຮູບແບບນີ້, ແຕ່ລະປະເທດຈະສ້າງ ແລະ ປະກາດບັນຊີລາຍຊື່ບັນດາອົງການທີ່ໃຫ້ບໍລິການຢັ້ງຢືນລາຍເຊັນດິຈິຕອນທີ່ຕອບສະໜອງຂໍ້ກຳນົດ, ເພື່ອເປັນພື້ນຖານໃນການສຶກສາຄົ້ນຄວ້າການກວດສອບຄວາມເປັນຂອງແທ້ ແລະ ການຍອມຮັບລາຍເຊັນດິຈິຕອນລະຫວ່າງສອງປະເທດ.

ທ່ານ ຟ້າມ ກວກ ຮວ່ານ, ຮອງຜູ້ອຳນວຍການ NEAC ເຫັນວ່າ ກົນໄກການຮ່ວມມືຕ້ອງຮັບປະກັນຄວາມເປັນເອກະລາດຂອງໂຄງລ່າງພື້ນຖານທາງເຕັກນິກ, ພ້ອມທັງສອດຄ່ອງກັບລະບຽບກົດໝາຍຂອງແຕ່ລະປະເທດ.

NEAC ມີຄວາມພ້ອມສະໜັບສະໜູນ LANIC ໃນການທົບທວນ, ປະເມີນບັນດາເງື່ອນໄຂທາງເຕັກນິກ ແລະ ຮ່ວມກັນສຶກສາຄົ້ນຄວ້າແນວທາງການປະຕິບັດທີ່ເໝາະສົມ.

ຕາມທ່ານ ຟ້າມ ກວກ ຮວ່ານ ແລ້ວ, ຮູບແບບບັນຊີລາຍຊື່ທີ່ໜ້າເຊື່ອຖືຮ່ວມກັນ ຄວນໄດ້ຮັບການສຶກສາຄົ້ນຄວ້າໃນທິດທາງເປີດກວ້າງ, ບໍ່ພຽງແຕ່ຮັບໃຊ້ການຮ່ວມມືຫວຽດນາມ - ລາວ ເທົ່ານັ້ນ, ແຕ່ຍັງສ້າງພື້ນຖານເພື່ອຂະຫຍາຍການເຊື່ອມຕໍ່ ແລະ ການຮັບຮູ້ລາຍເຊັນດິຈິຕອນກັບບັນດາປະເທດອາຊຽນໃນອະນາຄົດ.

ສອງຝ່າຍຍັງໄດ້ແລກປ່ຽນກ່ຽວກັບຄວາມເປັນໄປໄດ້ໃນການທົດລອງຮັບຮູ້ລາຍເຊັນດິຈິຕອນເຊິ່ງກັນ ແລະ ກັນ ໃນຂົງເຂດພາສີ ແລະ ການນຳເຂົ້າ - ສົ່ງອອກສິນຄ້າ, ຜ່ານນັ້ນຊຸກຍູ້ການຫັນເອກະສານເປັນດິຈິຕອນ, ຫຼຸດຜ່ອນຂັ້ນຕອນລະບຽບການ ແລະ ສະໜັບສະໜູນກິດຈະກຳການຄ້າຂ້າມຊາຍແດນ.

ມຸ່ງໄປສູ່ຂໍ້ຕົກລົງຮ່ວມມືສະບັບໃໝ່ໃນປີ 2027

ບົນພື້ນຖານບົດບັນທຶກຂໍ້ຕົກລົງຮ່ວມມືທີ່ໄດ້ລົງນາມໃນປີ 2022, NEAC ແລະ LANIC ໄດ້ເຫັນດີທົບທວນຜົນການປະຕິບັດ, ສ້າງຕັ້ງຄະນະເຮັດວຽກຮ່ວມ ເພື່ອສ້າງແຜນການ ແລະ ກະກຽມເນື້ອໃນສຳລັບຂໍ້ຕົກລົງຮ່ວມມືໃນໄລຍະຕໍ່ໄປ, ເຊິ່ງຄາດວ່າຈະລົງນາມໃນປີ 2027.

ທ່ານ ມີນາໄຊ ພິລາວົງ, ຜູ້ອຳນວຍການ LANIC ໄດ້ຕີລາຄາສູງຕໍ່ບັນດາຂໍ້ສະເໜີຈາກຝ່າຍຫວຽດນາມ ແລະ ປາຖະໜາຢາກສືບຕໍ່ຮ່ວມມືໃນ 3 ຂົງເຂດສຳຄັນ ຄື: ສຶກສາຄົ້ນຄວ້າການຮັບຮູ້ລາຍເຊັນດິຈິຕອນເຊິ່ງກັນ ແລະ ກັນ, ໂດຍໃຫ້ບຸລິມະສິດການນຳໃຊ້ໃນຂົງເຂດພາສີ ແລະ ການນຳເຂົ້າ - ສົ່ງອອກ; ການສະໜັບສະໜູນດ້ານເຕັກນິກ, ການຝຶກອົບຮົມ ແລະ ການຍົກສູງຄວາມສາມາດດ້ານວິຊາຊີບ; ການແບ່ງປັນປະສົບການໃນການປັບປຸງນະໂຍບາຍ ແລະ ກົດໝາຍ, ໂດຍສະເພາະໃນຂະບວນການທີ່ລາວພວມປັບປຸງກົດໝາຍວ່າດ້ວຍລາຍເຊັນເອເລັກໂຕຣນິກ.

ຝ່າຍລາວຍັງໄດ້ໃຫ້ຂໍ້ມູນກ່ຽວກັບທິດທາງການເຊື່ອມລວມລາຍເຊັນດິຈິຕອນເຂົ້າໃນແອັບພລິເຄຊັນຢັ້ງຢືນຕົວຕົນທາງເອເລັກໂຕຣນິກແຫ່ງຊາດ LA-EID, ຄ້າຍຄືກັບແອັບພລິເຄຊັນ VNeID ຂອງຫວຽດນາມ, ເພື່ອຂະຫຍາຍຄວາມສາມາດໃນການໃຫ້ບໍລິການພາກລັດ ແລະ ຊຸກຍູ້ທຸລະກຳທາງເອເລັກໂຕຣນິກ.

ຜ່ານການພົບປະເຮັດວຽກຄັ້ງນີ້, NEAC ແລະ LANIC ໄດ້ສືບຕໍ່ເສີມສ້າງການຮ່ວມມືໃນຂົງເຂດການຫັນປ່ຽນດິຈິຕອນ, ຄ່ອຍໆສຶກສາຄົ້ນຄວ້າບັນດາວິທີແກ້ໄຂເພື່ອເຊື່ອມຕໍ່ລະບົບຢັ້ງຢືນລາຍເຊັນດິຈິຕອນ, ສ້າງຄວາມສະດວກໃຫ້ແກ່ທຸລະກຳທາງເອເລັກໂຕຣນິກ ແລະ ການຮ່ວມມືດ້ານເສດຖະກິດລະຫວ່າງຫວຽດນາມ ແລະ ລາວ.

ວິສາຫະກິດຫວຽດນາມ - ລາວ ຮ່ວມມືດຳເນີນ 2 ໂຄງການ ມູນຄ່າເກືອບ 30 ລ້ານ USD ຍສໝ - ຕອນບ່າຍວັນທີ 23/10, ຢູ່ນະຄອນຫຼວງວຽງຈັນ (ລາວ), ກຸ່ມບໍລິສັດ Supchaleun ຂອງລາວ ແລະ ກຸ່ມບໍລິສັດຫວຽດ - ຣັດເຊຍ ຂອງຫວຽດນາມ ໄດ້ລົງນາມໃນບັນທຶກຂໍ້ຕົກລົງການຮ່ວມມື (MOA) ເພື່ອດຳເນີນ 2 ໂຄງການໃນຂະແໜງອະສັງຫາລິມະຊັບ ແລະ ກະສິກຳອັດສະລິຍະ ດ້ວຍມູນຄ່າການລົງທຶນລວມເກືອບ 30 ລ້ານ USD, ປະກອບສ່ວນຂະຫຍາຍການຮ່ວມມືທາງເສດຖະກິດ ແລະ ເຊື່ອມຕໍ່ວິສາຫະກິດຂອງສອງປະເທດ.

ບັນດາກິດຈະກຳທີ່ເປັນຮູບປະທຳ ເສີມສ້າງມິດຕະພາບຫວຽດນາມ - ລາວ ຢູ່ເຂດຊາຍແດນ ຍສໝ - ວັນທີ 24/10, ຢູ່ເຂດຫຼັກໝາຍຊາຍແດນເລກທີ 591 ຂຶ້ນກັບບ້ານຕ່າຣຸ່ງ, ຕາແສງເຮືອງເລິບ (ແຂວງກວ໋າງຈິ), ພະນັກງານ ແລະ ນັກຮົບທະຫານຊາຍແດນຫວຽດນາມ ໄດ້ປະສານສົມທົບກັບບັນດາອົງການ, ທ່ານໝໍ, ພະຍາບານ ແລະ ຜູ້ມີຈິດໃຈກຸສົນ ຈັດກິດຈະກຳກວດພະຍາດ, ແຈກຢາປິ່ນປົວໂດຍບໍ່ເສຍຄ່າ ພ້ອມດ້ວຍກິດຈະກຳຊ່ວຍເຫຼືອດ້ານສະຫວັດດີການສັງຄົມຫຼາຍຢ່າງ ໃຫ້ແກ່ປະຊາຊົນສອງຟາກຊາຍແດນຫວຽດນາມ - ລາວ.